Грижата за повредените во пожарот во Кочани ќе биде долгорочна, ќе трае онолку години колку што ќе имаат потреба и целото лекување ќе биде на сметка на државата, кажа денес директорот на Фондот за здравствено осигурување, Сашо Клековски. Централна болница за лекување и терапија ќе биде болницата во Кочани каде што се податоците за сите пациенти. Државата во континуитет ќе ја обезбедува и менува компресивната облека за повредените до две години, колку што експертите советуваат дека треба да се носи.

„Компресивната облека која сега ја користат 58 лица за други делови на телото освен врат и лице, за врат и лице се осуммина, значи вкупно 66 лица. Ова е процес што ќе трае бидејќи се уште имаме 10 повредени лица кои се во болници. Имаме уште некои 15 лица на кои најверојатно во наредниот период ќе им бидат земени мерки, значи процесот трае и ќе се адаптира. Морам да кажам дека ќе трае две години. Препораките за употреба на компресивната облека е до две години и во тој период најмалку неколкупати на неколку месеци ќе треба да се замаат нови мерки за облеката, да се менува, да се адаптира“, рече директорот Клековски.

Компресивните маски, Клековски објасни дека ги прават во соработка со водечка фирма од Германија, а во грижата за повредените се вклучени странски експерти. Физикална терапија е овозможена во Кочани оти така препорачале британските експерти, а допрва се очекува експерт од Словенија за лекувањето на повредните кои имаат ампутации.

„За следниот период веќе поканивме експерти од Израел меѓутоа заради настанатата состојба тоа ќе се одложи на неодредено време бидејќи нема полетувања во моментот од израелските аеродроми. Тоа не значи дека не работиме на други опции. Очекуваме во следниот период да дојде експерт од Словенија, експерт за ампутации за да се погледнат опциите за третман на повредените кои имаат ампутации на прсти“, вели директорот Клековски.

Одобрени се контролни прегледи во болницата Пирогов во Бугарија на шестмина пациенти кои сакале таму да бидат контролирани, а здравствените власти се во постојана комуникација и со белгиските експерти кои беа кај нас, за долгорочни чекори вклучувајќи и лекување во странство доколку е потребно во некоја од наредните фази во третман на повредените.

Директорот Клековски токсична пропаганда ги нарече тврдењата дека ништо не се прави за повредените во Кочани апелираше повредените и семејствата да бидат смирени, да ги почитуваат протоколите и да не брзаат за естетски интервенции.

„Пристапот дека ништо не се прави создава една несигурност и неизвестност кај повредените и нивните семејства и веќе има притисок да брзаат, бараат консултации надвор од воспоставените доктрини и протоколи за третман на изгореници. Сакам да апелирам да има смиреност кај повредените и нивните семејства, имаме комплетна посветеност кон нив, во комуникација сме со соодветните центри за изгореници. Тука би сакал да го повторам тоа дека компресивната облека ќе треба да се користи две години, дека не се препорачува употреба на ласер за третман на изгорениците порано од шест месеци, дека во основа ќе треба да помине веројатно една или две години за да заврши заздравувањето на кожата пред да почнат естетски зафати за подобрување на изгледот. Ќе замолиме за сите прашања во однос на третманот повредените да се консултираат со Општата болница Кочани“, рече директорот Клековски.

Иако со тврдењата дека ништо не се прави се добива впечаток дека градот нема болница, Клековски вели дека болницата во Кочани не е гранапче туку здравствена институција со редовен годишен буџет од четири милиони евра, 50 лекари и 100 медицински сестри.

ВМРО-ДПМНЕ силно го осудува насилието кое денес го демонстрираше кочанскиот функционер на СДС.Овој советник може да се види во прегратките на Венко Филипче и на заеднички фотографии со него, соопштија од ВМРО-ДПМНЕ, по тепачката во Општина Кочани во која беше повредено едно лице.

„Во Скопје секојдевно блуат невистини и лажни вести за Кочани. Полни со некрофилија и негативности, како и дезинформации кои директно им помагаат на оние кои не сакаат правда. Иако тие ни збор не кажуваат за модуларната болница, а како ѓавол од темјан бегаат за одговорност на Венко Филипче за овој случај. И додека конструираат и лажат нивниот советник и функционер Аки Акиов дели тупаници на кочанчани и се заканува.

ВМРО-ДПМНЕ силно го осудува насилието кое денес го демонстрираше кочанскиот функционер на СДС. Овој советник може да се види во прегратките на Венко Филипче и на заеднички фотографии со него. Бараме СДС и Венко Филипче да се оградат од неговото однесување и истиот да си поднесе оставка од член на Советот на Кочани. Ова е срамно и дрско однесување. СДС е сол на раните на кочанчани и бескруполозно ги злоупотребува нивните судбини“, велат од ВМРО-ДПМНЕ.

ЈП „Водовод и канализација“ – Скопје информира за зголемена потрошувачка на водата и апелира до граѓаните на градот Скопје за рационално користење и употреба на водата.

„Особено апелираме да се избегнува непотребно трошење на водата за полевање зеленило, бавчи и ниви, за миење автомобили, за полнење базени, но и спречување на злоупотребата преку дивите приклучоци. Со дивите приклучоци се нанесува директна штета на системот за водоснабдување и на квалитетот на водоснадбувањето до сите корисници во град Скопје“, велат од „Водовод“.

Од таму апелираат до граѓаните на град Скопје, доколку забележат див приклучок, да го пријават на 02 3073 010, [email protected] или www.vodovod-skopje.com.mk.