Свет
Сопругата на Зеленски во Лондон: „Руските окупатори силувале 4-годишно девојче“
Првата дама на Украина, Олена Зеленска, е во посета на Велика Британија и се обрати пред британскиот парламент.
Таа го почна својот говор споредувајќи го искуството на Украинците со искуството на Британците во Втората светска војна. Рече дека Британците ги преживеале воздушните напади, кои биле „идентични со оние што Русија сега ги користи за да ја фрли Украина на колена“.
„Секој ден ги слушаме сирените. Тие се идентични со оние што ги слушаа британските генерации. Вие не се предадовте и ние нема да се предадеме. Но победата не е единственото нешто што ни треба. Ни треба правда. Доаѓам кај вас за правда“, таа рече.
„Русите се обидуваат да ги претворат деновите и ноќите на Украина во ужас со огромни ракетни напади и дронови“, рече Зеленска. Таа додаде дека повеќе од 20 милиони Украинци останале без струја, вода и греење поради руските ракетни напади и дека Русија „користи систематско насилство во многу окупирани градови и села во Украина“.
Обвини дека се идентификувани илјадници злосторства на руските сили, вклучително и сексуално насилство.
„Најмладото девојче кое беше силувано од руските окупатори имаше четири години. Најстарата преживеана имаше 85 години. Ова се жртвите“, рече Олена Зеленска.
За време на нејзиното појавување во Вестминстер, Зеленска ја повика светската заедница да се обедини и да го поддржи формирањето на специјален суд каде Русите ќе одговараат за злосторствата извршени за време на инвазијата на Украина.
„Ве молам за мала услуга да станеме светски лидер во напорите за правда“, нагласи таа.
„Правда не е потребна само во Украина, туку и во целиот свет за да не се владее со сила. Ни треба правда за да може светот да опстане“, го заврши својот говор сопругата на украинскиот претседател. На крајот од својот говор таа доби овации од собраните претставници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Кејт Мидлтон миленичка на британската јавност: по популарноста го надмина и принцот Вилијам
Последната анкета на јавното мислење во Велика Британија, објавена денеска, покажа дека принцезата од Велс, Кејт Мидлтон го надмина принцот Вилијам по популарност.
Во истражувањето спроведено од агенцијата за истражување на јавното мислење „Savante for the Independent“, Кејт (42), која моментално се лекува од неодреден облик на рак, ја поддржуваат 62 отсто од испитаниците, додека принцот од Велс (41) е фаворизиран од 61 отсто од британските испитаници.
Принцот Ендру (64), по дружењето со осудениот педофил Џефри Епштајн, е избран за најмалку омилен член на кралското семејство – го поддржуваат само 14 отсто од испитаниците.
Принцот Хари и Меган Маркл, исто така се соочуваат со недостаток на популарност. Хари (39) го поддржуваат само 29 отсто од испитаниците, додека неговата сопруга Меган (42) е уште помалку популарна со само 25 отсто поддршка од испитаниците, пренесува Танјуг.
Свет
ОН: Израелскиот копнен напад врз Рафах може да доведе до масакр
Израелскиот копнеен напад врз Рафах ќе ги доведе во опасност животите на стотици илјади жители на Газа и ќе им нанесе огромен удар на хуманитарните напори низ палестинската енклава, соопшти Канцеларијата на ОН за координација на хуманитарни прашања (OCHA).
Израел се заканува дека ќе изврши копнен напад врз Хамас во Рафах, каде што се засолниле речиси милион луѓе.
„Тоа би можело да биде масакр на цивили и неверојатен удар за хуманитарните операции во целиот појас, бидејќи тие се управуваат претежно од Рафах“, рече портпаролот на OCHA, Јенс Лаерке на брифингот во Женева.
Хуманитарните активности од Рафах вклучуваат медицински клиники и пунктови за дистрибуција на храна и центри за неухранети деца, рече тој.
Претставник на Светската здравствена организација (СЗО) на истиот брифинг изјави дека е подготвен план за копнен напад, кој вклучува нова полска болница, но предупреди дека тоа нема да биде доволно за да се спречат големиот број на жртви.
„Тоа апсолутно нема да спречи значителни дополнителни смртни случаи“, рече Рик Пиперкорн, претставник на СЗО за палестинските територии.
Тој додаде дека е „многу загрижен“ што нападот ќе го затвори граничниот премин Рафах меѓу Појасот Газа и Египет, кој се користи за увоз на лекови и медицинска опрема.
Свет
(Видео) Камион без возач прегази најмалку 29 ученици на фестивал во Киргистан
Камион без возач прегази 29 ученици на фестивал во Киргистан.
Камионот што го користел продавач на сладолед ненадејно тргнал по удолницата и прегазил голем број ученици, од кои многумина биле свртени со грб.
Многумина успеале да побегнат, но 29 лица биле прегазени.
Осумнаесет деца на возраст од девет до 16 години се хоспитализирани, додека кај седум има опасност по живот.
Инцидентот го снимила камерата на дронот која го снимила моментот кога децата го држат големото знаме на Киргистан.
На видеото се гледа како камионот ненадејно се движи по удолницата и минува низ групи деца.
Полицијата покренала истрага, а според една од пријавите, возачот заборавил да ја повлече рачната сопирачка.