Македонија
Трифун Костовски со поддршка за Арсовска: ВМРО-ДПМНЕ не смее да ги прави истите грешки од минатото
По актуелните случувања поврзани со градоначалничката Данела Арсовска, се огласи и поранешниот градоначалник на Скопје, Трифун Костовски.
Тој застана во одбрана на Арсовска и ја повика ВМРО-ДПМНЕ да ја поддржи градоначалничката, при што направи споредба со него кога тој бил градоначалник на Скопје со поддршка на истата партија.
„Флуидот што долго се чувствуваше во етерот дека има недоразбирање на релација градоначалник на град Скопје, Данела Арсовска, и најголемата опозициска партија ВМРО-ДПМНЕ, која застана зад нејзината кандидатура, се појави на насловните страници на дневната политика, што објективно јас и го очекував. Со госпоѓата Арсовска имав една средба и во целиот нејзин мандат ја следам со голем интерес и внимание. Немам сомнеж дека нејзиното доаѓање на кормилото градоначалник на град Скопје е направено со најчесни намери. Ова сакам да го споделам со јавноста како поранешен градоначалник на град Скопје, а исто така и јас се кандидирав како независен кандидат поддржан од партијата ВМРО-ДПМНЕ и каде што на идентичен начин по неполна година од мојот мандат дојде до комплетно разидување. Разликата меѓу мене и Арсовска со политичката партија ВМРО-ДПМНЕ е во тоа што тогашната ВМРО-ДПМНЕ на чело со господинот Никола Груевски дојде на власт веднаш по локалните избори. Денешната ВМРО-ДПМНЕ, предводено од господинот Мицкоски, е во опозиција и грчевито се бори за предвремени избори како би дошле на власт бидејќи незадоволството од владејачката гарнитура е сеопшто познато. Убеден сум дека разидувањето меѓу Арсовска и ВМРО-ДПМНЕ е во фактот кој треба да го води градот Скопје – дали Арсовска или ВМРО-ДПМНЕ. Во мојот случај јас не дозволив ВМРО-ДПМНЕ предводена од Никола Груевски истовремено да биде и градоначалник на град Скопје, односно да бидам пион во рацете на ВМРО-ДПМНЕ.
Госпоѓата Арсовска, која е избрана за градоначалник на град Скопје на редовни избори, е единствена повикана да го води градот Скопје. Партијата ВМРО-ДПМНЕ, подржувајќи ја нејзината кандидатура, мораше да испорача и луѓе со капацитет да може да ги водат јавната адмнистрација и јавните претпријатија. Жалосно е што луѓето што се поставени на позиција од страна на госпоѓата Арсовска не одговараат пред градоначалникот, туку одговараат пред партијата што ги има предложено. На овој план мора потемелно да се доизградат односите меѓу партијата ВМРО-ДПМНЕ и госпоѓата Арсовска бидејќи овие два субјекта треба да работат во интерес на граѓаните. Убеден сум дека вистинската поддршка на госпоѓата Арсовска од страна на ВМРО-ДПМНЕ ќе ѝ беше како мелем на рана бидејќи сум свесен што таа наследи долгови што Градот ги има кон фирмите со кои соработува. Буџетот на Арсовска на годишно ниво е 70 милиони евра, а наследи ненамирени обврски од 170 милиони евра. Во ваква консталација ВМРО-ДПМНЕ треба на висина на своето место и улога во нашето секојдневие да ја поддржи во нејзините настојувања за реализација на нејзините проекти, ама без никакви матни зделки, тендери и заткулисни игри. Буџетската дупка од 170 милиони евра мора да се затвори, а за таква работа е потребна посветеност и, секако, елиминирање на сите можни коруптивни и криминални дејства во сите институции на Градот. Упатувам на разум, пред сѐ, од партијата ВМРО-ДПМНЕ да се преиспита себеси и да ѝ даде вистинска поддршка на госпоѓата Арсовска бидејќи во дадената ситуација јас сум паталец од причини познати, само тогаш на господинот Груевски и неговата партија, култниот проект за изградба на „Кермес“ и ден-денеска стои како авет во центарот на Градскиот парк иако овој проект е финален, уплатени се сите комунални давачки и почнат е со градба, ама и денеска е објект без тапија, со најпрости зборови кажано – маркичката за „Кермес“ е избришана од ДУП-от на Општина Центар во време на владението на Никола Груевски и до ден-денес таа не е вратена. Тоа е мојата цена на непослушност кон Груевски. Ги поминав сите судски инстанции во Македонија барајќи ја правдата и на крајот со одлука на Врховниот суд на Република Македонија ми е вратена дозволата за градба, ама маркичка нема.
ВМРО-ДПМНЕ не смее да ги прави истите грешки од минатото, особно не денес кога сите граѓани на Република Македонија се пред голема неизвесност поврзана со енергетската и социјалната криза. Госпоѓата Данела Арсовска ја поддржувам во нејзините настојувања да биде вистински домаќин на Град Скопје“, наведува Костовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Безбедно пронајдени и евакуирани граѓани од височините на Осоговските планини
Денеска, во 16.15 часот од лицето за контакт од Доброволнота спасувачка служба „Осогово“ Кочани, ЦУК добил известување дека неколку лица враќајќи се од настан на „Царев Врв“ на Осоговски планини имале дефект на возилото и истите побарале помош.
Даден бил совет лицата да се јават на бројот 112 за да се утврди нивната локација.
Откако се лоцирани, лицата биле пронајдени во добра состојба и истите со возило на ДСПС „Осогово“ се вратени во викенд населба ,,Пониква”.
Нивното возило заради дефект е оставено на местото каде се најдени и дополнително ќе го отстранат сопствениците, информираат од ЦУК.
Македонија
Сиљановска Давкова со италијанскиот претседател Матарела: побарани гаранции за европските интеграции
Претседателката Гордана Сиљановска Давкова во рамки на посетата на Италијанската Република денеска оствари средба со италијанскиот претседател Серџо Матарела.
На средбата, претседателката изрази задоволство што нејзината прва посета на земја членка на ЕУ и НАТО е во Италија, што претставува потврда за пријателските односи меѓу двете земји и истакна дека ќе се залага за натамошно унапредување на политичкиот дијалог и интензивирање на севкупните билатерални односи на македонската со Италијанската Република.
Двајцата соговорници разменија мислења за предизвиците на македонскиот евроинтегративен процес при што претседателката упати благодарност за досегашната италијанска поддршка на политиката на проширување на Европската Унија, како и за позитивниот однос при надминување на меѓусоседските спорови при приемот на нови членки во Унијата. Со цел одржување на кредибилноста на процесот на проширување, почитување на меѓународното право и универзалните демократски вредности, Сиљановска Давкова изрази надеж дека Италијанската Република и во иднина ќе го поддржува мериторниот процес на исполнување на Копенхагенските критериуми во однос на евроинтеграциите. Воедно, таа изрази подготвеност за соработка со цел доследна реализација на сите неопходни реформи во клучните области кои беа нотирани од страна на Европската Комисија.
Како НАТО сојузници, на средбата беше потврдена подготвеноста за продолжување на одбранбената соработка и меѓусебна поддршка во однос на надминување на актуелните безбедносни предизвици на европскиот континент. Во таа насока, беа разменети мислења околу политичките состојби и отворените прашања на Западниот Балкан, коишто се од интерес за безбедноста и стабилноста на поширокиот регион.
Посочувајќи дека Италија е наш значаен трговски партнер, Сиљановска Давкова искажа интерес за засилување на постоечките и изнаоѓање на нови можности за продлабочување на економските односи и проширување на соработката во областа на туризмот, политиките за млади и спорт, како и на креативната индустрија.
Во изјава за медиумите таа ја оцени средбата како плодна и конструктивна, на која претседателот Матарела ја потврдил заложбата на Италија да го поддржува регионот и да нè поддржува нас во секој поглед, не само во евроинтеграциите туку и во економијата, образованието, културата, одбраната, како и италијанското и нашето членство во меѓународни организации.
„Јас побарав од италијанскиот претседател и од Италија, на нашиот натамошен пат да помогнат околу давање гаранции, гаранции за нашата европска политичка иднина, на што тој одговори дека е спремен да застане зад нас, се разбира во барањето на решенијата со соседите, рече Сиљановска Давкова, нагласувајќи дека италијанскиот претседател изразил длабоко разбирање за направените жртви во процесот на евроинтеграциите.
„Постигнавме согласност или се согласивме дека европските стандарди треба да се почитуваат од сите и од оние надвор, како нас, но и од оние внатре“, истакна претседателката со италијанскиот претседател Матарела.
Претседателката Сиљановска Давкова престојува и ја предводи државно-црковната делегација во посета на Италијанската Република и Светиот Престол по повод манифестацијата „Македонија во чест на Св. Кирил“.
Сервисни информации
АМСМ: Сообраќајот се одвива непречено, на граничните премини нема подолги задржувања
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.