Македонија
ВМРО-ДПМНЕ: Ковачевски и СДС се патрони на криминалот
„Ковачевски и СДС се патроните на криминалот во Македонија. Секој ден со власта на Ковачевски и СДС гледаме милионски афери и скандали и никаква реакција ниту санкција“ велат од ВМРО-ДПМНЕ.
Од опозициската партија се со став дека „како да се борат против корупцијата и криминалот кога тие самите го продуцираат. Како да има одговорност кога тие ги поставуваат оние кои треба да ги гонат. Помина една недела од аферата со компанијата за производство за струја во која сопругата на Ковачевски има удел заедно со сопругата на директорот на Катастар и заедно со кумот. Молчат од обвинителство, молчат од Антикорупциска. За нив нема ништо спорно во тоа сопругот да креира енергетски стратегии, а сопругата да влегува во енергетскиот бизнис“.
„Ова е само еден од стотиците афери за кои институциите не превземаат ништо. Глуви се и слепи и за аферата Броило, и за аферата Тајни имоти, и за аферата со Хациендата на Славјанка, и за аферата со РЕК, и за аферата со препродажба на лекови, и за аферата со Академијата за обвинители и многу други примери на злоупотреби и кршење на законот. Со Ковачевски и СДС нема борба против криминалот и корупцијата. Македонија со нив ќе тоне а нивните џебови ќе се полнат. Решението се избори и менување на оваа криминогена власт“ велат од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.