Македонија
(Видео) Стоилковски: Имотот на пратеничката Зајкова легализиран со лажна изјава?
Огромен криминален скандал повторно е поврзан со владејачкото мнозинство во Парламентот. Моника Зајкова, пратеник од редовите на ЛДП, верен гласач на законите на СДСМ, според анкетниот лист која што го поднела до Антикорупциска комисија, пријавила семеен имот, имот на родители, куќа од 119 м2 во село Трница, во делот на националниот парк Маврово. Стекнат на друг начин, како што стои во анкетен лист, изјави на денешната прес-конференција, Наум Стоилковски, портпарол на ВМРО-ДПМНЕ.
Тој истакна дека според новинарски текст, имотот на Маврово, во Трница, е криминално легализиран. Објектот кој што стои на имотниот лист на Моника Зајкова бил изграден по донесувањето на законот за легализација и со тоа е без основа за легализација. Според новинарското истражување објавено во јавноста, Зајкова поседува имот легализиран врз основа на лажна изјава, односно изјава за времето кога објектот бил граден, односно изјава со која што се тврди дека објектот бил граден пред 3-ти март 2011 –та година како основа за негова легализација.
Стоилковски побара од Зајкова, како пратеник во Парламентот е должна јавно, јасно и прецизно да одговори:
Дали поседува семејна вила во Трново, Маврово како што навела во анкетниот лист? На кој начин е стекната таа вила? Кога таа вила е изградена? Дали е легализирана согласно Законот за легализација? Дали е поднесена изјава за времето на градење со документите за легализација, изјава којашто подлежи на морална и кривична одговорност и со која што се гарантира вистинитоста на исказот?
Македонија тоне во кризи, половина милион луѓе живеат со помалку од 150 денари на ден, а гласачите токму на тие штетни закони, закони што ја потонаа Македонија единствено се грижат за лични богатења и удобства. Моника Зајкова е пратеник врз којшто почива оваа антимакедонска, антинародна власт во Македонија!
Не е важно што Македонија е во криза, народот е се посиромашен, што нема за струја, и нема за леб, а и се соочува со брутална асимилација. Важно Зајкова, верен гласач на СДСМ во Парламентот, ужива во луксузи, ужива во дивоградба, сега легализирана вила на Маврово.
Ова мора да има крај,изјави Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Зголемување на водостојот и излевање на Крива Река во село Опила
По добиената пријава во ЦУК, за зголемување на водостојот и излевање на Крива Река во село Опила во општина Ранковце, Секторот за операции и координација на ЦУК преку Регионалниот центар за управување со кризи Крива Паланка, веднаш ги извести Општина Ранковце и побара да се излезе на лице место и да се направи увид во состојбата.
ЦУК известува, по направениот увид од страна на Општина Ранковце, дека во еден дел околу мостот, за којшто е добиена пријавата, има излевање на реката на околните земјени патеки. Конкретно под вода е една нива и импровизирано игралиште. Причината за ваквата состојба е констатирано дека најверојатно е нерасчистеното корито од бујната распространетата вегетација.
Мерки за расчистување општина Ранковце ќе преземе веднаш по смирување на водата во речното корито и повлекување на истата, на веќе дефиниран простор, известува ЦУК.
Македонија
Вицегувернерката Митреска на Состанокот на БИС: Политиките на централната банка овозможуваат стабилизација на инфлацијата и зајакнување на отпорноста на банкарскиот систем
Мерките за справување со инфлацијата, коишто ги презема Народната банка, истовремено придонесоа и за дополнително јакнење на отпорноста на банкарскиот сектор, посочи вицегувернерката Ана Митреска, во дискусијата на 23. состанок на Банката за меѓународни порамнувања (БИС) за монетарната политика во Централна и Источна Европа.
Народната банка презема повеќе мерки за стабилизирање на инфлацијата. Покрај промената на основната камата, централната банка делуваше и преку операции на девизниот пазар, промени кај инструментот задолжителна резерва и преку макропрудентните мерки. „Макропрудентните мерки во основа беа користени за да се зголеми отпорноста на банкарскиот систем, но исто така претставуваа и поддршка на затегнувањето на монетарната политика во борбата против инфлацијата. Во неколку наврати беше зголемен контрацикличниот заштитен слој на капиталот на банките и беа воведени макропрудентни инструменти за квалитетот на кредитната побарувачка од физичките лица. Податоците покажуваат дека многу земји применија макропрудентни мерки, не само за задржување на финансиската стабилност, туку и за поддршка на монетарната политика. Во Европа, на пример, од почетокот на 2020 година досега, контрацикличниот заштитен слој на капиталот е зголемен од 0,25 п.п. до 2,5 п.п.“, посочи вицегувернерката Митреска.
Примената на комбинација на различни мерки за борба против инфлацијата беше значајно за задржување на финансиската стабилност. Историските податоци покажуваат дека при епизоди на раст на каматните стапки, можна е појава на ризици за финансиската стабилност. „Сепак, сегашниот циклус на монетарно затегнување беше придружен и со низа макропрудентни мерки, преку коишто се спречува појава на финансиски стрес“, посочува вицегувернерката Митреска. Притоа, таа истакна дека резултатите од стрес-тестовите за ефектите од зголемувањето на каматните стапки врз портфолиото на домашниот банкарски сектор покажале дека банките се добро подготвени за да ги надминат евентуалните предизвици, како и дека досега нема остварување на ризиците. Сепак, посочува дека поради постојана неизвесност, и централните банки, и банкарскиот систем во целина треба да се внимателни и подготвени за соодветна реакција во случај на нови шокови.
Македонија
Граѓаните на Куманово да не ја користат водата за пиење од Водоводот, алармира ЦУК
Денеска, до Центарот за управување со кризи до Секторот за операции и координација е побарана координација помеѓу институциите заради надминување на голем проблем за водоснабдување на градот Куманово.
Имено, по вчерашните обилни поројни врнежи од дожд и град во Липковскиот регион е предизвикано зголемување на нивото на Липковска Река, што има влијание на системот за водоснабдување – на филтер станицата на ЈП Водовод Куманово. Според информација од одговорното лице на филтер станицата се работи за количина на над 10.000 m3 заматена вода што влијае на процесот на прочистување и испорака на истата до граѓаните. Од тие причини, во моментот е појавена заматеност на водата во цевководниот преносен систем и е прекината дистрибуцијата до граѓаните, што најверојатно ќе трае во текот на целиот денешен ден, а по потреба, се до моментот на надминување на состојбата, известува ЦУК.
Од Центарот за управување со кризи, веднаш е побарано инспекциските служби и Центарот за јавно здравје од Куманово да излезат на лице место, направат увид, земат мостри за анализа и донесат соодветно решение за понатамошна постапка. Истовремено е известена и Општина Куманово за понатамошна постапка, во насока преземање мерки и активности за надминување на состојбата во интерес на граѓаните, а во моментот е воспоставена е комуникација со медиумите заради известување кон граѓаните на Куманово, соопшти ЦУК.
Најавено е дека во 12.00 часот ќе заседава Општински штаб со сите претставници од институции во Општина Куманово