Македонија
ВМРО-ДПМНЕ: Бектеши призна дека владата толерира неплаќање на струја и криминал
Скандалозна е изјавата на министерот за економија Крешник Бектеши со која го правда крадењето на електрична енергија и се релативизира овој криминал. Да кажеш дека во Арачиново се краде само 10% од целата струја која што се краде во Македонија е бесрамно и доколку бевме нормална држава тој веќе ќе се збогуваше со министерската и политичката кариера. Всушност Бектеши признава дека владата толерира неплаќање на струја и криминал, соопшти ВМРО-ДПМНЕ.
„ Според информациите на медиумите само во Арачиново се „крадело струја“ во износ од над 6 милиони евра годишно, а овие загуби потоа ги плаќаат сите. Само една трафостаница во Арачиново покажува 96,1 отсто украдена струја, а речиси сите останати имаат над 50%. Владата е должна да одговори каде и колку се краде струја во Македонија и да ги санкционира сите, бидејќи нивниот криминал го плаќаат оние кои што редовно ги подмируваат сметките.
Наместо преговори и договарања за очигледна злоупотреба, треба да има пријави, а во исто време и истрага кој дозволувал и толерирал вакво поведение. Ги повикуваме надлежните органи да го испитаат овој случај, а прв кој треба да даде исказ е самиот министер кој треба да ги даде сите информации каде и колку струја се краде во Македонија, штом веќе ги знае.
Ова е уште еден доказ дека криминалот на поединци и функционери од власта се причината поради која народот плаќа поскапа струја. Поради криминалот и корупцијата Македонија е земја во која некои се богатат на грбот на огромното мнозинство граѓани кои осиромашуваат. Власта е генераторот на кризи и криминал во Македонија и за тоа мора да понесат одговорност“ се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).
Македонија
Сиљановска Давкова – Павловски: Максимално да се искористат сите можности за економски развој на земјава
Претседателката Гордана Сиљановска Давкова остварила средба со Крис Павловски, директор на водечката светска компанија за дигитални платформи Рамбл, кој е во посета на земјата во рамките на конференцијата Македонија 2025.
На средбата, како што соопшти претседателскиот кабинет, Павловски ја претставил работата на Рамбл, компанија која котира на индексот Наздак на берзата во Њујорк, со нејзината етаблирана видео платформа и е во подем во дејноста на развојот на дигиталната инфраструктура и клауд услугите.
Како водечки претприемач со македонско потекло, Павловски изнел мислења за состојбата во дигиталниот сектор, за трендовите и перспективите кои може да се искористат.
Претседателката Сиљановска Давкова го информирала Павловски за нејзината иницијатива за развивање на соработката со македонската дијаспора, со цел максимално да се искористат сите можности за економски развој на земјава.
Македонија
Кадровски промени на Водно, правникот Божинов и новинарот Момировски ќе раководат со претседателскиот кабинет
Претседателката на Македонија Гордана Сиљановска Давкова за генерален секретар на својот кабинет го именувала Ѓорѓи Божинов, пратник кој работел во Министерството за земјоделство, а за негов заменик новинарот Горан Момировски.
Од функциите се разрешени генералниот секретар Миле Бошњаковски и неговите заменици Билјана Радева и Тоше Зафиров, кои беа ангажирани во мандатот на доскорешниот претседател Стево Пендаровски.
Генералниот секретар Ѓорги Божинов е дипломиран правник со речиси тридецениско работно искуство во областа на правото во земјоделскиот сектор, законодавната и институционалната рамка, процесите на јавни набавки, корпоративно советување, програмите за финансиска поддршка, државна помош, како и примена и хармонизација на легислативата на Европската Унија во овие области.
Претходно, Божинов својата кариера во областа на правото ја остварува на раководни административни позиции во Министерството за земјоделство, шумарство и водостопанство.