Економија
Во Австрија претставена кампањата за штедење: ладен туш, дебели чорапи, заштеда на струја?
Австриската министерка за енергетика и заштита на животната средина, Леоноре Гевеслер, во присуство на министерот за економија, Мартин Кохер, и главниот секретар на компанијата Austrian Energy, Барбара Шмит, и директорот на австриската агенција за енергетика, Франц Ангерер, денеска на прес-конференција во Виена ја претстави кампањата на федералната влада за заштеда на енергија, наречена „Мисија 11“, пренесуваат медиумите.
„Денеска, ја почнуваме ‘Мисијата 11’ и се надеваме дека што повеќе луѓе ќе се приклучат“, рече Гевеслер додавајќи:
Целта на „Мисијата 11“ е мала промена во нашето однесување со цел да заштедиме во просек 11 отсто енергија. Поточно, овој процент на заштеда се очекува од секое австриско домаќинство. Затоа е наречена „Мисија 11“, а во неа има низа инструкции или препораки на Владата како да се заштеди енергија, пишува „Вечерњи лист“.
Владината кампања препорачува Австријците повеќе да не се капат во кади и да се тушираат со поладна вода, односно ако водата е топла, тогаш значително пократко од порано бидејќи една минута пократко туширање, како што се истакнува, носи заштеда на енергија од 20 проценти. Тогаш греењето треба да се намали најмалку два степена. Така, наместо греење, дебели чорапи, пишуваат медиумите.
Во јавните установи греењето ќе биде ограничено на 19 степени во зима во Австрија. Исклучок се училиштата, градинките, болниците и домовите за стари лица. Што се однесува до електричната енергија, се препорачува продолжениот кабел со повеќе приклучоци, односно уреди, да се исклучи од напојувањето, дури и кога не работат, туку се во состојба на подготвеност бидејќи на тој начин се заштедува 10 проценти од електричната енергија, со оглед на тоа што просечно австриско домаќинство има 20 уреди. Биле дадени и низа инструкции како да се заштеди енергија при миење садови и алишта, но и при префрлување од обични и халогени на ЛЕД-светилки, со напомена дека со тоа се заштедува дури 94 проценти струја, стои во написите.
Во однос на струјата било одлучено осветлението на јавните објекти да се исклучи по 22 часот. Исклучок е уличното осветление поради јавна безбедност. Она што исто така се препорачува, а што особено ќе ги алармира сопствениците на автомобили, е упатството да забавуваат во градот за да штедат гориво и да не возат побрзо од 100 км/ч на автопати, а 80 км/ч на обични патишта, со напомена дека ќе заштедат до 24 проценти гориво. Исто така, се очекува возачите да се префрлат од возење автомобили на јавен превоз и велосипеди на пократки растојанија. Сè што е во екопрограмата, како и машини за перење и за садови.
Презентирајќи ја владината кампања за заштеда на енергија, Гевеслер изјавила:
„Путин сака да нѐ уценува и да нѐ омекне. Не можеме едноставно да гледаме како се убиваат луѓе во Украина. Тоа е и војна против нашиот западен модел на живеење“, истакнала австриската министерка.
Ги повикала сите Австријци да се приклучат на владината кампања за заштеда на енергија за секој што побезболно да ја преброди претстојната зима.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Меџити на отворањето на Инвестициско-трговски форум меѓу Македонија и Турција: турските инвестиции помогнаа во развојот на инфраструктурата и отворањето работни места
Првиот потпретседател на Владата и министер за животна средина и просторно планирање Изет Меџити денеска учествуваше и имаше oбраќање на отворањето на Инвестициско-трговскиот форум меѓу Северна Македонија и Турција.
Меџити го оцени како значаен овој настан организиран од Инвестициско-трговскиот форум меѓу Северна Македонија и Турција, како одлична можност уште еднаш да се истакнат силните врски меѓу Северна Македонија и Турција, а особено големиот потенцијал напред, заснован на многу пријателските односи.
„Економската соработка меѓу нашите две земји донесе бројни придобивки, додека турските инвестиции во Северна Македонија помогнаа во развојот на инфраструктурата и отворањето работни места, придонесувајќи за стабилноста и економскиот раст на Скопје, Тетово, Гостивар и Северна Македонија во целина“, изјави Меџити.
Оцени дека интересот на нашите бизниси да ги искористат можностите на турскиот пазар е голем, додека инвестициите од Турција се охрабрувачки и модел како се развива вистински бизнис.
“Во овој контекст, Форумот за инвестиции и трговија игра клучна улога, бидејќи нуди платформа за размена на идеи, искуства и за создавање нови врски. Тоа е одлична можност да се истражат можностите за соработка во различни сектори, од градежништво и производство до технологија и услуги“, рече Меџити.
На Форумот присуствуваа бизнисмени од Турција и Македонија, претседатели на стопански комори, пратеници и амбасадори.
Економија
Потпишан нов договор за соработка меѓу Народната банка и Државниот завод за статистика
Квалитетната статистика е клучна за процесот на носење добри одлуки и за водењето солидни економски политики. Оттаму, функционалниот статистички систем и соработката помеѓу институциите од тој систем се од суштинско значење за осмислувањето на јавните политики, но и за носењето деловни одлуки од приватниот сектор.
Потпишувањето на новиот договор за меѓусебна соработка и размена на податоци и публикациски материјали помеѓу Народната банка и Државниот завод за статистика, со кој понатаму се унапредува досегашната соработка на овие две институции, е од особено значајно за функционалноста и ефикасноста на домашниот статистички систем, којшто го исполнува највисокиот статистички стандард за дисеминација на податоците на Меѓународниот монетарен фонд – СДДС плус. Со новосклучениот договор се проширува опфатот на податоците коишто се разменуваат, се олеснува и се осовременува начинот на таа размена, а истовремено се скусуваат и роковите за доставување податоци. Сето ова ќе придонесе за исполнување на статистичките барања на европските и меѓународните институции и подготовка на квалитетни, веродостојни и навремени статистички податоци. Договорот за соработка во име на институциите го потпишаа гувернерката на Народната банка, Анита Ангеловска-Бежоска и в. д. директорот на Државниот завод за статистика, Дејан Станков.
На средбата беше истакнато дека во изминатиот период, следејќи ги глобалните статистички трендови и меѓународните иницијативи, националната статистика е надградена со нови податоци, како и дека подготовката и дисеминацијата на статистичките податоци е во согласност со најновите европски и меѓународни стандарди. Беше посочено и дека секој учесник има своја улога и одговорност во производството на статистики од својот домен на работење, затоа координацијата и усогласеноста на сите чинители во статистичкиот систем е предуслов за исполнување на целите и обврските на овие институции.
Економија
Зеколи Шаќири: Патниот транспорт е важна алка во синџирот на економијата за целата држава, за следната година го зголемивме бројот на ЕКМТ дозволи
Заменик министерката за транспорт, Калтрина Зеколи Шаќири денеска присуствуваше на традиционалната средба со превозници организирана од страна на асоцијацијата МАКАМ – ТРАНС.
Заменик министерката во својот говор пред траспортерите го истакнa огромното значење на патниот транспорт во развојот на економијата на државата. Таа, исто така додаде дека Министерството за транспорт оваа година воведе нов систем за распределба на ЦЕМТ дозволите.
„За нас како Влада и како Министерство, развојот на оваа дејност, развојот на вашите компании и зачувување на работните места се многу важни во одржување на стабилноста во економијата и затоа преземаме иницијативи и активности да обезбедиме непречен и континуиран транспорт.
Веќе знаете дека министерството разви нов систем за распределба кој е поефикасен, надрграден од претходниот и систем кој е интероперабилен и за прв пат е поврзан со Агенцијата за вработување и Централниот регистар.
Би ја искористила приликата да информирам и за бројот на транспортните дозволи за следната година за кои знам дека интересот е најголем.
За наредната 2025 година имаме зголемување на бројот на дозволи така што на располагање имаме 1.750 годишни ЦЕМТ дозволи што е за 70 дозволи повеќе отколку оваа година. Во однос на месечните, за 2025 година на располагање имаме 2.736 месечни ЦЕМТ дозволи и тоа за ЕВРО 5 имаме 720 дозволи, а за ЕВРО 6 имаме 2016 дозволи“, истакна заменик министерката Зеколи Шаќири.
Таа пред транспортерите најави дека министертвото и во наредниот период ќе продолжи со преговори со неколку држави околу зголемувањето на квотите на дозволите.