Регион
Вучиќ: Никој не може да ги заобиколи санкциите против Русија преку Србија
„На територијата на Србија никој не може да ги заобиколи санкциите што ЕУ ѝ ги воведе на Руската Федерација, а Србија реагира и санкционира такви обиди бидејќи не ѝ треба никаков дополнителен профит благодарение на сопствената доволно силна економија“, изјави денеска српскиот претседател, Александар Вучиќ.
По средбата со еврокомесарот Оливер Вархељ, тој рече дека ги разбира неговите забелешки во однос на усогласувањето на надворешната политика на Србија со ЕУ.
„Ние не се занимаваме со криминал, не се занимаваме со заработка од нечии страдања за време на војната, ниту ни треба дополнителен профит. Имаме силна економија и јавни финансии за да се грижиме за себе, а со поддршка на Европската Унија немаме други поголеми проблеми“, рече Вучиќ.
Тој нагласи дека Србија секогаш реагирала кога се работи за реекспорт на стоки, а нашите надлежни органи учествувале во апсењето на оние што работеле на заобиколување на санкциите против Русија.
Вучиќ изрази благодарност и почит кон ЕУ за секаква поддршка, особено финансиска и помош од знаење, додавајќи дека никогаш не ја криел благодарноста на граѓаните на Србија кон даночните обврзници на Унијата, кои одвојуваат значителни средства за развој на нашата земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.