Македонија
Андоновски: Ако ЈСП не ги исплати приватните превозници, долгот од речиси 2 милиони евра ќе се зголемува
Зошто до сега не се исплатени 90 милиони денари достасани долгови до двата приватни превозника и кога овие пари ќе се исплатат, го праша советникот од ВМРО-ДПМНЕ, Стефан Андоновски, на денешната седница за поставување советнички прашања директорот на ЈСП Скопје откако поради неисплатен долг од страна на јавното претпријатие кон приватните превозници ситуацијата резултираше со блокирање на скопските улици.
„Фактурите кои се доставени од приватниците превозници до јавното сообраќајно претпријатие Скопје не се спорни и со само тоа доколку приватните превозници го тужат ЈСП тогаш долгот кој во моментот е најголем во историјата и достигнува речиси 2 милиони евра, ќе треба претпријатието да плати и пенали и судска казна“, рече тој.
„Овие две прашања ги поставувам затоа што ме интересира кога ќе се реши проблемот, а проблемот се состои од три дела. Првиот дел, фактурите коишто приватните превозници ги имаат кон ЈСП не се спорни, спрема нив не е изјавен никаков негативен коментар, не е изјавена никаква забелешка. ЈСП ги прифатило врз основа на своите извештаи и извештаите на мониторинг-центарот на Град Скопје и како такви тие се водат како долг на ЈСП кон овие превозници. Сумата наскоро достасува до 2 милиони евра. Доколку овие приватни превозници го тужат ЈСП тука ќе дојде да плаче директорот на ЈСП следната година дека му требаат субвенции за потешкотии во работењето зошто нема да може да го отплати ниту главниот долг ниту, пак, долгот по судската одлука, бидејќи повторно ќе кажам фактурите не се спорни“, рече тој.
Андоновски ја искоментира изјавата на градоначалничката Арсовска која кажа дека приватните превозници не пријавиле продажба на билети, а парите завршувале во нечиј џеб, потенцирајќи дека штом Арсовска не поднела кривична пријава очигледно е дека фактурите на приватните превозници се веродостојни.
„Ако биле спорни фактурите по онаа прес конференција на градоначалничката очекував да си поднесе кривична пријава во МВР и договорниот однос којшто го објасни помеѓу ЈСП и приватните превозници да си го решава и пред граѓанскиот суд, да рече мене овие приватни превозници ме лажат, продаваат карти, во исто време ми ги бараат мене парите, јас фактурите не ги признавам и поради тоа си поднесувам тужба пред надлежниот граѓански суд. Но, тоа не се случи, фактурите се очигледно неспорни според нашите информации, и мене ме интересира дали ќе треба и пенали да плаќаме следната година. Затоа што договорниот однос помеѓу ЈСП и приватните превозници нас како совет не нè интересира, ама парите кои ќе се побараат од Советот, од граѓаните од буџетот многу ме интересира дали ќе бидат само за потешкотии во работењето само да исплатат плати или ќе бидат и за судски казни и пенали кои што сигурно ќе достасаат затоа што ќе си поднесат луѓето тужба“, изјави Андоновски.
Потенцираше дека има целосна блокада на системот и мора да се изнајде соодветно решение, укажувајќи дека граѓаните чекаат и по неколку часа автобус, како и дека има шпекулации дека се тераат вработените од ЈСП да работат и по две смени за да ги покријат линиите и на приватните превозници.
„Второ, коешто произлегува и зошто овој договор нас треба да нè интересира е бидејќи оваа сума којашто се должи е двојно повисоко од кога било ЈСП му должела на некој приватен превозник. Значи и досега постоеле долгови и тие се решавале тековно и сега прв пат сумата достасува 2 милиони евра и таа е за прв пат волку голема во историјата на соработката помеѓу градот и било кој превозник во каква било форма“, нагласи Андоновски.
„И третото што е најважно, во Скопје не постои правилен јавен автобуски превоз. Во моментот граѓаните чекаат по час, час и половина на најавен автобус којшто треба да стигне за 5 минути. Во Скопје во моментот линиите коишто беа покривани од приватни превозници со три, четири или пет автобуси сега се покриваат само со еден. Има шпекулации и новинарски извештаи дека се тераат вработени да работат и под две смени од ЈСП ги покријат овие линии на каков било начин. Но, очигледно е дека не ги покриваат доволно добро, едно заради бројката на автобуси, и второ заради тоа што имаме блокада на системот“, дециден е Андоновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тренчевска: Од 2017 година до денес најниската исплатена пензија ја покачивме за 5.309 денари
„330% повисока социјална помош, 53% повисоки пензии, 180% повисока минимална плата, 40 000 просечна плата се нашите резултати и знам дека тоа можеби не е доволно. Затоа вечерва стојам пред вас не како жена, туку како ваша пријателка и комшивка, како жена која работеше со интегритет и бара поддршка за број 1 на 8 мај“ порача Тренчевска од говорницата на митингот во Радовиш.
Ко-носителката на изборна единица 4 од СДСМ, Јованка Тренчевска вечерва на радовишани им порача дека вистинскиот избор е јасен и дека само СДСМ е опција која ќе го води напредокот на општеството.
„Вие највозрасните кои гледам ве има тука во голем број, а со кои деновиве често се среќавав и често ме прашувавте зошто не може покачување од 5000 денари за секој од вас, Ве потсетувам дека од 2017 година до денес најниската исплатена пензија ја покачивме за 5.309 денари, и овој месец најниската исплатена пензија изнесува 13 880 денари. Стабилната исплата на вашите пензии ќе биде доведена во прашање со лажните ветувања на ВМРО, кои слушам деновиве дека започнаа да го раситнуваат лажното покачување на пензиите на месеци, на години и на нови методологии. Знаат и тие дека на лагата и се кратки нозете! Знаат дека 5000 линеарно е невозможно. Но дека е добро за да манипулираат со највозрасните“ рече Тренчевска.
Таа истакна дека во новиот мандат СДСМ се обврзува минималната пензија да ја покачи на 20.000 денари додека просечната пензија ќе ја покачи на 30.000 денари.
„Да продолжиме да градиме мостови посилни од ѕидовите и омразата кои ни ги наметнува ДПМНЕ“ истакна Тренчевска во нејзината покана за граѓаните за да излезат на гласање на 8ми мај.
Македонија
Мицкоски од Тетово: Во рамките на проектот за 250 милиони евра за инфраструктурен развој на општините, дел ќе се инвестира и во општините во западна Македонија
„Живееме под едно небо, делиме исти проблеми, исти предизвици. Маката ни е иста, и копнееме по заеднички работи. Денес Македонија е држава каде управуваат стотина души кои ги запоседнале институциите и грубо ги злоупотребуваат. Секој тендер поминува низ нивни раце, за секој бизнис процентот на добивка го определуваат истите луѓе. Тој артаноиден систем стана синоним за корупција и неказнет криминал. Систем на искривени вредности и непринципиелност која државата ја носи во пропаст“, истакна претседателот на ВМРО-ДПМНЕ, Христијан Мицкоски од митингот во Тетово.
Мицкоски додаде дека доаѓа ново време, се врти нов лист, нов почеток.
„Овде од Тетово објавувам дека веднаш по победата и формирањето на влада значаен процент од буџетот ќе оди за развој и решавање на децениските инфраструктурни проекти на Тетово, Гостивар, Кичево, Струга, Дебар и повеќе други општини од западна Македонија“, вети Мицкоски.
„Се обврзувам дека во рамките на проектот за 250 милиони евра за инфраструктурен развој на општините дел ќе се инвестира и на овие места овде. Подеднакво ќе градиме и работиме за развој на штипско Ново село, но и за тетовско Теарце, за струмички Куклиш, но и за тетовско Одри“, порача претседателот на ВМРО-ДПМНЕ.
Тој рече дека на народот му е доста од удирање во гради, зборење за права, а во реалноста сето тоа да се сведе на крадење и тендери. Реално и со дела да се менува животот на луѓето и тоа идната Влада предводена од ВМРО-ДПМНЕ ќе го направи.
„За да се случи ова што ви го зборувам, на 8-ми мај мора да се заврши започнатата работа. Цунамито е кренато. Тоа цунами треба да удри на денот на изборите и да ја оддува забрефтаната од криминал власт. Решението против сите сценарија кои ги прават од СДСМ и ДУИ е излезноста“, порача Мицкоски.
Тој ги повика граѓаните на осми мај да излезат и да гласаат, време е да започнат промените во Македонија.
Македонија
Битиќи: Бидете патриоти, изберете европска иднина на соживот и плати од 1.300 евра
„На 8-ми мај излезете на гласачките места и со заокружување на бројот еден да ги сочуваме темелите на државата, на демократските вредности, на внатрешната кохезија на етникумите и верските заедници. Бидете патриоти и изберете безбедна и европска иднина, каде ќе бидеме сплотени и ќе имаме просечна плато до 1.300 евра“, порача на денешните средби со жителите на Бутел и Чучер Сандево, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Битиќи истакна дека длабоко верува дека мнозинството од граѓаните не сакаат враќање 20 години назад во минатото, во заробена држава и поделено општество, во држава во која минималната плата изнесуваше под 10.000 денари.
„Гледате политичари кои дефилираат по митинзите со националистички пароли и пораки за изолација на државата. Но, уверен сум дека со вашиот глас за бројот 1 ќе ги замолчите, ќе им покажете дека вашата одлука е да имаме нова влада која ќе продолжи државата да ја води кон Европската унија, кон нејзините вредности, “ рече Битиќи и посочи дека СДСМ и коалицијата имаат програма која ќе ја исполни оваа мнозинска желба на граѓаните на Македонија.
Нагласи дека агендата на националистите е празна, а програмите им се полни со празни зборови, затоа нудат само несигурност и страв меѓу граѓаните.
„Знаеме дека патот до ЕУ е тежок, со многу пречки пред нас, но ЕУ е единствениот начин да ги смениме работите на подобро, во економијата, во образованието, во здравството.
Не смееме да се откажеме од европското семејство и да ги замолчиме националистите“, порача Битиќи.
Зборувајќи за мерките од предизборната програма на СДСМ, Битиќи посочи дека членството во ЕУ не само што ќе однесе посилна кохезија помеѓу различните етнички и верски заедници во Македонија, туку тоа ќе значи и подобар и поквалитетен живот за сите граѓани
„Пред вас излегуваме со конкретни верувања, за кои во минатото покажавме дека ги исполнуваме, а ќе ги исполниме и сега. Гарантирам е просечна плата од 1.100 евра и минимална плата од 600 евра, кои со влезот во ЕУ проектираме да достигнат до 1.300 евра односно 800 евра“, им порача Битиќи на жителите на Бутел и Чучер Сандево.