Јапонија ќе испрати тим на трговски преговори, потврди американскиот претседател Доналд Трамп, додавајќи дека вчера разговарал со јапонскиот премиер Шигеру Ишиба. Ишиба, пак, рече дека го повикал Трамп да ја преиспита политиката за воведување царини.

Одлуката на Трамп да воведе давачка од 25 отсто за увоз на автомобили и реципрочни царини од 24 отсто за други јапонски стоки се очекува да и нанесе тежок удар на јапонската економија зависна од извозот. Аналитичарите предвидуваат дека повисоките царини би можеле да го намалат економскиот раст до 0,8 отсто.

Земјите од целиот свет разговараат со нас. Се поставуваат тешки, но праведни параметри“, напиша Трамп на социјалната платформа „Вистина“. Секретарот за финансии Скот Бесент објави дека Трамп ги задолжил него и американскиот трговски претставник Џејмисон Грир за трговски преговори со Јапонија.

Јапонскиот премиер изјави дека во телефонски разговор му рекол на Трамп дека неговата политика на воведување царини е многу разочарувачка и го повикал да ја преиспита. „Значи, имаме одлични односи со Јапонија. Така и ќе остане“, им рече Трамп на новинарите потоа.

Американскиот претседател минатата недела објави дека ќе воведе основна царина од 10 отсто за целиот увоз во САД и уште повисоки стапки за десетина земји, вклучително и некои од најголемите трговски партнери на САД, што внесе немир на глобалниот пазар и ги збуни американските сојузници.

Ишиба во неделата вечерта ги повика клучните министри одговорни за економијата, вклучително и министерот за финансии Кацунобу Като, и им наложи внимателно да го следат и да реагираат на развојот на пазарот, објави јапонскиот весник Никеи.

Бесент изјави за Fox Business Network дека сè уште не видел никаков предлог од Токио, но дека очекува преговорите за намалување на нетарифните трговски бариери со Јапонија да бидат успешни.

„Јапонија е меѓу 50 до 70 земји кои досега ѝ пристапија на администрацијата на Трамп и побараа преговори“, рече Бесент.

„Јапонија е многу важен воен сојузник. Тие се исто така многу важен економски сојузник и САД имаат долга историја со нив. Јас би очекувал Јапонија да добие предност само затоа што тие реагираа многу брзо“, додаде тој. Бесент истакна дека Кина се изолирала со возвраќање на царините на Трамп.

„За земјите кои нема да возвратат, го достигнавме највисокото ниво на царини и се надевам дека со добри преговори на крајот ќе го постигнеме нивното намалување“, изјави Бесент за Fox Business Network.

Додека Пекинг одговара на најновите закани на американскиот претседател Доналд Трамп за нови царини, пропагандниот апарат на кинеската Комунистичка партија влезе во дебата со полна сила.

„Кинеските контрамерки се оправдани, законски, силни и воздржани“, се вели во коментарот објавен денеска на државниот „Пиплс дејли“, додека американските царини ги толкува како обид да се наметне „американска хегемонија“.

Во написот со наслов „Притисокот и заканите дефинитивно не се вистинскиот начин за справување со Кина“, „Пиплс дејли“ ја обвинува администрацијата на Трамп за „злоупотреба на оружјето од царини“ и ја прикажува Кина како „бранител на мултилатерализмот“.

Коментарот, исто така, ја доведува во прашање ефикасноста на трговската војна што ја води Вашингтон: „Поминаа повеќе од една или две години откако САД еднострано испровоцираа трговска војна против Кина. А кои се резултатите?“, пишува весникот.

„Кинеската надворешна трговија покажа силна отпорност, а кинеската економија продолжи да се развива. За разлика од тоа, САД не постигнаа цели како што се намалување на трговскиот дефицит и враќање на производството, туку им наштетија на сопствените компании и потрошувачи“, се вели во коментарот.

Кинеското Министерство за трговија соопшти дека никогаш нема да ја прифати „уценувачката природа“ на американскиот пристап и вети дека ќе се бори против новите царини „до крај“.

Министерството ја нарече изјавата на американскиот претседател Доналд Трамп за евентуално дополнително зголемување на царините за 50 отсто на кинески производи „грешка над грешка“.

Повика да се повлечат сите планови за воведување царини и да се решат разликите меѓу Кина и САД преку дијалог.