Македонија
Обвинителството: Зеќири го оштетил буџетот за речиси 1,5 милион евра, парите завршиле во приватни фирми

Обвинителката Катерина Коларевиќ поднесе обвинение против ексгенералниот секретар на Владата, Мухамед Зеќири. Тој се гони за злоупотреба на службената положба и овластувањето, односно дека во повеќе наврати, без јавна набавка, избрал фирми на кои им исплаќал владини пари. Обвинителството тврди дека Зеќири го оштетил буџетот за речиси 1,5 милион евра, кои завршиле во приватни фирми.
„Обвинетиот како службено лице – генерален секретар на Владата на РСМ, со умисла извршил две временски поврзани дејства што претставуваат повеќекратно остварување на исто дело. Тој во периодот од април 2021 година до март 2022 година, искористувајќи ја својата службена положба и овластување, постапил спротивно на одредбите од Законот за јавните набавки и во два наврата, без спроведување соодветна постапка за јавна набавка во која на конкурентен начин би се избрало правно лице за спроведување на потребните активности, склучил два договора со две правни лица како даватели на услуги“, посочуваат од Обвинителството за гонење организиран криминал и корупција.
Освен Зеќири, обвинети се и хрватските државјани, дел од фирмата што вршела консултантски услуги, без да бидат избрани на тендер.
„Имено, на 4.5.2021 година, обвинетиот, без да спроведе постапка за јавна набавка, со умисла потпомогнат од осомничените хрватски државјани, недостапни на органите на прогон, склучил договор за консултантски услуги со правно лице на износ од 795.000 евра, без ДДВ во денарска противвредност. Ова правно лице, во кое еден од осомничените хрватски државјани е соосновач и управител, било основано дваесет дена пред склучувањето на договорот. По склучениот договор, правното лице склучило договор за консултантски услуги за постапка на процена на вредноста, како и длабинско снимање на АД ‘Пошта’ на Северна Македонија од Скопје со вториот осомничен хрватски државјанин за износ од 130.000 евра во денарска противвредност. Во критичниот период во повеќе наврати од сметката на Владата на РСМ исплаќани се парични средства на сметката на правното лице, со што за правното лице е прибавена значителна противправна имотна корист во вкупен износ од 57.932.100,00 денари, што го претставува износот в осогласност со договорот зголемен за 18 % ДДВ, а за кој износ е оштетен буџетот на РСМ“, велат од Обвинителството.
Вториот договор за консултантски услуги е за поддршка во процесот на потенцијална приватизација на „Железници на РСМ – Транспорт“ АД Скопје и бил склучен наредниот месец, односно на 23.6.2021 година, со друго правно лице како давател на услуги (консултант).
„Договорот бил со вкупна вредност во износ од 772.400 евра во денарска противвредност, без пресметан ДДВ. На сметка на ова правно лице Владата на РСМ врз основа на издадена фактура првично исплатила аванс од 11.284.162,00 денари за одржување почетен состанок со правното лице, односно за официјално почнување на проектот, а потоа врз основа на уште четири фактури биле исплатени буџетски средства во износ од 26.247.138,00 денари за кој износ е оштетен буџетот на РСМ“, додаваат оттаму.
Сметајќи дека сè уште постојат околности врз основа на кои на обвинетиот му беше определена мерката куќен притвор, предметниот обвинител на судот му предложи нејзино продолжување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Герасимовски во Капиштец: Вложуваме во квалитетен живот на центарци, програмата заедно ќе ја пишуваме

Општина Центар, синоќа го почна караванот „Се гледаме во маало со Горан Герасимовски“ во населбата Капиштец.
Герасимовски, како што соопштува Општината, во интерес на транспарентноста и решавање на проблемите на центарци, во следните три недели ќе ги посети жителите и заеднички ќе дискутираат за проектите што се спроведуваат, но и ќе ги сослуша сите проблеми и идеи со кои ќе се креира новата четиригодишна програма за уште поубав Центар.
Пред жителите на Капиштец, Герасимовски информираше дека програмата за работа мора да произлезе од центарци, затоа што само така може општината да работи во интерес на граѓаните. Тој истакна дека во завршна фаза е реконструкцијата на паркот во Капиштец на површина од 7.800 м², кадешто има ново зеленило, нови патеки, урбана опрема и ЛЕД осветлување.
„Вложуваме во сè што значи квалитетен живот. Паркот во Капиштец целосно го обновивме и хортикултурно го уредивме, со нови дрвја, клупи и осветлување. Инвестираме во нова инфраструктура, ги реконструиравме улиците „Козара“, „Шарски Одред“ и го реконструиравме тротоарот на ул. „Народен Фронт“. Детското игралиште кај трговскиот центар „Зебра“ и спортското игралиште на ул. „Народен Фронт“ ги обновивме. Можам да кажам дека ги подобривме условите во целата населба. Пензионерите добија свој пензионерски клуб во Капиштец кадешто секојдневно се дружат и социјализираат“, рече Герасимовски.
Герасимовски, потенцираше дека се расчистени дивите депонии спроти Католичка црква и на ул. „Народен фронт“. „Општинските служби секојдневно се грижат за хигиената на општината, чистејќи го и сметот, но и дивите депонии. Изминатиов период, ЈП „Комунална хигиена“ потфрли во чистењето на контејнерите на територија на Центар поради што спремаме и кривични пријави. Недозволиво е централното градско подрачје да изгледа вака поради пропусти на градската власт“, посочи Герасимовски.
Караванот „Се гледаме во маало со Горан Герасимовски“ продолжува и денеска, на средби со центарци во Дебар маало, кај клупата на Горан Стефановски, со почеток во 18.30 часот.
Македонија
Арсовска: Аценце, те чекам на ТВ дуел

Градоначалничката на Град Скопје, Данела Арсовска преку социјалните мрежи го повика градоначалникот на Ѓорче Петров на ТВ дуел.
„Во меѓувреме да ти го разбијам интервјуто со факти: ‘Аце рекол: Ги демантирам ставовите на градоначалничката на Град Скопје за наводна изградба на хемиска фабрика на територија на општина Ѓорче Петров’ не се тоа ставови Аце туку факти, еве секој во Македонија кај тебе на веб страна може да ги види па и ти.
Аце рекол: „Ова се обиди на градоначалничката на Град Скопје да создаде хаос меѓу граѓаните“ – многу јако, јас сама, а ти против мене со целата владеачка партија од 4-тата економија во Европа со која изгласавте ДУП со хемиски фабрики
Аце рекол: „Како да е фиксирана за општината Ѓорче Петров“ – па нели на Чаир бев фокусирана, што си се уплашил толку
Аце рекол: „Арсовска работи, инвестира на други места додека пак во Ѓорче Петров не работи ништо“ – Аце од сите нови 29 улици што ги имаш во Ѓорче, 27 ти ги направив јас!!!
Аце рекол: „Најодговорно тврдам пред целата македонска јавност дека на тој потег, ниту пак на било кој друг дел на територијата на општина Ѓорче Петров не постои локација на која што е предвидено или ќе се градат било каков тип на објекти од тешка индустрија“ – Аце многу директно ти кажав 157.000м2 објекти хемиска индустрија која е класифицирана како загадувачка
Аце рекол: „Објектот (Лафома) поседува сопствена пречистителна станица, под постојан надзор на Министерството за животна средина и сите релевантни државни органи“ – Аце нели не загадува хемиската индустрија, што тогаш пречистува фабриката и што го истура во Лепенец? Бидејќи знаеш многу за фирмата и ги застапуваш, ајде чекаме да ни кажеш??
И за сѐ ова јас имам докази, а ти соопштение што ти го напишале во штаб.
Ајде уште еднаш да те прашаме, дали ти ги праша жителите на Ѓорче Петров дали тие сакаат хемиски фабрики на 157.000 m2 и над 30 висококатници да се градат сред општината? НЕ!“, напиша Арсовска на својот фејсбук профил.
Македонија
(Фото) ДЗС: Пронајдени артилериска граната од 75 mm и рачна бомба од Првата светска војна

Во последното деноноќие, вчера во пределот на преспанскиот дел од Национален парк Галичица, беа пронајдени една артилериска граната 75 mm и рачна бомба, при што од страна на Дирекцијата за заштита и спасување е интервенирано за безбедно отстранување неексплодирани убојни средства (НУС) од минатите војни, извести ДЗС.
Дирекцијата за заштита апелира до граѓаните, при прошетки во природата во случај кога ќе пронајдат неексплодирани убојни средства да не ги фаќаат и поместуваат, туку едноставно да се јават на Единствениот повикувачки број за итни случаи 112 во ЦУК, по што надлежните институции и служби ќе се погрижат безбедно да бидат отстранети или неутрализирани, согласно конкретните пронајдени НУС. Така ќе бидат заштитени животите и безбедност на тие што ги пронаоѓаат тие потенцијално опасни заостанати оружја од минатите војни, а и животите на идните посетители во природата.
Пронајдените гранати веќе биле употребени, а неексплодирани и претставувале потенцијална опасност за граѓани коишто се на прошетка во природата или пак за пожарникари коишто гаснат шумски пожари во тој предел. Конкретно, артилериска граната од 75 mm со потекло од Прва светска војна била истрелана и помината низ топовска цевка и имала временска запалка којашто од непознати причини не извршила активација на гранатата кога со нејзе се дејствувало. Опасноста за активирање, кај вакви веќе истрелани гранати, постои при дејство, удирање, врз запалката и при висока температура, на пример при пожар и слично.
Рачната бомба, од германско производство, била одбранбена бомба од Прва светска војна со активирана каписла од времето кога била фрлена, употребена.
Двете неексплодирани убојни средства (НУС) од минатите војни се безбедно подигнати и транспортирани на безбедно место за понатамошна постапка до нивно уништување, според оперативните стандардни процедури. од пиротехничарот во ДЗС Битола, Ѓорги Стефанов и овластениот пиротехничар Митко Ташков од ДЗС Гевгелија, соопшти Дирекцијата за заштита и спасување.