Свет
„Сандеј Тајмс“: Принцот Чарлс добил 1,2 милиони долари од семејството на Бин Ладен
Принцот Чарлс добил донација од 1 милион фунти во добротворни цели од семејството на Осама бин Ладен, пишува „Сандеј Тајмс“.
Според весникот, принцот Чарлс (73) прифатил пари од Бакр бин Ладен, патријархот на саудиското семејство и неговиот брат Шафик. Принцот Чарлс, наводно, одржал приватен состанок со Бакр (76) во Кларенс Хаус, кралската резиденција, во Лондон на 30 октомври 2013 година, две години откако американските специјални сили го убија Осама бин Ладен во Пакистан.
Кларенс Хаус ги оспорува многу од тврдењата изнесени во Сандеј Тајмс, велејќи дека одлуката за прифаќањето донации за добротворната фондација на принцот од Велс (PWCF) ја носат исклучиво доверители, пишува Гардијан.
Бакр и Шафик бин Ладен се полубраќа на Осама, поврзани со основачот на Ал Каеда преку нивниот татко, Мохамед бин Авад бин Ладен, милијардер роден во Јемен. Засега нема индиции дека Бакр или Шафик бин Ладен спонзорирале или биле вмешани во терористичките напади.
„Донацијата на шеикот Бакр бин Ладен беше внимателно разгледана од страна на доверителите на PWCF во 2013 година, проучувајќи ги сите потребни детали и контактирајќи со владата. Одлуката за прифаќање на донацијата беше целосно донесена од страна на доверителите”, рече Иан Чешир, претседател на PWCF.
Извор близок до добротворната организација рече дека по темелна истрага, поверениците заклучиле дека дејствијата на Осама бин Ладен не треба да го оцрнат целото семејство. Тој ги негираше наводите дека принцот Чарлс лично посредувал во договорот, се согласил на донациите и покрај приговорите на советниците и дека неколку од нив побарале од него да ги врати парите.
„Сандеј тајмс“ пишува дека принцот Чарлс ја примил готовината еднаш во ковчег, а друг пат во чанта. Предавањата, наводно, се случиле за време на состаноци меѓу двајцата мажи, вклучително и еден во Кларенс Хаус.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Нетанјаху: Со кое право не’ споредувате со Хамас додека водиме праведна војна
Израелскиот премиер Бенјамин Нетанјаху рече дека одлуката на обвинителите на Меѓународниот кривичен суд, со која се бара налог за негово апсење, е апсурдна и е насочена кон Израел.
„Со гадење ја отфрлам споредбата на хашките обвинители меѓу демократски Израел и масовните убијци на Хамас“, рече Нетанјаху.
„Со каква дрскост го споредувате Хамас кој убиваше, палеше, масакрираше, силуваше и ги киднапираше нашите браќа и сестри, со војниците на ИДФ кои водат праведна војна“.
Тој го нарече потегот на обвинителот на судот нов тип на антисемитизам.
„Граѓани на Израел, ви ветувам едно – обидот да ни ги врзат рацете нема да успее“, рече тој.
„Ветувам дека ниту еден притисок и ниту една одлука на ниту еден меѓународен форум нема да не спречи да ги удриме оние кои сакаат да не уништат“, додаде премиерот.
Израелскиот претседател Херцог, коментирајќи ја веста за налозите за апсење за воени злосторства, кои покрај лидерите на Хамас се однесуваат и на двајца високи израелски лидери, вклучително и самиот премиер Нетанјаху, рече дека одлуката на обвинителот „повеќе од срамна“ и ќе ги охрабри терористите ширум светот.
„Секој обид да се повлечат паралели меѓу овие ѕверски терористи и демократски избраната влада на Израел – која работи на исполнување на својата должност да ги брани и заштити своите граѓани во целосна согласност со принципите на меѓународното право – е срамота и не треба да биде прифатена од никого. “, рече Херцог.
Главниот обвинител на судот Карим Кан, побара од судиите на Меѓународниот кривичен суд да одобрат налози за апсење на тројца лидери на Хамас и двајца израелски лидери за воени злосторства и злосторства против човештвото извршени за време на седуммесечната војна во Газа, објави во понеделникот судот .
Одлуката ја критикуваа и САД.
Свет
Америка изрази сочувство за смртта на иранскиот претседател
Соединетите држави денеска испратија „официјални изрази на сочувство“ за смртта на иранскиот претседател Ебрахим Раиси и други официјални лица во хеликоптерска несреќа, објави Стејт департментот.
„Додека Иран избира нов претседател, ние ја потврдуваме нашата поддршка за иранскиот народ и неговата борба за човекови права и основни слободи“, изјави портпаролот на Стејт департментот Метју Милер.
Американскиот министер за одбрана Лојд Остин денеска изјави дека нема увид во причината за хеликоптерската несреќа во која загина иранскиот претседател Ебрахим Раиси, додавајќи дека не мора да го гледа поширокото влијание на тој настан врз регионалната безбедност.
„Не можам да шпекулирам што би можело да биде причината“, рече Остин пред новинарите.
Американскиот Стејт департмент додаде дека САД ќе продолжат да се спротивставуваат на поддршката на Иран за тероризмот, ширењето на опасно оружје и унапредувањето на неговата нуклеарна програма.
Свет
Бајден: Барањето за апсење на Нетанјаху е изедначување на Израел и Хамас
Барањето на обвинителот на Меѓународниот кривичен суд да се издаде налог за апсење на израелските лидери е безобразно и САД не се согласуваат со споредбата меѓу Израел и Хамас, изјави американскиот претседател, Џо Бајден.
„Да бидам јасен, што и да се обидува да имплицира овој обвинител, нема изедначување на Израел и Хамас“, рече Џо Бајден.
Државниот секретар на САД, Ентони Блинкен, пак, предупреди дека таква одлука може да ги загрози напорите за постигнување договор за прекин на огнот, договор за заложниците и за зголемување на хуманитарната помош во Газа.
„Го отфрламе обидот на обвинителот да го изедначи Израел со Хамас“, нагласи Блинкен.
Главниот обвинител на судот, Карим Кан, претходно денеска изјави дека се поднесени налози за апсење против Нетанјаху и министерот за одбрана Јоав Галант под обвинение за „поттикнување истребување, поттикнување глад како метод на војна, вклучително и задржување на хуманитарна помош и намерно таргетирање на цивили во конфликтот“.
Покрај тоа, денеска судот побара апсење на лидерите на Хамас – Јахја Синвар, Мохамед Деиф и Исмаил Ханије, кои се обвинети за „истребување, убиство, земање заложници, силување и сексуални напади“.