Македонија
Грковска: Мора да ја вратиме довербата на младите во институциите

„Кога се во прашање младите, мора да се обединиме сите заедно и координирано, со системски пристап и со одржливи решенија да создадеме услови младите да сакаат да останат дома, во својата татковина и со своето знаење, умешност, креативност и младешки дух да дадат значаен придонес за развојот и напредокот на државата. А младите имаат навистина многу да дадат во унапредување на сите области во државата“, порача заменичката на претседателот на Владата задолжена за политики за добро владеење, Славица Грковска, на панел-дискусијата што се одржа по нејзина иницијатива, а на којa се разговараше за младинските политики, како и за потребите, можностите и предизвиците со кои младите се соочуваат.
На трибината учество зеде и Армен Грегоријан, постојан претставник на УНДП во Северна Македонија, како и директорот на Агенцијата за млади и спорт, Наумче Мојсовски, како и претставници на Националниот младински совет, Младинскиот образовен форум, претставници на здруженијата на студентите и на средношколците, Младинскиот ресурсен центар (ICan), Форумот за образовни промени и Сојузот за младинска работа.
„Наш приоритет во моментот е преку јакнењето на институциите, кои мора да бидат професионални, ефикасни, одговорни, отчетни и транспарентни и кои доследно ќе работат во согласност на принципите за добро управување, да ја вратиме довербата на граѓаните во системот. Да ја вратиме довербата на младите во институциите, вербата дека се можни промени на подобро и вербата дека и младите може да бидат активни фактори во промените“, нагласи вицепремиерката Грковска.
Таа го потенцира проблемот со иселување на младите од државата и изрази грижа што оваа тенденција продолжува и нагласи дека мора да ги подобриме состојбите во нашата држава за голем дел од младите да решат да останат тука.
„Сите ние одлучуваме во какво општество ќе живееме и каква иднина ќе градиме. Поединецот, Владата, институциите не може да постигнат многу доколку нема промена на свеста кај секој од нас. Најтежок процес во секоја трансформација на општеството е промената на свеста“, додаде Грковска.
На панел-дискусијата беше поздравена одлуката да се работи на Стратегијата за млади 2023 – 2027, процес што го води Агенцијата за млади и спорт со поддршка на УНДП, која треба на реален начин да ги дефинира идните политики, но и која ќе предвиди обврски за нејзина имплементација наредниот период за сите институции.
Истовремено, беше потенцирано дека фокусот во наредниот период треба да биде насочен кон подобрување на образовните политики, политиките за вработување на младите, но и истовремено на младите да не се гледа како на хомогена структура, туку политиките и мерките да бидат дефинирани според потребите на разните групи млади, во зависност од тоа дали доаѓаат од урбана или рурална средина, дали станува збор за млади со попречености, дали станува збор за млади со воспитно-социјални проблеми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родители и блиски на жртвите во Кочани бараат Обвинителството да објасни кој е обвинет, а кој ослободен

Родителите, роднините, пријателите на загинатите деца, како и нивните поддржувачи, излегоа на уште еден марш во Кочани, барајќи правда за 62-та жртви кои загинаа во трагичниот пожар во дискотеката „Пулс“. Тие упатија јавен апел до Јавното обвинителство – конечно и директно да ги информира за тоа кои лица се обвинети, а за кои е запрена постапката.
„Ние не сме правници, соопштението ни е дадено по членови и закони… и реално ништо не сфативме. Претпоставувам и другите родители, освен градоначалниците и обезбедувачите, не сфатиле“, рече Марија Петрушева, мајката на загинатиот Андреј Панов.
Таа истакна дека во понеделник официјално ќе испратат барање до Обвинителството, со кое ќе побараат лична средба со надлежните обвинители.
„Чувствуваме морална и човечка должност да се обратиме. Сметаме дека е од суштинско значење Обвинителството конечно и целосно да нѐ запознае со исходот од истражната постапка и со содржината на поднесениот обвинителен акт, кои лица се опфатени, а кои се изземени од одговорност, за да ги отстраниме сите дилеми кои се јавуваат кај нас. Неприфатливо е за нас да добиеме информации преку медиуми. Очекуваме транспарентност и директна комуникација“, порача Петрушева.
Таа изрази загриженост што, и покрај укажувањата, одредени лица сè уште не биле повикани ни на распит.
„Нашата болка е тешка, но борбата е праведна. Бараме одговорност и вистина“, додаде таа.
Со остар тон се обрати и Васка Стојанова, мајката на загинатиот Томче, која директно го обвини газдата на „Пулс“, познат како Деко, дека во моментот на пожарот се скрил, оставајќи ги младите да се борат за живот.
„Јас не знам зошто партиите преку медиумите кажуваат кој што и колку дал. Господ рекол кога левата рака дава, десната не треба да знае. И обратно. На нашите деца никој и ништо не им помогна, само помогнаа со тоа што им ја затворија вратата и што многу повеќе уништија. Да била вратата отворена, немало толку да бидат уништени и ќе се спасија. А не како оној монструмот Деко што се криел долу во скривницата, за да се спаси, а нашите деца ги оставил на милост и немилост“, изјави Стојанова со солзи во очите.
Присутните граѓани порачаа дека нема да престанат со протестите додека не добијат јасни и транспарентни одговори од институциите. Бараат правда, но и човечка емпатија – не правни термини и соопштенија кои, како што велат, никој од нив не ги разбира.
Македонија
Шведски експерти и преживеани од трагедија ќе понудат поддршка во Кочани

Од 16 до 18 јуни, во Кочани ќе престојува седумчлена делегација од Гетеборг, Шведска, составена од социјални работници, пожарникари и лица кои преживеале трагедија слична на онаа што неодамна го потресе овој град. Посетата е во организација на групата „Support Kocani“, која информира дека целта на настанот е споделување на искуства, поддршка и заедничко градење на сила и надеж.
Шведската делегација доаѓа како симбол на солидарност, откако пред 27 години, во нивниот роден град Гетеборг, избувна пожар во дискотека при што загинаа 63 лица – трагедија што длабоко го промени шведското општество.
„Ова не е само делегација, туку група луѓе кои лично ја почувствувале болката што ја носи ваква трагедија. Тие ќе споделат како низ годините се соочувале со последиците, како изградиле психолошка издржливост и како повторно нашле надеж“, велат од „Support Kocani“.
Тие додадоа дека посетата има силна симболика и за Кочани – како потсетник дека заедницата не е сама и дека солидарноста не познава граници.
„Ги пречекуваме со отворени срца. Тие се сведоци на болка, но и симболи на сила. Заедно ќе споделиме искуства, ќе создадеме мостови на поддршка и ќе покажеме дека од болката може да се роди нова енергија за живот“, велат „Support Kocani“.
Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.