Спорт
МЗТ Скопје Аеродром и ТФТ во дуел за Суперкупот на Македонија
МЗТ Скопје Аеродром и ТФТ, вечерва (19.30 часот) во СРЦ „Кале“, ќе се борат за десеттиот трофеј во историјата на Суперкупот. МЗТ Скопје Аеродром е во улога на бранител на трофејот „Драган Василов-Цевка“. Во ланското, обновено издание, беа подобри од Работнички.
Александар Петровиќ, предводникот од клупата на популарните „металци“, очекува добар натпревар кој е вистинска проверка за неговата екипа која за неколку дена ќе се врати во друштвото на најдобрите екипи во Јадранската лига, со дуелот против Црвена Звезда во Белград.
„Очекувам еден добар натпревар пред се, добро отворање на сезоната. Сакам полна сала, да биде добра увертира за она што ни следи. Оваа година МЗТ го чека доста тешка сезона, пред се во АБА-лигата, затоа што ќе имаме доста обемен календар. ТФТ сигурно е екипа за респект, пред сè, има добар ростер на домашни играчи и нови странци. Ланклан Андерсон им се врати во тимот, сигурно и дека со настапот во квалификациите за Лигата на шампионите покажаа дека имаат квалитет. Неслучајно беа и домаќини на турнирот, сигурно дека имаат и гледаат свои шанси. Очекувам еден добар дуел. Ние сигурно имаме поголемо искуство затоа што играме со години во континуитет во АБА и во АБА-2, така што очекувам генерално една добра сезона“, вели тренерот на МЗТ Скопје Аеродром, Александар Петровиќ.
Боро Смилковски и неговиот ТФТ веќе ја „стартуваа“ новата сезона. Беа дел од квалификацискиот турнир за ФИБА лигата на шампионите кој изминатиот викенд го организираа во Скопје. А дуелот во СРЦ „Кале“ за првиот тренер на екипата од Тафталице треба да даде малку „појасна слика“ за новиот ростер.
„Суперкуп на Македонија, за нас уште еден од низата натпревари кои може да ни ја појаснат сликата за оваа наша ‘нова’ екипа – пред почетокот на лигашките натпревари како и пред почетокот на АБА 2 лигата – натпреварувања кои се наш приоритет оваа година. Екипата на МЗТ Скопје Аеродром е фаворит, АБА 1 лигаш и сериозна екипа која што одлично ги одработе подготовките, со исклучок на последниот натпревар против ПАОК. Имавме можност да гледаме дел од натпреварите, и иако на моменти покажаа супериорност во однос на ривалите, сепак како и секој имаат и свои слабости кои ние ќе пробаме да ги искористиме на денешниот натпревар. Нè очекува едно силно темпо и доколку успееме да ја исконтролираме нивната агресивност, парираме во скокот и имаме една шутерска вечер – се надевам дека после Купот, ќе можеме да дојдеме и до трофејот од Суперкупот на Македонија“, истакнува Боро Смилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Салах: Да останеме скромни и титулата ќе дојде
Мохамед Салах ја коментираше ситуацијата во англиската Премиер лига по Боксинг Деј.
Ливерпул го победи Лестер со 3.1 и ја зголеми предноста на врвот, од второпласираниот Челзи на седум бода повеќе и натпревар помалку.
„Ливерпул, Ливерпул, прв во Премиер лигата“, скандираа навивачите кога Куртис Џонс во својот 100. меч за клубот постигна гол за пресврт против Лестер (2:1).
Точка на на натпреварот со својот 19. гол стави Мохамед Салах, тој има и 15 асистенции на 25 натпревари оваа сезона.
Египќанецот игра во неверојатна форма и покрај тоа што не крие дека е незадоволен што се уште клубот не му понудил нов договор.
„Денес се чувствувам поинаку отколку пред пет години. Таа сезона беше посебна за мене бидејќи сите сонуваа за титулата. Секако дека сакам да ја освојам титулата, сите го сакаме тоа. Но сега најважно е да останеме скромни, да продолжиме да победуваме и се надевам дека титулата ќе дојде. Мора да одиме натпревар по натпревар“, изјави Салах.
Ливерпул Божик го дочека како лидер на табелата, слично беше и во сезоната 2018/2019, тогаш „црвените“ имаа десет поени предност пред Сити на крајот ја осоија титулата.
Спорт
Гулит: На американските газди важни им се парите, не го разбираат фудбалот
Легендарниот Руд Гулит остро ги критикуваше американските сопственици на фудбалски клубови во Европа. Славниот Холанѓанец посебно се осврна на сопственикот на Милан, Гери Карневале, со оглед на тоа што се прослави како играч во италијанскиот великан.
Гулит играше за Милан во најславната ера на клубот, кога со клубот раководеа Силвио Берлускони и Адријано Галијано.
„Берлускони беше еден од најдобрите претседатели што можам да ги замислам. Доаѓаше на тренинг секоја недела, разговараше со нас и беше навистина харизматичен. Тој заврши одлична работа. Мило ми е што имав шеф како него. Истата харизма ја има и актуелниот претседател на Реал Мадрид (Флорентино Перез). Важно е да се има водечка фигура која вистински го сака клубот, личност која точно знае што треба да се направи за да се пренесе таа страст во тимот. Ова им е заедничко на двајцата“, рече Гулит.
Сопственикот на Милан Гери Карневале неодамна изјави дека е бизнисмен и дека заработувањето пари е негова главна цел, а не освојување трофеи. Познатиот клуб овој месец го прослави својот 125 роденден, а на прославата присуствуваа бројни клупски легенди, но не и сопственикот на клубот кој живее во Америка, што ги налути навивачите.
„Денес, клубовите често се во сопственост на Американци кои купуваат клубови за да заработат пари, а не поради нивната историја. Понекогаш работите стануваат многу потешки. Не е случајно што меѓу најсилните постои таква личност што го сака клубот, но ја знае и неговата историја“, изјави Гулит.
Спорт
Хил: Шумахер правеше да се чувствував бескорисно и неталентирано
Дејмон Хил е еден од најпознатите Формула 1 возачи во историјата. Во интервју за „Билд“, Хил зборуваше за ривалството со Михаел Шумахер. Особено незаборавно беше Австралиското ГП во 1994 година, кога Хил и Шумахер се судрија и двајцата останаа без бодови. Тоа му одеше во корист на Германецот, кој на тој начин ја обезбеди титулата.
„Јас и Михаел одлично се согласувавме, но на патеката се мразевме“, започна Хил.
„Со било каков друг вид на размислување, невозможно е да се стане светски шампион. Нема простор за добрина. Мора да ја искористите секоја слабост на другиот возач. Михаел беше мајстор на тие психолошки игри. Тој често правеше да се чувствувам бескорисно и неталентирано“.
Сепак, на крајот имаше неколку убави зборови за својот стар ривал.
„Беше исклучително конкурентен, но надвор од патеката беше многу топла личност“.
Шумахер во кариерата освои дури седум светски титули, што и денес останува рекорд. Неговиот рекорд го израмни Луис Хамилтон. Хил во кариерата освои една титула светски шампион, онаа од 1996 година во болидот на Вилијамс.