Македонија
Основното јавно обвинителство вклучено во меѓународна акција против голема инвестициска измама со криптовалути

На барање на шпанските, германските и на финските власти, Европравда и Европол поддржаа меѓународна акција против голема инвестициска измама, што вклучува употреба на криптовалути.
Акцијата беше спроведена на 8 и 9 ноември во Албанија, Бугарија, Грузија, Северна Македонија и во Украина.
На барање на истражен судија од Основниот суд на Бамберг, за потребите на предмет оформен во Бамберг, Германија, преку македонскиот јавен обвинител за врски во Европравда, јавен обвинител од Основното јавно обвинителство за гонење организиран криминал и корупција и обвинители од обвинителството „Бамберг – Германија“ реализираа заеднички активности. Според наводите во доставеното барање, тамошниот суд донел одлука за спроведување истражна постапка против македонски државјани за кои постои основано сомнение дека сториле кривично дело измама.
Имено, во 2016 година, со цел да извршува заеднички континуирани кривични дела на измама во форма на т.н. сајбертрејдинг, била создадена организирана криминална група, на која припадници станале многу лица од голем број европски земји, меѓу кои и осомничените. Групата инсталирала голема мрежа лажни фирми и управувала со многубројни трејдинг-платформи. Воедно, со цел да ги извршува делата, отворила повикувачки центри, организирани во т.н. дескови според мајчиниот јазик на клиентите.
Членовите на групата во улога на агенти на разни домени им се обраќале на заинтересирани лица и создавале привид дека тргуваат со разни финансиски инструменти, особено со бинарни опции, ЦФД, форекс и криптовалути. Користејќи т.н. афилијативен маркетинг и манипулативни реклами, групата врбувала многубројни клиенти да пополнат контактен формулар, во кој ги оставале своите лични податоци. „Агентите“ потоа преку повикувачките центри телефонски стапувале во контакт со интересентите и им ветувале високи добивки за првична уплата од 250 евра. Овие центри функционирале во две одделенија – одделение со конверзиони агенти, чија задача била да го убедат клиентот да изврши прва уплата, и одделение со ретенциони агенти, кои понатаму се грижеле за клиентите, односно на жртвите лажно им ја прикажувале нивната уплата и можностите што им се нудат преку разни финансиски продукти. Најголем број вакви центри се отворени во Албанија, Грузија, Северна Македонија и во Украина.
Откако средствата биле уплаќани, „агентите“ симулирале наводна трговија со финансиски инструменти, која никогаш не се случувала. Уплатените пари членовите на групата ги присвојувале за себе и според пресметките на Европравда, причинетата штета се проценува на 50 милиони евра годишно.
Во Скопје од 2019 година групата инсталирала два повикувачки центра, што работеле на истиот начин, а каде што осомничените се јавуваат како сопственик и управители на повикувачките центри. При извршените претреси одземени се уреди за електронска комуникација, а јавните обвинители ги сослушаа осомничените лица.
Во рамките на целата акција претресени се 15 повикувачки центри (шест во Албанија, пет во Грузија, три во Украина и еден во Северна Македонија), како и 27 други локации, а пет осомничени, од кои четири во Албанија и едно во Грузија, се уапсени. При претресите одземени се околу 500 електронски уреди, 344.101 евро во готовина, мобилни телефони, банкарски сметки, паричници за криптовалути, имот, лични документи и банкарски картички, како и стотици други документи. Во акцијата, освен надлежните органи на државите во кои беа спроведени активностите, учествуваа и Финска, Германија, Латвија, Шведска и Шпанија.
Бројот на жртвите на оваа голема онлајн-измама се проценува на стотици илјади, што укажува на потребата потенцијалните инвеститори да бидат дополнително внимателни при онлајн-инвестирање и да проверуваат дали веб-страниците припаѓаат на правните лица што легитимно работат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.