Македонија
(Видео) Ковачевски: Реформски ја унапредуваме јавната администрација, за подобри услуги за граѓаните и компаниите
Реформата на јавната администрација претставува еден од клучните приоритети и е важен предуслов во процесот на европската интеграција на Република Северна Македонија. Таа е опфатена во првиот Кластер, „Основи”, кој е од суштинско значење за динамиката на преговорите во целина. Токму затоа, ние, како земја која ги почна преговорите со Европската Унија, на овие реформски процеси гледаме како на клучни за развојот и динамиката на процесот на пристапување, порача премиерот Димитар Ковачевски на Министерската конференција на Западен Балкан за реформи во јавната администрација, која во Скопје ја организираа СИГМА/ОЕЦД и Регионалната школа за јавна администрација (РеСПА).
„Северна Македонија постави добри основи и остварува напредок во овој сегмент, што е и нотирано во Извештајот на Европската комисија, Извештајот од спроведениот мониторинг од страна на СИГМА, како и Заклучоците на Специјалната група за реформите на јавната администрација, за 2021 година.
Овие документи покрај тоа што даваат реална и објективна слика на постигнатиот напредок, детектираат и области кои бараат дополнителни реформи со цел да се усогласиме со стандардите на Европската Унија. Со динамично темпо се справуваме со предизвиците што се пред нас, не само во насока на официјалното започнување на преговорите за пристапување во Европската Унија, туку и во континуираната заложба да обезбедиме модерна и ефикасна јавна администрација базирана на дигитализација која обезбедува квалитетни и брзи услуги за граѓаните и компаниите.
Дигитализацијата сама по себе не е исклучиво техничко-технолошки, туку е и општествен процес и препознавајќи ја значајноста на истата, ние како Влада ја продолжуваме силната политичка посветеност на процесот на реформите на јавната администрација.
Иако поради пандемијата бевме соочени со големи предизвици врзани со спроведувањето на Стратегијата за реформа на јавната администрација, сепак, процесот на реформа не запре. Тоа ни дава мотив да останеме посветени на реформскиот процес, но и на унапредување на сегментите кои ќе овозможат поефикасна администрација која ќе одговара на потребите на граѓаните.
Во оваа насока, Министерството за информатичко општество и администрација подготвува нов осумгодишен стратешки документ за реформа на јавната администрација, а Советот за реформа на јавната администрација продолжува да работи со континуирана политичка посветеност за остварување на заложбата за ефикасна, продуктивна и професионална јавна администрација“, изјави Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Орбан го пукна балонот на СДС, парите за кредитот се европски, а не кинески
Орбан го пукна балонот на СДС, парите за кредитот се европски, а не кинески. СДС со денови и месеци шири лаги дека парите од унгарскиот кредит се кинески, сега сите нивни лаги се распрснаа. Богданка Кузеска велеше: „Парите за унгарскиот кредит се всушност кинески пари”, велат од ВМРО-ДПМНЕ.
„Вчера премиерот на Унгарија, господин Виктор Орбан јасно кажа: ” Она што се однесува до заемот, кинески заем не можеме да даваме, кинески пари не можеме да даваме. Бидејќи ние со Кина имаме договор сите пари кои доаѓаат од Кина одат на конкретни проекти за развој во Унгарија. Значи кинески пари не можеме да даваме, европски пари можеме и тие ќе ви ги даваме.” Условите од кредитот се исклучително поволни за Македонија. Со каматна стапка од 3.2%, ги добиваме најдобрите услови на пазарот моментално. Дополнително рокот за отплата е 15 години, од кои 3 години се грејс период. Стопанството ќе добие 250 милиони евра од тие пари по истите услови по кои и зема државата. Општините ќе ги добијат остатокот од 250 милиони евра, кои ќе бидат наменети за капитални проекти. СДС се противи на развојот, СДС сака Македонија да стагнира, затоа се против Унгарскиот кредит, а во истовреме се и лицемерни, затоа што нивните градоначалници први поитаа да конкурираат за парите кои ќе ги дава владата. СДС се прочитана книга. Македонија економски ќе се трансформира и тоа СДС не може да го запре“, велат од партијата.
Македонија
Министерот за јавна администрација, Горан Минчев, оствари средба со ЕУ Амбасадорот Рокас
Министерот за јавна администрација, Горан Минчев, одржа средба со новиот ЕУ Аамбасадор, Н.Е. Михалис Рокас. На овој состанок се разгледаа тековните и планираните иницијативи на Министерството, со акцент на реформите во јавниот сектор.
Двајцата соговорници истакнаа значајната улога на Европската Унија како клучен партнер во напорите за подобрување на јавната администрација. Министерот Минчев посочи дека оваа средба е значаен чекор кон создавање на професионална и квалитетна јавна администрација, која ќе служи на граѓаните.
Амбасадорот Рокас потврди дека ЕУ е подготвена да обезбеди поддршка и ресурси за реформите, кои ќе имаат позитивен ефект не само на вработените во јавниот сектор, туку и на целото општество. Тој нагласи важноста на редовниот дијалог за поддршка на реформите, со цел подобрување на јавната администрација.
Министерот Минчев нагласи дека владата чекори по европскиот пат и дека нема друга алтернатива. Соработката со ЕУ е клучна за креирање квалитетни закони, кои ќе бидат ефективно имплементирани во иднина.
На крајот, Министерот Минчев го запозна Амбасадорот Рокас со активностите на Министерството за јавна администрација во изминатите 90 дена. Амбасадорот ги поздрави напорите на Министерството за јавна администрација и целата Влада за почетокот на реформската агенда , како и планот и роковникот за истата.
Македонија
Склучен Меморандум за соработка помеѓу Државниот завод за статистика и Царинската управа
Државниот завод за статистика електронски ќе ги презема податоците за надворешна трговија од Царинската управа. Ова е утврдено со Меморандумот за соработка, што беше потпишан од страна на директорот на Државниот завод за статистика, Дејан Станков и директорот на Царинската управа, Бобан Николовски.
„Преземањето на податоците од Царинската управа преку веб-сервиси е особено важно за обезбедување навременост и заштита на податоците како и понатамошно хармонизирање, модернизирање и унапредување на системите“ истакна Станков.
Директорот Станков, на денешното потпишување на Меморандумот, потенцираше дека институцијата вложува напори за дигитализација на процесите и зголемено користење на административните извори при продукција на официјалните статистички податоци.
Меморандумот е во насока на унапредување на меѓуинституционалната соработка преку размена на податоци и повисок степен на дигитализација.
„Царинската управа е посветена на процесот на унапредување на меѓуинституционалната соработка, што крајно треба да ни овозможи креирање одржлив економски раст. Ваквиот чекор е само дел од нашите заложби за заедничко делување во насока на подобрување на условите за водење бизнис. Сетовите на податоци што ги обезбедуваме во делот на надворешно трговската размена овозможуваат компаниите да направат истражување на пазарот и дефинирање на нивните стратегии, за економски студии, но и за унапредување на трговските политики на државно ниво“, истакна директорот на Царинската управа, Бобан Николовски.
И двете страни ја искажаа својата заложба за натамошно продлабочување на соработката, а потпишувањето на Меморандумот ги зајакнува и унапредува веќе воспоставените практики на размена на информации и податоци.