Македонија
Османи: Две години динамична дипломатија

Министерот за надворешни работи, Бујар Османи, денес, во просториите на Министерството за надворешни работи, одржа прес конференција во форма на отчет пред медиумите и јавноста за активностите во првите две години од неговиот мандат (2020-2022).
Во своето обраќање пред медиумите, Министер Османи потсети на петте приоритети кои јавно ги постави како своја мандатна мисија на првата прес конференција која ја одржа како шеф на дипломатијата и инфоримира за напредокот на сите поединечно. Станува збор за добрососедските односи, евроинтеграциите, учеството во регионалната стабилност како стабилен партнер на Соединетите Американски Држави и Европската Унија, засилување на економската дипломатија и про активност во мултилатералната дипломатија.
Министер Османи истакна дека Република Северна Македонија во овој период успеа да постигне позитивна промена во делот на надворешната политика, отпочнувајќи ги преговорите за членство во Европската Унија и отпочнување на стратешки дијалог со Соединетите Американски Држави. Воедно, потенцира дека земјата направи големи промени во регионални рамки наметнувајќи се како регионален лидер од аспект на промовирање добрососедска политика преку изнаоѓање решенија на долгогодишните отворени билатерални прашања, како и преку новостекнати регионални позиции и промовирање стабилност во регионот.
“Иако Протоколот се донесе низ голема политичка тензија и напнатост, неговото потпишување го сметам за најважниот и најголемиот успех во изминативе две години- и за мене, и за дипломатијата и за државата!“, рече Министер Османи.
Како најважен автентичен придонес во создавањето на регионалните политики на земјата го истакна Преспа форумот за дијалог, кој се наметна како најважна регионална конференција, потенцирајќи: “Република Северна Македонија ја ставивме на мапата на земји кои во светот на дипломатијата се препознаваат како земји кои активно придонесуваат во зајакнувањето на меѓународните односи”.
Министерот ја спомна и иницијативата Б6, која претставува неформална група за брза комуникација меѓу министрите за надворешни работи на земјите од Западен Балкан; стратешкиот дијалог со САД што претставува нова пресвртна точка на нашето стратешко партнерство; продуктивната улога во рамките на НАТО алијанската, каде во целост го имаме оправдано нашето партнерство со сојузниците; и како еден од најголемите резултати во овие две години, дипломатскиот успех да обезбедиме поддршка за нашето претседавање со ОБСЕ во 2023 година и во тој контекст овогодинешното претседавање со Медитеранската конференција која преставува платформа за партнерство меѓу ОБСЕ и земјите од Медитеранот, т.е. земјите од Северна Африка и Блискиот исток.
Во рамки на економската дипломатија, ги спомна упатувањето на четирите економски советници во бизнис таргетирани дипломатско конзуларни претставништва: Анкара, Абу Даби, Варшава и Минхен, како и учеството во организација на најголемата светска манифестација Дубаи Експо 2020, која беше Донација од Абу Даби, и учеството на Осака Експо 2025, што Министерот исто така успеа да го обезбеди како донација од домаќинот при посетата во Јапонија.
Министер Османи за оваа прилика подготви и извештај во кој се собрани уште многу детали од работата во изминатите две години: од отворање на новата амбасада во Братислава до проектите за дијаспората, како што е М-каратата, и многу важниот проект за нашите граѓани во странство, употребата на мобилните станици за издавање патни исправи. “Има секако многу проекти, многу политики, многу реформи, и јас сум навистина задоволен и од сработеното и од постигнатите резултати. Ова е само половина од мандатот, продолжуваме со исто тепмо и во следните две години“ заврши Министерот Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Признанија за најдобрите ученици од општина Илинден

Градоначалникот на општина Илинден Александар Георгиевски приреди прием за учениците од општинските основни училишта кои освоија високи места на државните натпревари и им додели признанија за постигнатите резултати.
Градоначалникот им ги честиташе успесите на учениците и нивните ментори и истакна дека е горд што има голем број наградени ученици од општина Илинден. Тој додаде дека локалната самоуправа посветено цели да ги промовира и поттикнува постигнатите успеси и достигнувања на учениците од општината.
На вкупно 20-тина ученици и нивните ментори и годинава им беа доделени признанија за постигнатиот успех, што претставува признание за трудот на наградените, но и мотив за останатите. Учениците беа наградени за високи достигнувања на државните натпревари по македонски јазик, англиски јазик, биологија, природни науки, како и на натпреварот по Информатичко размислување, велат од Општината.
Македонија
(Фото) Герасимовски: Граѓаните со големи пофалби за новоизградената градинка Пролет

Вчера, во рамки на караванот „Се гледаме во маало“, градоначалникот Горан Герасимовски се сретна со жителите на населбата Пролет, каде пред само еден месец беше отворена најубавата и најмодерната градинка „Пролет“ во Македонија.
Жителите на оваа населба упатија големи пофалби за новоизградената градинка, прва и единствена во Пролет која претставува вистински пример за современа детска заштита. Изградена според највисоки светски стандарди, со целосно нова, безбедна и инклузивна средина, таа денес е гордост на целата општина, велат од Центар.
„Овие маалски средби ни се многу важни, тие се можност директно да го слушнеме мислењето на граѓаните, нивните идеи, предлози и предизвици. Затоа и го правиме овој караван, затоа што општината не треба да чека граѓаните да дојдат кај нас, туку ние треба да одиме кај нив и да работиме исклучиво во нивен интерес“, изјави Герасимовски.
Средбата се одржа на маалско игралиште кое беше опремено од градоначалникот Герасимовски, каде што децата безгрижно растат, учат и се дружат. Центарци го поздравија континуираниот развој на Центар, во изминатиот период беа реконструирани 20 улици, подобрени беа условите во сите градинки и основни општiски училишта, а есенва ќе биде пуштена во употреба и реконструираната спортска сала „Работнички“, уште еден капитален проект во интерес на граѓаните, соопшти Општината.
Македонија
Оставки од Тошковски и Јанев и кривична одговорност, бара СДСМ

Последната акција на ОЈО ГОК потврди сè. СДСМ ја говореше вистината за Кочани од првиот ден.
Уапсените полициски службеници вчера се лица кои СДСМ ги објави во серијалот „Вистината за Кочани“ како директно одговорни за дозволување на нелегалното работење на „Пулс“, велат од опозициската партија.
„Благодарение на објавените факти и притисокот, конечно се постапува. Но, останува фактот дека четири месеци директорот на Бирото за јавна безбедност Александар Јанев, министерот Панче Тошковски и целиот врв на ВМРО-ДПМНЕ се обидуваа да ги заштитат и да ја прикријат одговорноста.
Тие бранеа и криеја свои функционери, ја лажеа јавноста и вршеа притисоци врз Обвинителството за да не се постапува против нивните кадри кои се докажано директно одговрни за пожарот во кој изгореа 62 деца“.
Според СДСМ, Александар Јанев, како прв човек на БЈБ, има директна одговорност за своите подредени. Тој, како што велат, ги поставил, тој давал наредби и затоа додаваат дека мора да понесе оставка и да следи кривична одговорност.
„Истото важи и за Панче Тошковски, кој целиот период ја штитеше структурата во полицијата и тврдеше дека нема вина.
Христијан Мицкоски, пак, со недели ја користеше трагедијата за политички напади, обвинувајќи ги сите, освен оние што ги поставил на функција. Ги лажеше родителите, ја манипулираше јавноста и се обидуваше да ја задуши вистината.
Без одговорност за Јанев, Тошковски и Мицкоски, нема целосна правда. А правда за Кочани мора да има“, потенцираат од СДСМ.