Европа
Два реактори во нуклеарната централа Запорожје се исклучена од мрежата
Последните два активни реактори во украинската нуклеарна централа Запорожје, окупирана од Русија, беа затворени денеска откако пожар во близина ги оштети надземните далноводи, соопшти украинската државна енергетска компанија „Енергоатом“.
Пожарот избувнал во пепелниците на термоцентралата на јаглен во близина на нуклеарната централа Запорожје, најголемата во Европа. Пожарот, според информациите, ги оштетил линиите што ја поврзувале нуклеарната централа со украинската електрична мрежа, соопшти „Енергоатом“.
„Резултатот е дека последните две активни единици се исклучени од мрежата“ – додаваат од компанијата.
Оттаму нагласуваат дека безбедносните системи на нуклеарната централа функционираат нормално и дека се работи на приклучување на еден реактор назад во мрежата.
Москва и Киев со недели меѓусебно се обвинуваат за неколку бомбашки напади во близина на нуклеарната централа, која има шест реактори со вкупен капацитет од 6.000 мегавати и која од март е окупирана од руски војници.
Украина ја обвинува Русија дека складира тешко оружје во електраната, користејќи ја како база за напади врз украинските позиции.
Москва, од своја страна, негира дека поставила оружје во фабриката и тврди дека таму има само единици за одржување на безбедноста.
Русија, пак, ги обвинува украинските сили дека извршиле напади со беспилотни летала врз таа нуклеарна централа.
ОН повикаа на формирање на демилитаризирана зона околу електраната за да се гарантира безбедноста на локацијата и да се овозможи инспекциска мисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц ја откажа изборната кампања и ги посети поплавените региони во Германија
Германскиот канцелар Олаф Шолц денеска ги посети поплавените региони во западната германска сојузна покраина Сарланд, каде обилните дождови предизвикаа поплави и лизгање на земјиштето, а неколку згради беа евакуирани.
Шолц ја откажа својата изборна кампања во Сар, на границата со Франција, и наместо тоа, го обиколи делумно поплавениот пат во селото Клајнблитерсдорф заедно со регионалниот гувернер Анке Релингер.
Тој ја потврди солидарноста на сојузната влада со Сарланд.
„За жал, не е првпат да треба да се справиме со голема природна катастрофа, па ќе разгледаме што треба да се направи овде и што е неопходно“, им рече Шолц на новинарите.
Службите за итни случаи одговорија на илјадници повици за помош во главниот град на покраината, Сарбрикен.
Европа
Напаѓачот на Фицо доби мерка притвор за да не побегне и да не го повтори делото
Специјалниот кривичен суд во словачкиот град Пезинок, со силно полициско обезбедување денеска му одреди притвор на 71-годишниот Словак Јурај Цинтула, кој на 15 мај годинава во градот Хандлова со пет истрели го застрела премиерот Роберт Фицо и тешко го рани во стомакот.
Притворот за осомничениот е побаран поради опасност да не избега или да го повтори делото.
Осомничениот за нападот врз словенечкиот премиер Јурај Цинтула денеска призна вина.
Адвокатите предупредија дека признавањето на вината е спорно, бидејќи Цинтула веднаш по атентатот и апсењето бил сослушан во шок, без присуство на адвокат.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.