Македонија
(Видео) Лефков: Во време кога Ковачевски бил заменик-министер за финансии, фирмата на неговиот кум склучила договор со ЕВН од над 2 милионa евра

Денес, ќе презентираме нови фрапантни сознанија за аферата „Броило“ и за соларниот картел, како и за трговијата на влијание на Димитар Ковачевски. Како соларниот картел во аферата „Броило“ вртел милиони ќе објасниме и преку денешниот случај. Само во еден потег кумот на премиерот Ковачевски добил работа од 2 милиона евра. Соларниот профитер Ковачевски заработува огромни суми пари додека народот осиромашува, изјави на денешната прес-конференција Миле Лефков, пратеник и член на ИК на ВМРО-ДПМНЕ.
Тој додава дека фирмата на кумот на Ковачевски склучува договор со ЕВН, каде што државата има удел, во време кога дезертерот Ковачевски е заменик-министер за финансии. Договорот помеѓу „КМГ ЕОЛ квазар“ на кумот на Ковачевски и ЕВН е склучен на 3.2.2021 година и тој е во вкупна вредност од 123 милиони денари, без пресметан ДДВ, односно над 2 милиона евра.
Лефков истакна дека договорот на фирмата на кумот на Ковачевски со ЕВН е со времетраење од две години и тој е сè уште во сила, односно ЕВН сè уште може да ги користи услугите на „КМГ ЕОЛ квазар“ на кумот на Ковачевски, а самиот Ковачевски е премиер на државата.
Лефков наведе дека дополнително треба да се нотира дека фирмата на кумот на Ковачевски не е производител на панелите, туку само ги монтира, а произведувач на фотоволтаични панели во соларниот картел на фирми е фирмата основана од Ковачевски, „Пиксел груп“.
На овој начин фирмата основана од Ковачевски е фирмата кај која ќе завршат парите од оваа набавка од над 2 милиона евра. Со ова фирмата основана од Ковачевски е онаа што има директен профит од договорот помеѓу „КМГ ЕОЛ квазар“ и ЕВН.
Дезертерот Ковачевски да не чека и да си поднесе оставка веднаш. Ковачевски е фатен во центарот на соларен картел како преку аферата „Броило“ се свртени 26 милиони евра, изјави Лефков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Таравари тајно преговарал со Ахмети, Меџити вели дека не го исклучиле од коалицијата туку тој се самоисклучил

Не е веќе тајна бидејќи коалицијата „Вреди“ одамна забележа дека постојат преговори меѓу Таравари и Ахмети со вмешаност на одредени личности од олигархијата, истакна на прес-конференција Изет Меџити од „Вреди“, по завршувањето на состанокот во коалицијата.
Преговорите како што рече Меџити, се воделе веќе неколку месеци.
„Јасно е дека преговорите имале за цел разединување на коалицијата „Вреди“ и враќање од клиничка смрт на ДУИ. Колкава била цената на оваа операција и дали вредело сето тоа, ќе се дознае многу брзо“ нагласи Меџити.
Резимираше, дека тие не го исклучиле Таравари од коалицијата, туку тој се самоисклучил.
Како што истакна, од нивната коалиција оцениле дека синоќешната одлука на Таравари откако биле исцрпени сите аргументи и понуди за да остане во заедничката изборна трка, нема поддршка од искрените гласачи на Алијансата за Албанците, ниту од партиските функционери, кои пред помалку од една година како што рече, ја подржале правилната одлука на таа партија за прекинување на соработката со партијата „која веќе тоне и повлекува со себе многу жртви“.
„ДУИ нема да се спаси без оглед на гумите кои ќе ги фрлат различните политички актери“, подвлече Меџити.
Коалицијата „Вреди“ оценува дека одлуката за настапи со одделни листи за советници, кога како што вели Меџити таа тема веќе била договорена, не се базира на ставовите на партиската база.
Тоа, според Меџити, е одлука донесена во интерес на ДУИ, и за која Таравари ќе мора да даде објаснување пред Албанците, но и пред гласачите на „Вреди“.
„И покрај сето тоа, коалицијата „Вреди“ денес одлучи да настапи заеднички на изборите и со советнички листи и со кандидати за градоначалници, а во наредните денови ќе се формираат и заеднички изборни штабови на „Вреди“ за заеднички настап на претстојните локални избори“, информира Меџити.
Македонија
Муцунски: Посетата на ОАЕ носи конкретни бенефити за граѓаните

Министерот за надворешни работи и надворешна трговија, Тимчо Муцунски, ја продолжува работната посета на Обединетите Арапски Емирати, како дел од владината делегација предводена од претседателот на Владата, Христијан Мицкоски.
Во текот на денешниот ден, беа остварени повеќе средби со претставници на стопанските комори, инвестициски фондови, како и со поединечни претставници на големи корпорации кои изразија интерес за потенцијални инвестиции во државата. Разговорите се фокусираа на можности за инвестиции во инфраструктурата, туризмот, како и во рамки на технолошко-индустриските развојни зони.
„Нашата цел е јасна – повеќе, но и подобро платени работни места во нашата држава. Во наредните денови ќе објавиме една исклучително позитивна вест, која ќе значи многу за секој наш граѓанин, за економијата, трговијата и туризмот“, изјави министерот Муцунски.
Тој додаде дека посетата носи конкретни и опипливи резултати и дека Владата продолжува со истата динамика и посветеност во следните денови од посетата.
Македонија
Николоски од Абу Даби: Ја разгледуваме потенцијалната соработка за инвестиции во Македонија

Вицепремиерот и министер за транспорт Александар Николоски ја предводи македонската делегација состaвена од министерот за надворешни работи и надворешна трговија, Тимчо Муцунски, Игор Јанушев, генерален секретар на Владата и Гоце Димовски, директор на Дирекцијата на ТИРЗ, која денеска во Абу Даби оствари средба со Валид Ал Мокараб Ал Мухари – заменик извршен директор на “Мубадала’ инвестициска компанија од Обединетите Арапски Емирати.
На средбата на која се разговараше за потенцијалната соработка, Николоски ги презентираше условите што ги нуди Македонија на странските инвеститори, како и потенцијалните можности за инвестиции во Македонија.
Николоски истакна дека оваа средба е добра можност за отворање на нови перспективи меѓу двете земји, потенцирајќи дека Македонија има одлична геоположба која на инвеститорите им нуди предност во регионот и директно поврзување со пазарите во Централна Европа.
На средбата, Николоски ги презентираше и инвестициските можности во делот на туризмот, инфраструктурата и земјоделието. Тој пред присутните го претстави планот за инфраструктурен развој на Република Македонија со посебен фокус на модернизација на транспортните коридори.
Исто така на средбата се разменија и идеи за поддршка на претприемаштвото и приватниот сектор во делот на технологијата, иновациите, обновливите извори на енергија и други сектори.
“Мубадала” е инвестициска компанија со портфолио од 302 милијарди долари која работи на шест континенти во различни сектори.
Денешната средба е во рамки на владината официјална посета на Обединететите Арапски Емирати.