Свет
Археолози во Израел откриле луксузен имот стар 1.200 години
Археолозите открија луксузен имот стар 1.200 години на југот на Израел, соопшти денеска израелската државна служба за антиквитети.
Откритието во бедуинскиот град Рахат припаѓа на раниот исламски период и датира од 8 или 9 век. Луксузната куќа е изградена околу двор и има четири крила со неколку соби.
Еден дел има мермерен коридор со камени подови и сложени ѕидни украси. Археолозите пронајдоа и фрагменти од украсени стаклени садови.
Археолозите биле изненадени кога под дворот откриле подземни камени тела, за кои веруваат дека биле користени за складирање предмети на пониски температури.
Еден отвор од засводените простории води до цистерна, каде што жителите можеле да пристапат до ладна вода за пиење. Експертите велат дека сопствениците на вилата веројатно живееле просперитетен живот.
„Луксузниот имот и уникатните импресивни подземни сводови се доказ за богатството на сопственикот. Нивниот висок статус и богатство им овозможија да изградат луксузна вила која се користеше за живеење и забава“, се вели во соопштението на директорот на ископувањето, пренесе Денес.рс.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Амбасадорите на ЕУ и САД во Москва нема да присуствуваат на инаугурацијата на Путин
Амбасадорите на Европската Унија и Соединетите Американски Држави во Москва нема да присуствуваат на церемонијата на инаугурација на рускиот претседател Владимир Путин.
Портпаролот на ЕУ Петер Стано рече дека оваа одлука е во согласност со ставот на мнозинството земји-членки на блокот.
„Нашиот амбасадор нема да присуствува, повеќето земји-членки нема да присуствуваат“, рече Стано, а пренесе Ројтерс.
Портпаролот на Стејт департментот Метју Милер изјави дека американскиот амбасадор во Москва нема да присуствува на инаугурацијата на рускиот претседател.
Ројтерс вчера објави дека францускиот амбасадор во Русија ќе присуствува на инаугурацијата, за разлика од Германија која нема да испрати свој претставник.
Неименуван извор за агенцијата изјавил дека Париз претходно го осудил „контекстот на репресијата во кој се одржаа изборите, лишувајќи ги гласачите од вистински избор“, како и организирањето избори на украинските територии „окупирани“ од Русија, за кои Франција смета дека има прекршување на меѓународното право и повелбата на Обединетите нации.
Германија најави дека нема да испрати свој претставник на инаугурацијата на Путин.
Балтичките земји, кои веќе немаат дипломатски претставници во Москва, исто така категорично ја отфрлија можноста да присуствуваат на инаугурацијата на Путин.
Денеска ќе се одржи инаугурацијата на рускиот претседател Владимир Путин, со што и официјално ќе започне неговиот петти шестгодишен мандат.
Путин на претседателските избори во март освои 87,28 отсто од гласовите.
Свет
Автобус излета од патот и се преврте во Перу: најмалку 10 загинати меѓу нив и шестмесечно бебе
Најмалку 10 лица загинаа кога патнички автобус излетал од патот и се превртел во областа Пуно во јужниот дел на Перу, јавија локалните медиуми.
Меѓуградскиот автобус се движел на релација Пуно-Куско кога се случила несреќата, јави државната новинска агенција Андина.
Во автобусот имало 24 патници, а меѓу жртвите има и шестмесечно бебе, соопшти полицијата.
Државната телевизија Перу Нотицијас објави дека повредените, од кои некои се со сериозни повреди, биле пренесени во блиските болници.
Причината за несреќата ќе биде позната по истрагата.
Свет
Израел: Ја презедовме контролата на преминот Рафа, специјалните сили на терен
Израелската армија утринава соопшти дека ја презела оперативната контрола на палестинската страна на јужниот граничен премин Рафа во Газа, кој се граничи со Египет, и дека специјалните сили ја проверуваат областа.
Армијата соопшти дека од синоќа силите „оперираат“ во источниот дел на Рафа, каде што повеќето луѓе и некои меѓународни организации се евакуирани.
Во раниот утрински брифинг со новинарите беше речено и дека преминот Керем Шалом утрово е затворен од безбедносни причини и ќе биде отворен кога ќе дозволи безбедносната ситуација. Портпаролот на граничната служба во Газа изјави дека израелски тенкови се распоредени долж преминот Рафа.
Тројца хуманитарни извори за Ројтерс изјавија дека протокот на хуманитарна помош преку преминот е запрен.