Македонија
(Видео) Центар татни, Стојменов повторно сам ја урива дивоградбата „Беко“

Центарот на Скопје трет ден татни од багер кој ги урива дивоизградените столбови на поранешниот хотел ТЦЦ„Плаза“ на местото на некогашната стоковна куќа „Беко“. Борислав Стојменов, инвеститор на објектот, вторпат сам го урива изграденото на местото на поранешната стоковна куќа. Овој пат, од неговата правна служба велат дека уриваат за да можат да поднесат ново барање за градење и да го изградат планираниот објект.
„Постапуваме по последното решение за уривање што ни го издаде градежната инспекција. Ќе се урне се што е надвор од градежната јама. Не сакаме и за ова решение да одиме по судови. Штом заврши уривањето ќе поднесеме ново барање за одобрение за градба и ќе градиме, не се откажуваме од објектот“, објаснува правната служба на Друштвото за економски консалтинг, услуги и трговија – Економско биро, сопственост на Стојменов, за „Макфакс“.
Првото самоуривање на објектот на местото на поранешната стоковна куќа Стојменов го направи пред четири години откако статичари, на негово барање, утврдиле дека потпокривот направен од метална конструкција пропушта вода и тече насекаде.
По уривањето Стојменов почна да гради нов објект, на местото на стариот, но со поголем габарит, повикувајќи се на одобрение за градење од 2016 година, а Општина Центар му издаде неколку решенија за уривање, неколкупати го запечати градилиштето, но и покрај тоа објектот излезе од темели, а пролетва беа изградени и столбови над земја.
И сегашното уривање Стојменов го пријавил во Општина Центар.
„Пред околу два месеци добивме известување дека инвеститорот сам ќе се урива“, велат од Општина Центар.
Општината и покрај многуте решенија за уривање не го урна изграденото. Последното објаснување за тоа што не уриваат од мај годинава беше дека нема да чепкаат на градилиштето се додека не се изјасни Обвинителството. Истиот месец Обвинителството одлучи да го гони Стојменов за бесправно градење, а тој пак најави дека судењата ќе откријат афера како „Рекет“ и посочи дека зад блокадите на градилиштето стои поранешниот премиер Зоран Заев и дека му се вршел притисок хотелот да го продаде евтино.
Од правната служба на Стојменов велат дека ново одобрение за градење ќе бараат независно од постапките во Обвинителството и очекуваат дека токму тие постапки ќе покажат дали Стојменов бил во право.
Кривични пријави за бесправно градење и за искината пломба на градилиштето против Стојменов поранешниот градоначалник на Општина Центар Саша Богдановиќ. Во јуни годинава, пак, кривини против Богдановиќ и градежните инспектори од Општина Центар поднесе Стојменов. Од Обвинителството известија дека кривичните пријави од Стојменов се во предистражна постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.
Македонија
Има предлог за средба со Бугарија, треба Софија да се изјасни, рече Мицкоски

Премиерот Христијан Мицкоски денеска информираше дека е во тек комуникација со Канцеларијата на Европската комисија во земјава околу иницијативата за средба со бугарската страна, и дека веќе постои предлог-термин, за кој сè уште се чека потврда од официјална Софија.
„Имаме комуникација со канцеларијата на Европската комисија и вчера и денес, се уште немам повратен одговор. Има предлог термин, да почекаме да се изјаснат од бугарската страна“, рече Мицкоски на новинарско прашање дали стапил во контакт со претседателот на Советот на ЕУ Антонио Кошта и дали Бугарија ќе прифати ваква средба.
Паралелно со ова, претседателката Гордана Сиљановска Давкова вчера изјави дека иако вообичаено се одржуваат средби со хомолозите, таа нема проблем да разговара и со бугарскиот премиер Росен Жељазков на претстојниот Самит на НАТО во Хаг. Таа појасни дека нејзиниот бугарски колега, претседателот Румен Радев, нема да присуствува на Самитот, што отвора можност за разговор со Жељазков во насока на деблокирање на евроинтеграциите на Македонија.
„Јас за евентуална средба разговарав со господинот Антонио Кошта, негов беше предлогот. Во меѓувреме, јас не знам, ќе бидам таму ако ми е мене редот. Инаку, се знае, ред е да се разговара со хомологот, но еве нема проблем, меѓутоа не зависи од мене туку зависи од нашите соседи“, рече Сиљановска Давкова.
Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.