Македонија
Грковска-Цури: ИПА-проектите се важни за развојот на државата и затоа мора ефикасно да се реализираат
Заменик-претседателката на Владата задолжена за политики за добро владеење, Славица Грковска, денеска имаше работен состанок со првиот човек на Ревизорското тело за ревизија на инструментот за претпристапна помош, овластениот државен ревизор Адем Цури со кого разговараше за динамиката со која се имплементираат ИПА и ИПАРД-фондовите во земјава и начинот како да се зголеми ефикасноста на институциите во оваа насока.
Вицепремиерката Грковска го истакна значењето на ова тело кое ја контролира имплементацијата на фондовите од Европската Унија, но и за важноста навреме да се детектираат евентуални слабости во системот и тие да се надминат.
Државниот ревизор Цури информираше дека во последниот Извештај на Европската комисија, Ревизорското тело за ревизија на претпристапната помош има добиено висока оценка и во однос на професионалноста е лидер во регионот, поради што е определено за координатор за Методологијата за ревизија за пет држави во регионот.
Двајцата соговорници разговараа и за потребата да се зајакнат кадровските капацитети на Ревизорското тело за ревизија на ИПА, како и за потребата да се обезбеди систем на реално вреднување на стручните лица, бидејќи како држава се соочуваме со одлив на стручни и искусни кадри.
Вицепремиерката Грковска оцени дека сите институции кои работат на ИПА-проекти мора да бидат целосно посветени и да ја почитуваат утврдената динамика, за нашата држава да не биде принудена да плаќа казни или да ја губи оваа значајна помош од Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лашкоска: Обновувањето на шумскиот фонд е дел од приоритетите на локално и национално ниво
Заменик министерката за животна средина и просторно планирање, Ане Лашкоска, денес ја посети Гевгелија каде заедно со градоначалникот, Андон Сарамандов, се приклучија на акцијата за масовно пошумување и подигање на јавната свест „Да пуштиме корени во нашата Гевгелија“ во рамките на која на месноста Топлик, Гевгелија се засадуваа 6000 дрвни насади.
„Министерството за животна средина ги поддржува активностите за пошумување во државата бидејќи тие се значаен ресурс од повеќе аспекти – заштита на биодивезитетот, подобрување на квалитетот на воздухот, климатските промени, заштита од ерозија и свлечишта и се важен економски ресурс“ изјави Лашкоска на настанот потенцирајќи дека обновувањето на шумскиот фонд е дел од приоритетите на локално и национално ниво особено во услови кога сме соочени со многу високи летни температури и со сериозно опожарување на шумите на територијата на целата држава.
Таа упати честитки и благодарност до градоначалникот на Гевгелија, Андон Сарамандов и општина Гевгелија за одлично реализираната акција.
Во рамките на посетата на општина Гевгелија, заменик министерката Лашкоска и градоначлникот Сарамадов направија увид во реализацијата на проектот за намалување на загуби на вода со замена и инсталација на водомери заедно со инсталација и конфигурација на опрема со далечинско отчитување. Проектот го имплементира ЈКПД Комуналец Гевгелија, а е финансиски поддржан од страна на МЖСПП со средства во висина од 5 милиони денари.
Македонија
СДСМ утре на Конгрес ќе избира ново раководство
Социјалдемократскиот сојуз на Македонија утре ќе го одржи 30. партиски Конгрес, на којшто ќе биде избрано новото партиско раководство.
Од опозициската партија известија дека Конгресот ќе има отворен и работен дел, ќе се разговара за идните, нови политики на партијата и ќе биде избрано новото раководство, однсно членовите на највисиките тела во СДСМ – Централниот и Надзорниот одбор.
На почетокот, ќе има обраќање на Венко Филипче, кој пред пет месеци ја презема претседателската функција од неговиот претходник, Димитар Ковачевски по големиот пораз што го претрпе партијата на парламентарните и претседателските избори.
Македонија
ВМРО-ДПМНЕ контра Кузеска: Оваа Влада вложува во модернизација, претходната потроши 5 милиони евра на службени возила
За разлика од ВМРО-ДПМНЕ која што вложува во модернизација, професионализација и осовременување на условите за работа во македонските институции, СДС и ДУИ во своето владеење за службени возила потрошиле повеќе од пет милиони евра, реагира ВМРО-ДПМНЕ на прес-конференцијата на портпаролката од СДСМ, Богданка Кузеска.
„Очигледно на функционерите од СДС изминатите седум години на власт, најважна им била сопствената комоција, а не и реалните проблеми на обичните луѓе“, велат од ВМРО-ДПМНЕ.
Додаваат дека во буџетот за 2025 година предвидено е зголемување на средствата за модернизација на МВР, одбраната, здравството, земјоделието, односно предвидени се зголемени средства за набавка на опрема во сите институции.
Кузеска претходно денес на прес-конференција обвини дека власта ги одби амандманите за поголеми плати, а ќе троши на мебел и скапи автомобили за функционерите.