Економија
Новата Opel Astra е прогласена за компактен автомобил на годината во Германија за 2023 година
• Најдобар компактен автомобил во Германија: најновата компактна класа на Opel го импресионира стручното жири
• Јасен победник: Astra и Astra Sports Tourer со значително водство пред конкуренцијата
Новата Opel Astra е прогласена за „Компактен автомобил на годината во Германија за 2023 година“. Независното стручно жири на „German Car Awards“ ја избра новата генерација на Astra и Astra Sports Tourer за најдобар автомобил од компактна класа во Германија, далеку пред конкурентите во овој сегмент.
Иновативните безбедносни технологии, кои Opel ги прави достапни за широк спектар на купувачи во компактната класа со новата Astra, го убедија жирито од 27 автомобилски експерти и новинари исто како и широката палета на погонски единици, вклучувајќи го и електрифицираниот plug-in хибрид со кои возачите на Astra можат да патуваат без штетни емисии. Жирито, исто така, го пофали привлечниот, прогресивен дизајн заедно со уживањето при возење и вредноста за парите што ги нуди Astra.
Престижната награда официјално беше доделена вчеравечер на церемонија во Bad Dürkheim, Германија.
„Наградата за „Автомобил на годината во Германија“ во компактната класа за Astra и Astra Sports Tourer уште еднаш покажува дека најновата генерација не само што е вистински предизвикувач туку го има и она што е потребно за да биде победник во секој поглед. “, изјави Andreas Marx, Бренд менаџерот на Opel во Германија.
„Opel Astra се издвојува во својот сегмент како вистински сеопфатен модел, што го убеди нашето жири во секој аспект. Патем, ова важи и за емотивните критериуми како што се дизајнот и уживањето при возење, каде што јасно се издвојува од конкурентните модели“, изјави Jens Meiners од жирито на GCOTY.
Astra и Astra Sports Tourer: Уживање при возење
За време на опсежните тест возења, судиите внимателно ја разгледаа новата Opel Astra. Беа земени предвид однесувањето при возење, употребливоста, удобноста и многу други аспекти. Дисциплини во кои блеска најновата генерација на бестселер од компактната класа. Со моќност од 133 kW/180 КС и силен вртежен момент од 360 њутн метри, електрифицираната Astra plug-in хибрид нуди чисто задоволство при возење (WLTP потрошувачка на гориво: 1,1-1,0 l/100 km, емисија на CO2 24-23 g/ km; и двете комбинирани). Забрзувањето од нула до 100 km/h е за само 7,6 секунди.
Интуитивното работење на системите за инфозабава и помош при возење е овозможено со новиот интерфејс HMI (Human-Machine Interface), јасно дизајнираниот, целосно дигитален cockpit Pure Panel со екстра широк екран на допир и основни прекинувачи, како на пример за клима уредот. Најсовремените технологии како што се приспособливите Intelli-Lux LED® Pixel Light предните светла без отсјај, со вкупно 168 LED елементи го прават возењето попријатно и побезбедно, особено во зимските месеци од годината. Ергономските седишта за возачот и совозачот, на пример обложени во Alcantara, обезбедуваат врвна удобност при патувањето со сертификат AGR (Aktion Gesunder Rücken e.V.).
Наградата „Автомобил на годината во Германија“ годинава се доделува по петти пат. Независното жири составено од експерти, моментално составено од 27 членови, ги избира соодветните победници во класата во пет категории – компактен, премиум, луксуз, нова енергија и перформанси.
Изборот на учесниците на натпреварот се врши врз основа на објективна цена и критериуми за достапност на пазарот. Изборoт за прв пат се одржа во 2019 година.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Ангеловска-Бежоска: Политики за поголема финансиска вклученост на жените се неопходни за забрзување на економскиот раст
Развој на политики кои ќе ги стимулираат жените да се вратат на пазарот на труд, поддршка од државата и работодавачите во однос на обврските на жената во семејството, адресирање на сите извори на родовите разлики и дизајнирање на нови иновативни технолошки решенија кои ќе овозможат поголема финансиска инклузија на жените, се политиките кои ќе придонесат кон поголема вклученост на жените во економијата, а со тоа и забрзување на економскиот раст, посочи гувернерката Анита Ангеловска-Бежоска во своето излагање на панел-дискусијата „Поддршка на жените во финансиите-рушење на бариерите”, во организација Економскиот факултет при Универзитетот во Тетово. Настанот го отвори ректорот на Универзитетот во Тетово проф. д-р Јусуф Зејнели, а се обрати и деканот на Економскиот Факултет, проф. д-р Брикенд Азири.
Гувернерката, на панелот на кој учествуваа и претседателката на Комисијата за хартии од вредност, Нора Алити, продеканката на Економскиот факултет Вјолца Хасани Лимани, главниот извршен директор на АД „Македонска берза“, Иван Штериев и претприемачката Гзиме Фејзи, се осврна подетално на пристапот на жените до финансиите и улогата во развојот на претприемаштвото. Таа истакна дека согласно податоците на последната анкета „Барометар на женското претприемништво“, околу 67,8% од анкетираните жени претприемачи сметаат дека пристапот до финансии под поповолни услови е една од значајните форми на поддршка за нивните бизниси. Кога ќе се погледнат статистиките за бројот на кредитокорисници, вредноста на земените кредити, како и лицата кои поседуваат платежни сметки кај нас, очигледна е доминацијата на мажите (околу 55% од вкупниот број кредитокорисници се мажи, 62% од вредноста на кредити на население отпаѓа на мажи, 90% од мажите наспроти 80% од жените имаат платежни сметки). Притоа, гувернерката ја истакна важноста на потребата за поголема финансиската инклузија на жените, но и финансиската едукација на жените, како основа за развој на женското претприемаштво, а со тоа и поттикнување на економскиот развој.
„Поголемата финансиска инклузија на жените претприемачи преку развивање вештини, знаења, изработката и следењето на соодветните податоци и пристапот до финансиски средства се основните цели на пилот-проектот со кој ќе раководи Народната банка со поддршка од Европската банка за обнова и развој (ЕБОР), преку кој ќе се градат мостови помеѓу јавниот и приватниот сектор за зголемување на финансиската вклученост на жените, што ќе придонесе за отворање нови бизниси и работни места и за придвижување на економскиот раст”, истакна гувернерката.
Покрај тркалезната маса, во рамки на работната посета на Универзитетот во Тетово беше потпишан Меморандум за соработка во областа на едукацијата и истражувањето, помеѓу Народната банка и Економскиот факултет при Универзитетот во Тетово, од страна на гувернерката и ректорот, проф. д-р Јусуф Зејнели. Меморандумот предвидува соработка помеѓу двете институции во реализација на научноистражувачки конференции, семинари, работилници и други настани, како и поддршка во унапредувањето на студиските програми за потребите на монетарната и макроекономската политика и банкарскиот систем и подобра едукација на студентите.
Економија
Позначајни движења кај каматните стапки на банките и штедилниците
Годишен раст на просечната каматна стапка на вкупните депозити од 0,65 п.п., при што во април таа изнесува 1,82%.
Просечната каматна стапка на вкупните кредити бележи годишен раст од 0,43 п.п. и изнесува 5,51%, извести Народната банка.
Најновото соопштение за позначајните движења кај каматните стапки на банките и штедилниците е достапно на следниот линк.
Економија
Ангеловска-Бежоска: Енергетскиот шок предизвика значајни притисоци кај инфлацијата и девизните резерви
Гувернерката на Народната банка, Анита Ангеловска-Бежоска, во своето обраќање на економскиот форум „По бурата: Управување со енергетската и прехранбената стабилност на Западен Балкан“, во организација на аналитичкиот центар „Фајненс тинк“, истакна дека енергетскиот шок со кој се соочи светот изминатите две години беше посилен од кризата во ‘70-тите години од минатиот век. Овој ценовен шок ги опфати сите енергенти, за разлика од 70-те кога главно се одрази на цените на нафтата. Степенот на глобализација сега е многу повисок, така што и повеќекратните ефекти се поголеми.
Овој раст на цените на енергентите придонесе за двојно зголемување на глобалната инфлација, додека кај земјите од Западен Балкан таа се зголеми четирикратно. Кога станува збор за нашата земја, како мала, енергетски зависна и енергетски неефикасна економија, таа беше силно погодена од енергетската криза, што се одрази и на инфлацијата, која достигна 14,2% на годишно ниво. „Домашните цени на енергијата се зголемија за 20% во две години, одразувајќи се значително на семејните буџети и зголемувајќи го ризикот од енергетска сиромаштија, слично како и другите земји во регионот“, истакна Ангеловска-Бежоска и посочи дека значително се зголемија и трошоците на компаниите. Сепак, во услови на стабилизација на цените на енергентите и големиот број преземени мерки од Народната банка, инфлацијата значително се намали до 3,4% во првиот квартал од 2024 година, а забележително стеснување е забележано и кај инфлацискиот диференцијал во однос на ЕУ.
„Покрај инфлацијата, се соочивме и со значајни предизвици и во надворешниот сектор, при што трговскиот дефицит достигна 27% од БДП во 2022 година, а ваквите промени во надворешната позиција очекувано создадоа притисоци на девизниот пазар. Народната банка, преку интервенции на девизниот пазар и други мерки, успешно ја зачува стабилноста на денарот. Девизните резерви на почетокот на кризата се намалија, но со нормализирањето на трендовите, тие забележаа раст, така што на крајот на 2023 година нивното ниво е повисоко за 40% во однос на преткризниот период.
Соодветната комбинација на монетарни и макропрудентни мерки придонесе за успешно одржување на стабилноста на девизниот курс и намалување на инфлацијата на едноцифрени стапки, порача гувернерката на Народната банка, Анита Ангеловска-Бежоска на економскиот форум.