Македонија
ВМРО-ДПМНЕ: Не успеа обидот на власта да ја обвини ЕУ за сопствениот неуспех, ниту ВМРО-ДПМНЕ за недоволна борба за националните интереси
Не успеа обидот на власта да ја обвини ЕУ за сопствениот неуспех, ниту ВМРО-ДПМНЕ за недоволна борба за националните интереси. СДСМ во изминатиот период додека се подготвуваше да ги распродаде националните интереси имаше две цели. Првата да ја обвини ЕУ дека е виновна за лошата состојба во која се наоѓа Македонија, и втората да го обвини ВМРО-ДПМНЕ преку нивните инсталации во опозицијата дека недоволно се бори за македонските национални интереси, се вели во соопштението од ВМРО-ДПМНЕ.
СДСМ повеќе години водеше хајка против ЕУ, а најеклатантен пример беше нападот врз поранешниот Француски амбасадор во Македонија, г. Тимоние.
Од партијата наведуваат дека власта преку свои инсталации во опозицијата и платен полусвет се обиде да прикаже дека ВМРО-ДПМНЕ недоволно се бори за националните интереси и дека треба да биде порадикална. А, истовремено самото СДСМ да го обвинува ВМРО-ДПМНЕ дека е радикално.
И двете цели на власта не успеаја. Народот го препозна предавството. Но и дека никој од надвор не е виновен за предавствата кои ги прави СДСМ, туку самото СДСМ, т.е. Заев, Пендаровски, а сега со нив и Ковачевски.
СДСМ преку предавството сакаат да се спасат и да се одржат на власт ден повеќе, а истовремено кревајќи димна завеса дека тие што се против нивното предавство одработуваат за трети држави.
Фактите се поинакви. А тие говорат дека ВМРО-ДПМНЕ е првата проевропска партија во Македонија која ги стави темелите и на независна Македонија, со стремеж за сопствена држава, кога сегашното СДСМ се плашеше да помисли на независност. ВМРО-ДПМНЕ и понатаму е проевропска партија, а СДСМ се лажни европејци. ВМРО-ДПМНЕ ќе се бори за европска Македонија, но достоинствена, а не понижена. Патот до неа е преку референдум, од кој власта очајно бега, се вели во соопштението од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Центар и Бутел денеска без вода
Од ЈП Водовод и канализација – Скопје известуваат дека денеска без вода ќе бидат делови од општините Центар и Бутел.
Поради дефект на улична цевка ф 2“ на улица Рајко Жинзифов бб раскрсница со улица Киро Крстевски Платник без вода ќе останат корисниците на дел од улицата Киро Крстевски Платник и дел од улицата Шумадиска во општина Центар. Водоснабдувањето ќе биде прекинато од 08:00 часот до завршување на интервенцијата.
Поради дефект на огрлица од ф 250мм на улицата Македонско Косовска Бригада крак 11 бб. без вода ќе останат корисниците од комплекст Вива Фреш, касарната Илинден и улица Македонско Косовска Бригада крак 11 во општина Бутел.
Водоснабдувањето ќе биде прекинато од 09:00 часот до завршување на интервенцијата.
Македонија
Мурал на потпорен ѕид долг 120 метри крај реката Пена со порака за отпорност кон поплавите
Потпорниот ѕид изграден за спречување на лизгање на земјиштето во близина на ХЕЦ Пена, покрај тоа што обезбедува сигурност за возилата и пешаците, трансформиран е и во дело на уличната уметност, преку голем мурал кој пренесува порака за отпорност и единство во заедниците соочени со катастрофи.
Муралот е изработен како дел од серијата активности кои УНДП ќе ги спроведе за одбележување на меѓународниот ден за намалување на ризиците од катастрофи, 13-ти октомври.
На претставувањето на муралот нацртан по целата должина на ѕидот долг 120 метри денеска присуствуваа Постојаниот претставник на Програмата за развој на Обединетите Нации (УНДП), Армен Григорјан и градоначалникот на Тетово, Биљал Касами.
„Овој ѕид е одлично направен и обезбедува безбедно одвивање на сообраќајот и движење на граѓаните на Тетово кон Бањиче, популарна рекреативна дестинација. Но, беше сив и ние сакавме да го разубавиме, но и да испратиме значајна порака за отпорност и единство во заедниците соочени со ризик од катастрофи“, изјави Григорјан.
„Големо задоволство е да се биде тука со нашите партнери од УНДП, на презентацијата на овој мурал, во чија подготовка учествуваа и повеќе млади лица. Заедно спроведуваме значајни активности со кои сакаме во Полог да ја засилиме отпорноста кон поплавите и нашите заедници да ги направиме поотпорни на катастрофи“, рече Касами.
Инспирација за приказната претставена на муралот, уметниците најдоа во цртежите кои ги изработија учениците од повеќе основни училишта во Тетовско, на работилниците организирани од УНДП.
Ѕидот кој послужи како платно за уличните уметници е изграден во рамки на проектот за „Подобрување на отпорноста кон поплавите во Полошкиот регион“, финансиран од Швајцарија, кој Програмата за развој на Обединетите нации го спроведува во партнерство со Министерството за животна средина и просторно планирање и општините во регионот.
Македонија
Потпишан договор за европски грант, 50-тина училишта ќе добијат соларни фотоволтаични системи
Педесетина училишта во Македонија ќе ја подобрат енергетската ефикасност преку инсталирање на соларни фотоволтаични системи, за што, денеска министерката за образование и наука проф. д-р Весна Јаневска и вицегувернерот на Банката за развој на Советот на Европа, Томас Бошек потпишаа договор за неповратен грант вреден 1,1 милион евра.
Училиштата ќе ја заменат енергијата базирана на фосилни горива со чиста и обновлива енергија. На овој начин, тие ќе дадат дополнителен придонес кон заштитата на животната средина, а ќе заштедат и средства кои ќе можат да се реалоцираат во унапредувањето на условите за настава.
На потпишувањето на договорот за овој проект одобрен преку Европскиот фонд за зелени општествени инвестиции, наменет за јакнење на инклузивните климатски мерки, Јаневска изрази благодарност до Банката за развој при Советот на Европа за континуираната поддршка на државата во унапредувањето на инфраструктурните услови во областа на образованието.
Министерката изрази очекувања дека соработката во насока на достигнување на европските стандарди за квалитет, ќе продолжи и во иднина.