Македонија
Андоновска: Се откажуваме од дискусиите, но Арсовска да достави одлука и уште вечерва да изгласаме префрлање на средства на ЈСП
Моето јавување сега во моментот е буквално од причина што ги слушнавме претставниците од Синдикатот кои што јасно кажаа пред цела македонска јавност и пред скопјани, дека скопјани утре од 4:30 повеќе нема да имаат градски превоз, рече Марија Андоновска од ВМРО-ДПМНЕ.
„ Иницијативата што денеска ја поднесе советничката група на ВМРО-ДПМНЕ и коалицијата е токму во оваа насока, граѓаните на Скопје да не останат без градски превоз. Но, бидејќи сега во моментот слушнавме дека тоа ќе се случи утре од 4:30 часот, ние како советничка група на ВМРО-ДПМНЕ и коалицијата сме подготвени во моментот да се откажеме од сите дискусии кои што беа предвидени сега во моментот, да дадеме пауза ако треба од неколку часа и да побараме од градоначалничката одма денеска уште веднаш да ни ја достави одлуката, ќе седиме колку што е потребно и за да ја изгласаме таа одлука уште вечерва да се префрлат средства на вработените во ЈСП и од утре автобусите да можат слободно да се движат и граѓаните на Скопје да имаат превоз“ порача Андоновска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ивановска: Навреда за сите совесни функционери е констатацијата дека одењето пешки или возењето велосипед е популизам
Поранешната претседателка на Антикорупциската комисија, Билјана Ивановска, во името на сите членови на претходниот состав, преку ФБ статус реагира на соопштението на ДКСК во врска со дипломатските пасоши.
„Обврска на медиумите е да го следат работењето на институциите и на фунционерите и за тоа навремено и целосно да ја известуваат јавноста.
Како поранешни членови немаме никакво влијание ниту врз работењето на Комисијата ниту врз работењето на медиумите. Извештаите за работењето на претходниот состав на ДЛСК, како и извештаите на Европската Комисија и другите меѓународни организации и тела, го прикажуваат односно го оценуваат работењето на Комисијата во нашиот мандат. Тоа што немавме дипломатски пасоши и службени автомобили ниеднаш не не спречи навреме да стигнеме и активно да учествуваме на сите сесии од скринингот со ЕК во Брисел. Изненадува констатацијата дека одењето пешки, возењето велосипед или користењето јавен превоз е чист популизам. По кој основ или критериум оваа наша навика што ја практикуваме и пред и по мандатот е оценета како популизам. Ова е навреда за сите совесни функционери кои се однесуваат домаќински со народните пари и за сите совесни граѓани кои почитуваат европски вредности и се грижат за животната средина“, пишува Ивановска.
Според МНР, членовите на Антикорупциска не влегуваат во категоријата на лица кои имаат задолжително право на дипломатски патни исправи.
„Во текот на месец април од страна на Државната комисија за спречување корупција до Министерството за надворешни работи доставено е барање за издавање на седум дипломатски пасоши за Претседателот и членовите на Комисијата. Членовите на оваа Комисија не влегуваат во категоријата на лица кои согласно со актите кои го регулираат ова прашање имаат задолжително право на дипломатски патни исправи, но истовремено, на одредени категории, доколку Министерот процени дека има потреба, Министерството за надворешни работи има право да издаде дипломатска патна исправа На предметното барање од страна на тогашниот Министер за надворешни работи, позитивно е одговорено само за едно лице, односно за Претседателот на ДКСК. Во однос на останатите членови на ДКСК Министерот за надворешни работи и надворешна трговија ќе направи дополнителни консултации со цел да биде донесена соодветна одлука, односно дали постојат оправдани причини и тие евентуално да добијат дипломатски или службени патни исправи“, велат од Министерството за надворешни работи и трговија.
Македонија
Средба на претседателката Сиљановска Давкова со претставници на Обединетата Македонска Дијаспора
Претседателката Гордана Сиљановска Давкова денеска, во Вила Билјана во Охрид, ги прими Мето Колоски и Гордан Јорданов од Обединетата Македонска Дијаспора.
На средбата, претседателката беше информирана за тековните проекти и планирани активности на ОМД и беа разменети мислења за Националната стратегија за соработка со дијаспората, за актуелните политички состојби во САД и Европа, како и за промените во демографијата на дијаспората.
Потенцирајќи дека ОМД претставува глобален глас на македонските иселеници во САД, Канада, Европа и Австралија, претседателката изрази поддршка на нејзините иницијативи и севкупниот придонес за меѓународна афирмација на земјата и промовирање на македонските вредности, идентитет и култура.
Во таа насока, таа се заблагодари за конструктивноста на ОМД, поддршката во застапување на македонските интереси и исполнување на стратешките цели на државата, како и за нивната улога во унапредување на билатералните односи со земјите во кои дејствуваат.
На средбата, претседателката ги истакна нејзините заложби за унапредување на соработката со ОМД, продлабочување на врските со иселениците, искористување на потенцијалите и јакнење на нивната улога во развојот и просперитетот на земјата.
Посочувајќи дека македонската дијаспора е столб на татковината, дипломатски ресурс и нашата економска состојба е директно поврзана со активностите на дијаспората, претседателката Сиљановска Давкова, истакна дека е неопходна активна и продуктивна соработка со македонските иселеници и изнаоѓање на модел и посебни услови со кои ќе се овозможат нивни инвестиции, како и пренос на знаење и вештини во земјава.
Македонија
Мицкоски: Започнуваме со изградба на нова детска градинка во Гази Баба во која ќе бидат згрижени над 60 дечиња
Премиерот Христијан Мицкоски присуствува на поставување на камен темелник за изградба на комплетно нова детска градинка во населено место Трубарево, во Општина Гази Баба.
„Листите на чекање преставуваат сериозен проблем и на овој начин преку изградба на вакви објекти ние го правиме првиот чекор за решавање на проблемот. 19 милиони денари ќе се инвестираат за градба на оваа градинка која ќе има опфат на над 60 дечиња. Но, ова не е единствениот проект кој се реализира за овој крај и оваа општина. Можам да му честитам за посветеноста и ангажираноста на градоначалникот Бобан Стефковски кој во моментов реализира повеќе десетици проекти важни за граѓаните. Се разбира ја користам оваа прилика да им честитам и на советниците кои ја поддржуваат работата на градоначалникот, истовремено и на пратениците во македонското Собрание кои грчевито се борат за да можат да обезбедат проект повеќе за општина Гази Баба. Работата е нашиот белег, додека на тазе опозицијата белег е политиката на ниски страсти, кочење и лаги. Ние ќе продолжиме со работа“, рече Мицкоски во своето обраќање.
Детската градинка има капацитет на згрижување на 60 деца, и е на површина од 720 метри квадратни во кои ќе се изградат 3 занимални за деца, административни простории и останати помошни простории.
Вкупна инвестиција на истата во првата фаза ќе изнесува 19.000.000 денари.