Свет
Ученик во Британија пропуштил две години на училиште поради продолжен ковид
Тинејџерот Хејден од Елвингтон, близу Довер, претходно здрав и фит, пропуштил речиси две години на училиште поради продолжениот ковид. Тој вели дека неговиот живот „целосно се променил“ откако се заразил со коронавирусот во декември 2020 година, пренесува „BBC“.
15-годишното момче порано уживало во спортови како што се пливање и џудо, но сега мора да користи инвалидска количка и главно е врзано во кревет поради симптоми како што е екстремен замор.
„Секој ден кога ќе се разбудам сум навистина исцрпен. Како да се разбудив и истрчав неколку маратони“, вели Хејден.
Кетрин, мајката на Хејден, вели дека се чувствува како никој да не може да му помогне на нејзиниот син.
„Како моето дете да е на клупата и само го гледа своето детство како игра“ – вели Кетрин.
Д-р Дејвид Страјн, виш предавач на медицинското училиште на Универзитетот во Ексетер и експерт за долгорочен ковид, рече дека не се знае многу за феноменот.
„Веруваме дека долгорочниот ковид кај многу луѓе е предизвикан од фактот што вирусот целосно не го напуштил телото“, вели тој.
Ова е причината зошто луѓето остануваат во маѓепсан круг на „болести слични на грип“.
Повеќе од два милиони луѓе имале долгорочни симптоми на ковид, покажуваат бројките на британската влада, а околу 330.000 луѓе велат дека нивните дневни активности се ограничени.
Кетрин отвори веб-страница „GoFundMe“ за да собере 20.000 фунти за да плати приватен специјалистички третман за Хејден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Конзервираната храна со поминат рок ги труе жителите на Газа
Јадењето конзервирана храна со поминат рок во Појасот Газа поради големиот недостиг на храна предизвика труење кај Палестинците, објави во понеделникот Канцеларијата за медиуми на владата на Газа.
Канцеларијата наведува дека „луѓето јадат конзервирана храна со истечен рок на траење, што предизвикува голем број труења“.
„Гладот и болестите се во пораст меѓу населението во Газа, особено на децата“, се додава во соопштението.
Канцеларијата го обвини Израел дека спроведува систематска политика на гладување и спречување на жителите на Газа да добијат медицински третман.
Исто така, се додава дека цел на израелските сили биле општинските екипи, кои се обидувале да ги обноват бунарите за вода во регионот.
„Израелската армија директно гаѓаше и тимови за цивилна заштита намерно онеспособувајќи ги“, се наведува во соопштението.
Поради војната и израелските ограничувања, кои го прекршуваат меѓународното право, Палестинците во Појасот Газа, особено во северните области, се соочуваат со екстремен недостиг на храна, вода и лекови, што доведува до гладување.
Мартин Грифитс, потсекретарот за хуманитарни прашања на Обединетите нации, на 12 јуни предвиде дека половина од населението на Појасот Газа ќе се соочи со смрт и глад до средината на јули доколку не се укине блокадата со хуманитарната помош.
Прекршувајќи ја резолуцијата на Советот за безбедност на Обединетите нации, со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Појасот Газа, почната по нападот на палестинската група на отпорот Хамас на 7 октомври минатата година.
Оттогаш повеќе од 37.500 Палестинци се убиени во Појасот Газа, повеќето жени и деца, а околу 86.000 се ранети, според локалните здравствени власти.
Израел е обвинет за геноцид пред Меѓународниот суд на правдата, чија последна одлука беше да им се нареди на израелските власти веднаш да ја прекинат воената операција во јужниот град Рафа.
Свет
Сестрата на кралот Чарлс итно примена во болница
Британската принцеза Ана добила лесни повреди и потрес на мозокот по инцидентот во нејзиниот имот во Геткомб парк минатата ноќ и моментно е во болница, соопшти Бакингемската палата.
„Принцезата Ана претрпе полесни повреди и потрес на мозокот по инцидентот во Геткомб парк вчеравечер. Нејзиното кралско височество останува во болницата ‘Саутмед’ во Бристол како мерка на претпазливост за набљудување и се очекува целосно и брзо закрепнување“, соопшти палатата.
Во соопштението се наведува дека кралот Чарлс е информиран за повредите на сестра си.
„Целото кралско семејство е со принцезата и се надеваат на нејзино брзо закрепнување“, заклучи Бакингемската палата.
Свет
Нетанјаху доби предупредување од комисијата што го истражува купувањето подморници од страна на владата
Израелската комисија, која спроведе истрага за сомневањата дека имало злоупотреби при владината набавка на подморници и ракетни бродови од Германија, денеска упати предупредување до израелскиот премиер Бенјамин Нетанјаху дека ја искористил својата позиција за да ја одобри набавката, без да ја следи пропишанота постапка.
Комисијата го информира Нетанјаху дека врз основа на собраните докази досега утврдила дека тој ја искористил својата позиција како премиер помеѓу 2009 и 2016 година за да добие зелено светло за купување, без да следи соодветна процедура, објави „Ројтерс“.
Израелскиот премиер Бенјамин Нетанјаху денеска изјави дека набавката на подморници од Германија е клучно прашање за безбедноста на Израел со цел да се одбрани од Иран, кој, како што наведе, се обидува да ја уништи еврејската држава.