Свет
Блинкен ја обвини Русија дека користи нуклеарен штит во Украина, Москва демантира
Соединетите Американски Држави ја обвинија Русија дека ја користи најголемата нуклеарна централа во Украина како „нуклеарен штит“ со стационирање на војници и спречување на украинските сили да возвратат, ризикувајќи катастрофална нуклеарна несреќа.
Државниот секретар Антони Блинкен рече дека Соединетите држави се длабоко загрижени што нуклеарната централа Запорожје, која во март Русија беше обвинета за гранатирање област во нејзина непосредна близина, сега е руска воена база што се користи за цел на блиските украински сили.
„Се разбира дека Украинците не можат да возвратат за да не дојде до страшна несреќа со нуклеарна централа“, рече Блинкен во Њујорк.
Русија оди подалеку од употребата на „човечки штит“, рече Блинкен, посочувајќи дека тоа е „нуклеарен штит“.
Заменик-министерот за надворешни работи на Украина, Микола Точицки, рече дека „потребни се силни заеднички акции за да се спречи нуклеарна катастрофа“ и ја повика меѓународната заедница да го „затвори небото“ над украинските нуклеарни централи со системи за противвоздушна одбрана.
Русите негираа
Русија целосно ги отфрла изјавите на американскиот државен секретар Ентони Блинкен дека наводно ја користи нуклеарната централа Запорожје како воена база.
„Во изјавата на американскиот државен секретар Ентони Блинкен на 10-тата конференција за ревизија на Договорот за неширење на нуклеарно оружје, се слушнаа обвинувања дека руските вооружени сили ја користат нуклеарната централа Запорожје како воена база. Ние целосно ги отфрламе таквите обвинувања. Повеќе пати сме изјавиле дека дејствијата на нашите вооружени сили на никаков начин не и’ наштетуваат на нуклеарната безбедност на Украина и не се мешаат во нормалното функционирање на станицата“, нагласува руската страна.
Во коментарот на руската делегација, објавен на веб-страницата на постојаната мисија на Русија во ОН, се наведува дека во нуклеарната централа Запорожје нема руски вооружени сили, освен ограничен број војници неопходни за нејзина заштита.
Исто така, се посочува дека во последните месеци, украинските вооружени сили извршиле низа провокации со помош на беспилотни летала, вклучително и оние испорачани од земјите-членки на НАТО, со цел да го нарушат нормалното функционирање на станицата, како и да го заплашат нејзиниот персонал, со цел да ја поткопаат безбедноста на нуклеарната централа и конечно да создадат закана од нуклеарна катастрофа.
„Разговаравме за ова, меѓу другото, на состанокот на Советот за безбедност на ОН на 29 јули. Киев презема такви чекори со целосна поддршка на САД и другите западни земји“, истакна делегацијата.
Нуклеарната централа Запорожје се наоѓа на левиот брег на реките Днепар, во близина на градот Енергодар. Таа е најголемата нуклеарна централа во Европа по број на единици и капацитет. Станицата има шест енергетски блокови VVER-1000, секој со капацитет од 1 гигават.
Електраната од март ја чува руската армија. Министерството за надворешни работи на Русија ја нагласи оправданоста на преземањето на контролата врз електраната од страна на руската армија во смисла на спречување на истекување на нуклеарни и радиоактивни материјали. Министерството потсети и дека станицата во моментов е контролирана од украински оператор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Иран воведе санкции кон САД и Велика Британија поради поддршката кон Израел
Иранските власти денеска објавија дека воведуваат санкции против неколку американски и британски поединци и субјекти поради нивната поддршка на Израел во војната против палестинското движење Хамас во Појасот Газа.
Иранската дипломатија соопшти дека санкциите се однесуваат на седум Американци, меѓу кои и генералот Брајан Фентон, шеф на командата за специјални операции и вицеадмиралот Бред Купер, поранешен шеф на американските поморски сили на Блискиот Исток.
Од британските функционери и субјекти цел на санкциите се министерот за одбрана Грант Шапс и британската кралска морнарица во Црвеното Море.
Санкции беа најавени и против американските компании „Локид Мартин“ и „Шеврон“ и британските компании „Елбит системс“, „Паркер Мегит“ и „Рафаел УК“.
Иранското Министерство за надворешни работи додаде дека санкциите вклучуваат „блокирање на сметки и трансакции во иранскиот финансиски и банкарски систем, блокирање на средства под јурисдикција на Иран, како и забрана за издавање визи и влез на иранска територија“.
Влијанието на овие мерки врз поединци или субјекти, како и врз можните средства или трансакции со Иран, сепак, останува неизвесно.
Од почетокот на војната во Појасот Газа, предизвикана на 7 октомври со нападот на палестинското исламистичко движење Хамас на израелска територија, нагло се зголемија тензиите меѓу Израел од една страна и Иран и неговите сојузници, особено либанскиот Хезболах, од друга.
Ситуацијата се вжешти на 13 април, кога Иран изврши напад врз Израел, со 350 беспилотни летала и проектили, од кои повеќето беа пресретнати со помош на САД и други земји.
Иранските власти тогаш објавија дека дејствувале во „самоодбрана“ по смртоносниот напад што му се припишува на Израел врз иранскиот конзулат во Дамаск на 1 април.
Свет
Нетанјаху: Ако Евреите не се заштитат самите, никој нема да ги заштити
Евреите мора да бидат способни да се „одбранат“ бидејќи никој нема да ги заштити, изјави денеска израелскиот премиер Бенјамин Нетанјаху, додека се повеќе се креваат гласови против војната што Израел ја води во Појасот Газа.
„Ако треба да се браниме, ќе се браниме. Ако е можно да се мобилизираат „оние што не се Евреи“, тоа е добро. Но, ако не се заштитиме, никој нема да го направи тоа“, рече Нетанјаху.
Премиерот ова го изјави на приемот на преживеаните од нацистичкиот геноцид кои во недела ќе учествуваат на церемонијата на Денот на сеќавањето на Холокаустот во меморијалниот центар Јад Вашем.
Разорната војна што Израел ја започна во Појасот Газа како одмазда за нападот на палестинското движење Хамас на 7 октомври во Израел предизвикува зголемени критики ширум светот.
Осврнувајќи се на студентското движење во знак на солидарност со Палестинците во градовите на американските колеџи, Нетанјаху рече дека ги осудува „страшните демонстрации на антисемитските орди кои повикуваат на уништување на Израел и ги напаѓаат еврејските студенти и професори“.
Нетанјаху, исто така, се соочува со отворено меѓународно противење на неговата намера да започне голема офанзива врз градот Рафах, во јужниот дел на Појасот Газа.
Тоа е засолниште за еден и пол милион Палестинци, од кои огромното мнозинство се раселени поради војната, додека израелските власти сметаат дека градот е последното упориште на борците на Хамас.
Свет
Трамп: Погледнете ги Лондон и Париз, тие се непрепознатливи
Поранешниот американски претседател Доналд Трамп изјави за време на предизборниот митинг во Висконсин дека Лондон и Париз се „непрепознатливи“, пренесува „Politico“.
„Видовме што се случи кога Европа ги отвори вратите за џихад. Погледнете го Париз, погледнете го Лондон. Тие се непрепознатливи“, рече Трамп, кој ќе се кандидира за нов мандат во Белата куќа на претседателските избори во ноември годинава.
„Ќе влезам во многу проблеми со луѓето во Париз и луѓето во Лондон, но знаете што, тоа е факт. Тие се непрепознатливи и не можеме да дозволиме тоа да и се случи на нашата земја. Имаме неверојатна култура, традиција. Не можеме да дозволиме тоа да се случи овде и никогаш нема да дозволам да им се случи на Соединетите Американски Држави“, рече тој.
Трамп често ги критикуваше европските земји. Во декември 2015 година, набргу откако Париз беше погоден од смртоносен исламистички терористички напад, тој рече дека населбите во Париз и Лондон се толку опасни што полицијата одбила да оди таму. Во тоа време, Трамп го бранеше својот план „целосно да им забрани на муслиманите да влезат во САД“.
И покрај тоа што беше критикуван за тие забелешки, Трамп продолжи да ја брани својата позиција. „Вистинскиот Париз е различен од Градот на светлината за кој читате. Има области во Париз каде луѓето се толку радикализирани и толку злобни, што полицијата одбива да оди таму. Тие нема да одат таму. Тоа ќе се случи на нашата земја“, предупреди тој.
Во јануари 2016 година тој изјави дека животот во Брисел е како да живееш во „пекол“ поради недостаток на „асимилација“ на муслиманското население.