Регион
Вучиќ за претседателот на Азејбејџан: Порано немаа време за него, но сега сите ги интересира неговиот гас
Илман Алиев е најпопуларниот човек во Европа – сега им е најдраг гостин на оние кои досега немале време за него, но во моментов сите се заинтересирани за „неговиот“ гас, изјави српскиот претседател Александар Вучиќ на заедничката прес-конференција со претседателот на Азербејџан, Алиев.
На почетокот на обраќањето по потпишувањето на заедничките договори, Вучиќ истакна дека Азербејџан има огромни резерви на природен гас и дека Србија ќе се обиде да обезбеди енергетска безбедност во партнерство со оваа земја.
Нагласувајќи ја моменталната популарност на Алиев поради резервите на гас, Вучиќ додаде дека е малку љубоморен.
„Ме викаат само поради Косово“, рече на шега Вучиќ, додавајќи дека Алиев не се променил, другите се промениле, а претседателот на Азербејџан секогаш ја штител својата земја и нејзините интереси.
Тој најави дека за дваесет дена ќе престојува во неформална посета со неколку министри во Баку, главниот град на Азербејџан, кога ќе бидат постигнати нови економски договори.
Нагласувајќи дека соработката оди добро, Вучиќ изјави и дека компаниите од Азербејџан кои ја изградиле патната делница Љиг-Прељина ја завршиле навреме, што е ретко, но и дека Србија го исплатила долгот за тој проект година и пол пред тоа.
Во своето обраќање Алиев рече дека двете земји секогаш меѓусебно го поддржувале територијалниот интегритет и суверенитет.
Претседателот на Србија, Александар Вучиќ, и претседателот на Азербејџан, Илхам Алиев, денеска се согласија дека двете земји цврсто ќе го штитат својот територијален интегритет, ќе си помагаат меѓусебно на меѓународната сцена, ќе ја почитуваат Повелбата на Обединетите нации и дека се подготвени да соработуваат во полето на енергијата.
„Разговаравме за соработка во областа на енергетиката, бидејќи Азербејџан извезува околу 22 милијарди кубни метри гас, половина од тоа во европските земји“, рече Вучиќ.
Според него, затоа Србија гради интерконектор со Бугарија за да може да купува гас и од своите пријатели во Баку.
Вучиќ рече дека се разгледува и можноста за купување струја од Азербејџан, преку приклучување на подводниот кабел, кој оди под Црното Море.
Претседателот на Азербејџан, Илхам Алиев, изјави дека тој и Вучиќ ги врзува пријателство, што е основен услов за развој на односите меѓу двете земји.
„Документите што ги потпишавме се правна основа за нашите односи и се однесуваат на стратешко партнерство“, рече Алиев.
Тој изјави дека неговата земја го користи правото на самоодбрана, а ги развива и обновува ослободените територии „од пепел“, алудирајќи на конфликтите во Нагорно Карабах.
„Со Вучиќ разговаравме за билатерални, регионални прашања и за оние од меѓународната агенда“, рече Алиев и најави дека повторно ќе го посети Белград, откако ќе биде домаќин на претседателот на Србија во Азербејџан.
Двете делегации потпишаа седум договори, меѓу кои и изјава за стратешка соработка потпишана од претседателите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Нови детали за малата Данка: нејзината ДНК не била пронајдена на автомобилот со кој била удрена
Како што пренесува „Нова.рс“, на ниеден од предметите што биле земени за помош во истрагата не биле пронајдени биолошки траги од двегодишната Данка Илиќ од Србија.
Српскиот портал напиша дека досега се пронајдени повеќе од 400 траги во службеното возило за кое се сомневаат дека го користеле Дејан Драгојевиќ и Срѓан Јанковиќ кога, според нивното признание, го удриле девојчето. Обвинителството пред неколку дена ги доби резултатите од новите вештачења.
„Од внатрешноста на службениот автомобил во Бор се земени повеќе од 500 траги, како и траги од надворешната страна на автомобилот. Досега вештачењата покажаа дека нема трага од ДНК на Данка Илиќ ниту во самиот автомобил ниту на надворешните делови од возилото“, пишува „Нова.рс“ повикувајќи се на Вишото јавно обвинителство.
Медиумот потсетува дека осомничените работници на фирмата „Водовод“ од Бор, Јанковиќ и Драгијевиќ, биле на работна задача на 26 март кога во Бањско Поле исчезна двегодишно девојче. Според признанието на Драгијевиќ, девојчето го удриле со службеното возило, го задавиле и го фрлиле на дива депонија, од каде што два дена подоцна Дејан со својот татко (73) и сега починатиот брат Далибор (40) наводно го преселиле телото на друга, непозната локација.
Телото на двегодишната Данка сè уште не е пронајдено.
Регион
Се урна конструкција на рингишпил, повредени 13 деца, од кои едно е во животна опасност во Куршумлија
Во Куршумлија денеска се случила несреќа кога на локалниот саем се урнала конструкцијата на рингишпилот, пренесуваат српските медиуми.
Според написите, повредени се 13 деца, од кои едно потешко.
Станува збор за девојче, чиј живот е во опасност и има сериозни повреди на главата и ‘рбетниот столб.
Таа била итно префрлена во КЦ „Ниш“ на Одделот за неврохирургија.
Седум деца се во друга болница, каде што во тек е понатамошна дијагностика, а другите деца се полесно повредени, пишуваат тамошните медиуми.
Регион
Шји Џјинпинг: Србија е првата земја од Европа со која ќе изградиме заедница со заедничка иднина
Претседателот на Народна Република Кина, Шји Џјинпинг, изјави дека во денешните разговори со претседателот Вучиќ е постигнат значаен консензус и дека Србија ќе биде првата земја од Европа со која ќе изгради заедница со заедничка иднина.
„Заеднички објавивме дека ќе изградиме заедница меѓу Кина и Србија со заедничка иднина во новата ера, што ќе отвори ново поглавје во историјата на кинеско-српските односи. Пред осум години Србија стана првиот сеопфатен стратешки партнер на Кина во Централна и Источна Европа, а денеска станува првата европска земја во која ќе изградиме заедница со заедничка иднина“, рече Шји во говорот по размената на потпишаните меѓудржавни договори меѓу Србија и Кина во Палатата „Србија“.
Тој посочи дека како вистински пријатели и добри партнери Кина и Србија уживаат политичка доверба, која е силна како карпа.