Спорт
„Барселона се мафија. Треба да бидат казнети“

Поранешниот играч за врска на Реал Мадрид, Рафаел ван дер Варт го критикуваше раководството на Барселона за ситуацијата со неговиот сонародник Френки де Јонг.
Холанѓанецот е еден од низата луѓе кои се изненадени од постапките на каталонскиот гигант кои и покрај огромните долгови летово ангажираа скапи засилувања.
„Како можеш да купуваш играчи ако немаш пари? Мислам дека тоа е срамота. Претседателот Лапорта, насекаде, не престанува да се насмевнува со својата голема глава. Тој човек мисли дека е крал. Не разбирам, тоа е мало чудо за мене“, изјави поранешниот холандски репрезентативец и продолжи:
„Де Јонг? Не можеш така да се однесуваш со луѓето. Френки заработува премногу? Прво потпишуваш договор, а потоа треба да го испочитуваш или да се разделиш како што ти одговара, но тука не е така. Тоа е мафија и мора да бидат казнети“.
Де Јонг пред неколку дена беше вербално нападнат од навивачите на Барселона бидејќи не сака да се согласи на намалување на платата за да може клубот да ги пријави сите нови играчи.
Поранешниот играч на Ајакс потпиша петгодишен договор со клубот од „Камп Ноу“ во јануари 2019 година, а трансферот ја чинеше Барселона 75 милиони евра.
25-годишниот Де Јонг минатата сезона одигра 32 натпревари во Ла Лига и постигна три гола со исто толку асистенции.
Во текот на летото се шпекулираше дека тој би можел да се пресели во Манчестер јунајтед под водство на поранешниот тренер на Ајакс, Ерик тен Хаг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
(Видео) ПСЖ се спаси од пораз против Стразбур

Фудбалерите Пари Сен Жермен и Стразбур ремизираа 3:3 во дербито на осмото коло од Лига 1.
Луд натпревар беше виден на „Паркот на принцовите“. Домаќинот трган фуриозно, а на крајот мораше да се бори за еден бод.
Сè започна со голот на Баркола во шестата минута, но гостите до полувремето направија пресврт, со головите на Паничели во 26-та и Мореира во 41-та минута.
Паничели дополнително ги загрижи „Светците“ во 49-та минута, а Рамос го врати ПСЖ во игра од пенал во 58-та минута.
Мајулу спаси бод за ПСЖ во 79-та минута.
И на овој натпревар Луис Енрике не можеше да смета на важни играчи – Дембеле, Маркињос, Невеш, Руиз, додека Кварацхеликја, Мендеш и Витиња започнаа од клупата.
ПСЖ го запиша второто последователно реми, и е на чело со 17 бода, еден повеќе од Стразбур.
Спорт
Мареска потврди дека Палмер ќе паузира уште шест недели

Фудбалерот на Челзи, Кол Палмер (23), нема да може да им се придружи на соиграчите уште шест недели поради повреда на препоните, објави тренерот Енцо Мареска.
Палмер не играл од поразот на Челзи од Манчестер Јунајтед на 20 септември.
Тој го напушти теренот во првото полувреме, а Мареска потоа објави дека ќе го одмори до октомвриската репрезентативна пауза, која сега е завршена.
„Згрешив. За жал, тој ќе биде надвор од терените веројатно шест недели“, рече Мареска, исклучувајќи ја можноста за операција.
„Се обидуваме да го заштитиме Кол колку што е можно повеќе и најважно е тој да биде целосно закрепнат кога ќе се врати“, додаде италијанскиот стручњак.
Челзи, кој моментално е седми на табелата во Премиер лигата, во сабота гостува кај Нотингем Форест, кој е 17-ти на табелата.
Спорт
Флик негира дека претседателот на клубот му се меша во работата

Ханси Флик, на прес конференцијата, пред натпреварот со Џирона, бурно реагираше на прашањето дека претседателот на Барселона барал Ламин Јамал да игра против ПСЖ во Лигата на шампионите.
Шпанските медиуми со денови шпекулираат за наводниот конфликт во врвот на каталонскиот клуб, според кој претседателот Џоан Лапорта наводно му наредил на Ханси Флик да го вклучи Ламин Јамал во почетниот состав за натпреварот против ПСЖ, иако 18-годишникот, според изворите, доцнел на задолжителниот состанок на тимот пред дуелот.
„Би сакал да знам од каде доаѓаат тие глупости. Никој во клубот никогаш не ме замолил да направам нешто слично. Тие ми веруваат целосно. Немам што да кријам, познато е дека во Барселона тренерскиот штаб носи спортски одлуки“, рече Флик.
Тој нагласи дека Ламин Јамал не бил казнет и дека неговото место во почетниот состав против ПСЖ е спортска одлука, а не резултат на каков било притисок од раководството.
Да потсетиме дека шпанските таблоиди претходно објавија дека Флик прво планирал да го казни младиот напаѓач затоа што доцнел и дека му рекол дека нема да биде во првиот состав. Сепак, според овие шпекулации, раководството на клубот наводно инсистирало Јамал да го започне натпреварот.
Инаку, Барселона во второто коло загуби од ПСЖ со 1:2.