Македонија
Советник ја бара Арсовска да дојде на седница: Ова е невиден циркус, џабе седиме овде
Десет часа трае седницата на Советот на Град Скопје, каде се разгледуваат програми за работа на јавни установи и претпријатија, основани и менаџирани од градот. Кворум за работа има, но не и кворум за изгласување. Најголем дел од предлозите се отфрлаат, а образложенијата траат и по десетина минути. Советникот Филип Јаневски од партијата Глас за Македонија, дел од советничката група на ВМРО-ДПМНЕ, посочи дека џабе е сè кога предлагачот, градоначалничката Данела Арсовска, не е во салата.
„Во последниве 10 часа седиме овде поради долги образложенија, што е во ред. Градоначалничката на Град Скопје не присуствува на седниците. Не и е гајле дали сопствените програми на кои е предлагач ќе поминат, дали има кворум за работа, не и е гајле за ништо. Седиме овде, секторите даваат долги образложенија, уште малку ‘Војна и мир’ ќе ја прочитаат овде… Џабе е тоа кога градоначалничката не е тука, програмиве не поминуваат. Не се усогласени со ребалансот што го изгласавме вчера. Џабе седиме овде. Голем дел од нас имаме работни обврски, не поминува ништо. Имаме по 20 минути образложенија. За што ги слушаме кога предлагачот не е тука?! Ова овде е невиден циркус! Извинете, мене ми е срам што го кажувам ова!“, кажа Филип Јаневски од партијата Глас за Македонија.
Трајко Славески, претседавач со седницата, даде пауза.
„Давам 10 минути пауза за да дојде градоначалникот во салата и да продолжиме со работа“, кажа тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска-Давкова: Времето на жените доаѓа, срамота е што 30 години сме немале жена претседателка или премиерка
Во рамките на активностите на кандидатката за претседателка на државата, Гордана Сиљановска-Давкова, таа се обрати на трибината на тема „Жени“ која се одржа во Јавна соба.
„Во мојата програма има посебен дел посветен на жените. Подолго светот живеел како патријархат отколку матријархат. Повеќе жени во политика, повеќе гаранции за помалку насилство. Срамота е 30 години да не сме имале жена претседателка, жена премиерка. Да им ставиме крај на Венецијанските трговци“, порача Давкова.
Како што додаде, жените имаат што да покажат, имаат вулканска сила и мажите треба да се инспирираат од нив.
„Времето на жените доаѓа. Сега е време за машка еманципација. Македонија е во женски род, политиката е во женски род. Женскоста е квалитет неискористен. Промените наскоро доаѓаат“, рече Давкова на трибината.
Македонија
Оштетени билборди и рекламни паноа на политичка партија во Тетово
Вчера на улицата ,,Киро Ристовски-Дрнц” и на улица „Маршал Тито” во Тетово биле оштетени билборди и рекламни паноа од парламентарните избори од една политичка партија.
Се преземаат мерки за расчистување на случајот, објави МВР.
Македонија
Демократски сојуз предлага платите на полицајците да бидат колку оние на обвинителите и судиите
Демократски сојуз на сите полицајци и припадници на службите за безбедност, им го честита 7 Мај, ДЕНОТ НА ПОЛИЦИЈАТА и им посакува успешно извршување на сложените безбедносни задачи.
Празникот се совпаѓа и со изборите за претседател на државата и за пратеници, каде за жал, како што велат од патијата, улогата на полицијата е клучна за обезбедување стабилност и услови за мирни и фер избори.
„Овие денови се клучни за да спречите нерегуларности, притисоци, купување на гласови, организирање на „Бугарски воз“ или нарушување на изборниот процес на кој било начин (насилство итн). Инаку полицијата и службите за безбедност извршуваат тешки, одговорни и сложени безбедносни задачи, но последните години се со ниски примања. Така, главен оперативец задолжен за спречување и откривање на тешки кривични дела прима плата од околу 45 илјади денари, а јавен обвинител околу 130 илјади денари“, додаваат од партијата на Павле Трајанов.
Предлагаат двојно зголемување на платите на полицијата и нивно усогласување со платите на обвинителите и судиите.