Култура
Концерт на Ивона Нацевска и Андреј Наунов
Ивона Нацевска е млада оперска пејачка, уметник, кој својот талент, посветеност и љубов кон музиката ги покажува од рано детство. На своја 5-годишна возраст станува член на детскиот хор „Лале“ во Тетово, подоцна и во ГЖМХ „Менада“.
Низ нејзиното музичко образование таа зема учества на концерти и многубројни натпревари во Македонија, Србија и Бугарија.
Нацевска е родена на 12 март 1999 во Тетово и уште од најрана возраст започнува да ја изучува сериозната музика, најпрво како пијанист, посетувајќи го нејзиното нижо музичко училиште во градот, а подоцна како вокален изведувач, поттикната од големите оперски изведувачи.
Водена од забава и љубопитност посетувајќи го детскиот хор „Лале“, Ивона со големо нетрпение и радост влегува во светот на музиката.
Дипломирањето на Ивона на Факултетот за музичка уметност во Скопје е проследено со нејзин солистички концерт во фоајето на Национална опера и балет.
Во текот на изминативе години Ивона има остварено награди на меѓународни и државни натпревари.
Концерти посветени на руската романска во Софија (Бугарија), оперски гала концерт „Коста Трпков“, концерт на „Живеј со музика“, „Креативни точки“ – 2017, „Креативни точки“ – 2019, „My Way“ – 70 години на маестро Ивица Зориќ, се само дел од настаните на кои Нацевска има оставено свој белег и кој упорно чекори и тежнее кон поголеми музички остварувања.
Ивона Нацевска моментално е вработена во НУ Национална опера и балет.
Андреја Наунов е роден во Кочани. Дипломира на Факултетот за музичка уметност-Скопје на одделот пијано во класата на доцент-проф. Симон Трпчески, во чија класа е и на постдипломски студии.
Добитник е на неколку државни награди по камерна музика и пијано а има и остварено бројни солистички рецитали, настапи со Македонската филхармонија и оркестарот на Македонската опера и балет.
Еден од по значајните настапи се турнеите со пијанистот и негов професор Симон Трпчески на територија на Р Македонија.
Дава свој придонес и во хуманитарните манифестации како концертни изведби, претстави и сл.
Покрај пијанистичката кариера напоредно се реализира и во вокалните ансамбли. Еден од нив е ансамблот „Вокали” со кој настапува на Охридско лето, Скопско лето, ДММ, снимање на филмска музика. Исто така настапува и со вокалниот ансамбл „Хераклеа” на Дубровничките летни игри, Охридско лето, Вино фестивал-Нови Сад.
Како корепетитор тој има извонредни можности да ги истакнува своите изведувачки вештини на пијано низ завиден број настапи во државата со различни ансамбли и солисти во Македонија, како и во странство (Швајцарија, Австрија, Србија, Германија, Унгарија, Романија, Словенија).
Како свои соработници во концертната –корепетиторска дејност има соработка со првенците на МОБ: Славица Галич, Весна Гиновска, Ѓорѓи Цуцковски, Борис Трајанов, Ана и Игор Дурловски. Со инструменталистите Микајло Куфајанакис, Климент Тодоровски и уште многу други.
Покрај пијанистичката, корепетиторската, вокалната кариера се реализира и во полето на диригирањето, поточно со хорот на црквата Пресвета Богородица од Скопје, со кој хор во 2012 и 2016 година оствари извонредни концерти во Виена во дворецот Шонбрун и во една од најголемите цркви во Виена „Св. Петар”. Во 2015 оствари турнеја низ Италија со хорот имајќи неколку концерти во Венеција, Бари, а хорот беше и дел од чествувањето на Св. Кирил и Методиј во Рим.
Во 2018 имаше мошне успешна агенда на неколку фестивали низ Европа, како „Епидариус” во Хрватска, фестивалот на класика во Италија и „Музика” во Германија.
Во мај 2013 година беше член во жири за пијанисти на Меѓународниот фестивал за Славјанска музика во Москва, каде што и оствари неколку настапи низ Москва, вклучувајќи го отворањето на фестивалот.
Поради своите извонредни способности и во актерството искоординирано со своите пијанистички способности во последните 6 години тој зема учество и остварено преку 700 претстави и други перформанси во детски проекти на Десанка Глигоријевиќ.
Во септември 2019 учествува на фестивалот „Мокрањчеви дани” во Неготин со хорот „Вардар” од Скопје и добива награда за најдобра изведба на негово дело од домашен репертоар.
Во 2014 година се запишува на оркестарско диригирање на ФМУ во класата на Саша Николовски-Ѓумар, и во септември 2019 ја диригира операта „Рита” во Македонска Опера и Балет како своја дипломска работа.
Во меѓувреме, додека студира на диригирање автор и реализатор е на првата стендап опера во која учествува како сценарист и диригент со целокупниот ансамбл на МОБ. Истата година настапува како дел од големиот јубилеј на маестро Томислав Шопов, 50 години уметничка дејност, со солистите Весна Гиновска и Борис Трајанов.
Вработен е во Македонската опера и балет, а од 2009 година работи како надворешен соработник на Факултетот за музичка уметност- Скопје.
Програма:
1. В.Белини – Циклус “Sei Ariette” – „Malinconia, Ninfa gentile“
2. В.Белини – Циклус “Sei Ariette” – „Vanne, o rosa fortunate“
3. В.Белини – Циклус “Sei Ariette” – „Almen se non poss’io“
4. В.Белини – Циклус “Sei Ariette” – „Per pietà, bell’idol mio“
5. В.Белини – Циклус “Sei Ariette” – „Ma rendi pur contento“
6. В.Белини – Арија на Џулиета од Операта „Капутели и Монтеки“ – „Oh, quante volte“
Исполнува: Ивона Нацевска
7. Џ.Капуро – Наполитанска песна „О sole mio“
Исполнува: Влатко Груевски
8. Ж.Бизе – Арија на Кармен од Операта „Кармен“
Исполнува: Мартина Аврамоска
9. Ф.Обрадорс – Шпанска песна „Chiquitita la novia“
Исполнува: Биљана Дабеска
10. С.В.Рахманинов – “Здесь Хорошо”
11. В.Ди.Киара – Шпанска песна „ La Spagnola“
12. Е.Kaлман – Aрија на Жозефина од Операта „Царица Грофица“ – “Мein Traum, mein Traum“
Исполнува: Ивона Нацевска
13. Е.Калман – Терцет од Операта „Војводката на чардашот“
Исполнуваат: Мартина Аврамоска, Влатко Груевски и Ивона Нацевска
14. Џ.Верди – Дует од Операта „Травијата“
Исполнуваат: Ивона Нацевска и Влатко Груевски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.