Свет
Главниот обвинител на МКС: Путин нема да биде поштеден од одговорност за воени злосторства
Владимир Путин нема да биде поштеден од гонење за воени злосторства доколку доказите покажат дека тој ги извршил, тврди главниот обвинител на Меѓународниот кривичен суд (МКС).
Обвинителот на МКС, Карим Кан, кој моментално ги истражува прекршувањата на теренот во Украина, изјави за Euro news дека претседателската позиција на Путин нема да му помогне да остане неказнет.
„Не е одбрана да се повикувате на наредби на претпоставен, ниту, пак, официјалната позиција на поединец како генерал, претседател или премиер е основа за имунитет. Нема имунитет за меѓународни злосторства, а исто така нема застареност на воени злосторства или злосторства против човештвото“, изјави Кан за Еуро њуз.
Русија е обвинета за воени злосторства низ Украина. Руските воени сили се обвинети за силување, убиства и мачење на цивилното население.
Обвинувањата за воени злосторства станаа погласни откако Москва во понеделникот изврши ракетни напади во Украина во кои загинаа најмалку 19 лица, а 105 беа ранети. Кан рече дека таквите напади се неприфатливи доколку се утврди дека се вистинити.
„Едно е јасно – не можете намерно да таргетирате цивилни објекти, училишта и болници, цивилни резиденции освен ако не се користат за да се постигне посебна воена предност. Дури и тогаш, постои правило за пропорционалност. И тоа е нешто, знаете, применливо .
Се разбира, можете да го екстраполирате тоа во однос на голем број различни цели, без разлика дали се работи за мостови или енергетски локации. Но, ширењето на теророт не е дозволено. И тогаш треба да ги гледате работите како дел од целокупната шема, наспроти само еднократните случаи. Меѓународното право сега е порелевантно од кога било поради тензиите меѓу Русија и Западот.
Се наоѓаме во многу критичен момент. Во момент кога лидерите зборуваат за употреба на насилство, бомби и куршуми. Треба да застанеме и да размислиме, каде одиме? Но, во моментот кога зборуваме за тактичко нуклеарно оружје, тоа не е само зоната на самракот, тоа е предвечерието на кошмарот. И ние мора да го сфатиме крајно сериозно.
Мислам дека законот има своја улога. Тоа нема да ги реши сите проблеми во светот, но мораме да се погрижиме да биде релевантно во овие најкритични моменти низ кои минуваат луѓето. Ова не е холивудски филм. Ова е нешто што е блиско и лично за многумина“, изјави обвинителот на МКС за Еуро њуз.
Кан и неговиот заеднички тим во моментов ги истражуваат воените злосторства во Украина со шест земји од ЕУ под покровителство на Европравда, агенцијата за судска соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелците со тенк убија пет свои војници во Газа
Петмина израелски војници загинаа во пријателски оган во северниот дел на Појасот Газа, а тројца се тешко ранети, соопштија израелските одбранбени сили.
Според израелските медиуми, војниците загинале вчера во пријателски оган од израелски тенкови за време на судирите со милитантите на Хамас.
Извештаите велат дека тенк удрил во зграда во бегалскиот камп Џабалија каде што биле сместени војници.
Според податоците на израелската армија, од почетокот на војната во Газа, во борбите загинале 626 војници, а околу 3.500 се ранети.
Свет
Тинејџер исчезна во Алжир во 1998 година, по 26 години пронајден е жив во шталата на соседот
Алжирецот кој исчезнал пред 26 години бил пронајден во шталата на соседот, на само неколку минути пешачење, објави оваа недела Министерството за правда на земјата.
Човекот, идентификуван само како Омар Б., исчезнал на 19-годишна возраст, за време на граѓанската војна во Алжир во 1998 година, а неговото семејство претпоставувало дека бил киднапиран или убиен, пренесува „Си-би-ес“.
Сега, на 45-годишна возраст, тој бил пронајден меѓу стоговите сено на само околу 200 метри, откако братот на киднаперот се пожалил на социјалните мрежи за спор околу наследството.
Алжирските медиуми објавија дека кога членовите на семејството почнале да ја пребаруваат куќата на осомничениот, тој станал напнат кога се приближиле до стогот сено и на крајот го пронашле Омар Б. како седи под него во тишина.
Соседот (61) на семејството на Омар е приведен откако се обидел да избега, соопшти Министерството. Алжирските медиуми објавија дека жртвата изјавила дека не можел да повика помош „поради магијата што ја фрлил врз него неговиот киднапер“.
Киднаперот на тинејџерот е обвинет и дека го убил своето куче со отров, јавуваат алжирските медиуми.
Министерството соопшти дека истрагата се уште е во тек, додавајќи дека мажот добил медицинска и психолошка нега по злосторството, кое беше опишано како грозоморно.
Алжирските медиуми објавија дека мажот бил прегледан од лекар и префрлен во специјално психолошко одделение.
Свет
Заздравувањето на Фицо е доведено во прашање, на напаѓачот му пречела и владината политика кон Украина
Здравјето на словачкиот премиер Роберт Фиц се уште е тешко и рано е да се каже дали ќе закрепне, изјави неговиот заменик Роберт Калинак, ден по атентатот што ја шокираше Европа.
„За жал, сè уште не можам да кажам дека победуваме во напорите да го спасиме животот на Фиц, ниту дека прогнозите се позитивни бидејќи последиците од повредите предизвикани од четирите прострелни рани се такви што одговорот на телото на нив ќе продолжи да биде многу тежок“, рече Калинак.
Миријам Лапуникова, директорка на Универзитетската болница Рузвелт во Банска Бистрица, каде што се лекува премиерот Фицо, рече дека 59-годишниот премиер бил подложен на петчасовна операција во која учествувале два медицински тима за да ги санираат повеќете прострелни рани.
„Во овој момент успеавме да ја стабилизираме неговата состојба, но сепак е многу сериозна. Тој ќе биде задржан на интензивна нега“, изјави таа за новинарите.
Министерот за внатрешни работи Матус Сутај Есток на прес-конференција рече дека напаѓачот кого полицијата го товари за обид за убиство, дејствувал сам и дека претходно учествувал во антивладини протести.
„Станува збор за волк-самотник кој се радикализирал неодамна, во периодот по претседателските избори одржани во април“, изјави Сутај Есток.
„Како причини за нападот осомничениот ја наведе политиката на владата кон Украина, плановите за реформа на јавниот сервис и распуштањето на специјалното обвинителство“, рече министерот за внатрешни работи.
Словачки експерти во средата ги критикуваа безбедносните мерки преземени за заштита на премиерот по обидот за атентат врз Фиц.
„Самиот Фицо пред неколку недели зборуваше за опасностите од пукање врз политичарите“, изјави поранешниот началник на словачката полиција Стефан Хамран за весникот „Денник Н“ во четвртокот.
Тој се запраша кој ја анализирал потенцијалната опасност и ја проценил заканата. Хамран ја критикуваше реакцијата на телохранителите по пукањето.
Поранешниот шеф на словачката единица за обезбедување на заштитени лица, Јурај Забојник, исто така ги критикуваше телохранителите на премиерот.