Европа
ЕУ планира да замрзне дел од средствата на Унгарија поради проблеми во владеењето на правото
На Унгарија ѝ се заканува загуба на повеќе од 13 милијарди евра од фондовите на Европската Унија (ЕУ) по оценката на Европската комисија дека Будимпешта не ги спроведе ветените реформи за сузбивање на корупцијата на високо ниво и зајакнување на независноста на судството.
Владата на десничарскиот популист Виктор Орбан, која со години е во конфликт со Брисел поради обвинувања за пад на демократијата, би можела со тоа да ги изгуби многу потребните пари, додека се соочува со пад на вредноста на форинтата, пораст на инфлацијата и забавување на економскиот раст, пишуваат светските медиуми.
Европската комисија најверојатно ќе го одобри унгарскиот план за закрепнување по пандемијата следната недела за да ја задржи отворена можноста за добивање средства од ЕУ, но исплатите нема да бидат извршени додека Будимпешта не ги исполни сите договорени услови, соопшти „Ројтерс“, цитирајќи извори од Комисијата.
Според шемата за закрепнување на ЕУ, Унгарија би можела да добие грантови од 5,8 милијарди евра. Тие пари, според агенцијата, ѝ се многу потребни на Будимпешта во екот на порастот на инфлацијата, забавувањето на економскиот раст и зголемувањето на трошоците за задолжување.
Можноста Европската комисија следната недела да задржи вкупно 13,3 милијарди евра наменети за Унгарија следуваат по повеќемесечните преговори со владата на премиерот Виктор Орбан поради загриженоста на ЕУ за корупцијата на високо ниво, независноста на судовите, невладините институции и медиумите, и малцинските права.
Унгарија требаше да преземе акција за некои од овие клучни прашања до 19 ноември, според претходен договор со комисијата, објави „Ројтерс“, истакнувајќи дека европските претставници рекле дека прелиминарната проценка покажала дека Будимпешта не направила доволно.
Брисел и Будимпешта се судрија околу владеењето на правото со години, а Унгарија е обвинета дека го користи правото на вето на ниво на Советот на ЕУ за да обезбеди отстапки и средства, истакнува Еуроњуз, додавајќи дека Унгарија во моментов го блокира усвојувањето на глобалната корпоративен данок договорен минатата година од повеќе од 130 земји и најави дека ќе стави вето на планот на Комисијата за издавање заеднички обврзници за собирање 18 милијарди евра помош за Украина.
Унгарија е изложена на ризик да ги загуби средствата од ЕУ, бидејќи владата и централната банка се борат да го спречат падот на вредноста на форинтата, која падна за повеќе од 2 отсто во однос на еврото од вторникот, 22 ноември, според Блумберг, истакнувајќи дека Последниот пад на унгарската валута ги избриша добивките на подолг рок.
Будимпешта сега се соочува со зголемени критики бидејќи владата на Орбан со години ги оспорува демократските и мултикултурните вредности на ЕУ и исто така се соочува со обвинувања за уцена поради отпорот на мерките на ЕУ за низа прашања – од имиграција до санкции против Русија, пренесе Денес.рс.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Лавров го објави условот под кој Русија ќе се согласи на прекин на огнот во Украина
Соединетите Држави ќе се соочат со „опасни последици“ доколку продолжат да ја зголемуваат воената помош за Украина, наместо да го поддржат предложеното руско решение со кое Москва ќе преземе делови од територијата, изјави рускиот министер за надворешни работи Сергеј Лавров во ексклузивно интервју за американски „Њузвик“.
Повеќе од две и пол години откако Владимир Путин нареди „специјална воена операција“ против Украина, рускиот министер за надворешни работи Сергеј Лавров рече дека Кремљ нуди остварлив план за запирање на крвопролевањето и обнова на европската безбедносна архитектура. Тој го обвини НАТО предводен од САД дека прво го посеал семето на војната пред една деценија и дека продолжил да го разгорува огнот.
„Русија е отворена за политичко-дипломатско решение кое треба да ги отстрани основните причини за кризата“, рече тој. „Треба да се стремиме да го прекинеме конфликтот, а не да постигнеме прекин на огнот“, рече Лавров.
Рускиот план предвидува Украина да ги отстапи покраините Донецк, Херсон, Луганск и Запорожје, кои во поголемиот дел, но не во целост, се под руска контрола, а кои Москва формално ги анектираше по меѓународно оспоруваниот референдум во септември 2022 година, како и Крим, кој Русија го зазеде и го анектираше со слично гласањњ во 2014 година.
Киев, исто така, ќе мора да се откаже од членството во НАТО алијансата, според руските водачи. Лавров вели дека основата за прекин на огнот би можеле да бидат преговорите во Истанбул во 2022 година, кои вклучуваа откажување од членството во НАТО и признавање на независноста на руските делови од автономните региони Доњецк и Луганск, но сега вели дека новите преговори треба да ја земат предвид „состојбата на терен“.
Украина и западните сојузници наместо тоа бараат безусловно повлекување на Русија, додека Москва рече дека ескалацијата на конфликтот го приближува НАТО до директен конфликт со Русија, која има најголеми резерви на нуклеарно оружје во светот и е една од двете нуклеарни суперсили, заедно со САД.
„Во моментов, колку што можеме да видиме, враќањето на мирот не е дел од планот на нашиот противник. Зеленски не го отповикал указот за забрана на преговорите со Москва“, рече Лавров.
„Вашингтон и неговите сојузници во НАТО обезбедуваат политичка, воена и финансиска поддршка на Киев за да продолжи војната. Тие дебатираат за овластување на украинската војска да користи западни ракети со долг дострел за да напаѓа длабоко во руската територија. Играње со оган во овој начин може да доведе до опасни последици“, предупредува Лавров.
Европа
Масовен хакерски напад врз руски државни медиуми; Украинците: Ние го изведовме
Извор од украинската влада соопшти дека украинските хакери се одговорни за големиот сајбер напад врз руската државна медиумска компанија ВГТРК што се случи денеска, што се совпадна со 72-от роденден на рускиот претседател Владимир Путин.
Портпаролот на Кремљ, Дмитриј Песков, претходно потврди дека ВГТРК била цел на сајбер напад без преседан, додавајќи дека експертите работат напорно за да откријат кој е одговорен и дека ВГТРК работи на надминување на последиците од нападот.
ВГТРК, која ги поседува и управува со главните национални ТВ канали и голем број регионални канали и радио станици, претходно во понеделникот објави дека нејзините интернет-сервиси станале цел на сајбер напад преку ноќ, но дека и покрај тоа, емитувањето на радиото и ТВ преносите функционирале.
„Нашиот државен медиумски холдинг, еден од најголемите, се соочи со невиден хакерски напад врз неговата дигитална инфраструктура. Експертите се обидуваат да ги утврдат сите околности со цел да разберат каде водат трагите што ги оставиле сторителите на овој хакерски напад“, рече тој.
Европа
Поради планирање на терористички напад обвиненија добија трoјца тинејџери во Германија
Суд во германската провинција Северна Рајна-Вестфалија поднесе обвиненија против тројца тинејџери за планирање на терористички напад, пренесува ДПА.
Осомничените, на возраст од 15 и 16 години, беа уапсени во април за време на велигденските празници. Тие планирале напад во согласност со целите на терористичката група „Исламска држава“.
Обвинителството тврди дека тинејџерите ги разменувале плановите преку апликацијата „Телеграм“ и разговарале за напади во цркви и полициски станици.