Зорица Блажевска, професорка при Архитектонскиот факултет при Универзитетот „Св. Кирил и Методиј“ во Скопје, е добитник на наградата за животно дело „Андреја Дамјанов“ за 2022 година. Оваа награда ја доделува Асоцијацијата на архитектите на Македонија (ААМ) како признание за особени достигнувања и личен придонес во развојот на архитектурата и градителството.

„Творештвото на архитект Блажевска е длабоко посветено на архитектурата на домувањето со особен фокус на една од најчувствителните теми – архитектурата за третата животна доба“, велат од Асоцијацијата на архитектите.

Дипломира на Архитектонскиот факултет при Универзитетот „Св. Кирил и Методиј“ во Скопје под менторство на професор Георги Константиновски (1971). Докторира на тема „Семејната куќа во функција на хумано домување на старите лица во рамките на семејството“, под менторство на професор Георги Константиновски (1991), а беше и негов асистент на Архитектонскиот факултет, соработник и рамноправен партнер во низа клучни дела. Професорката Зорица Блажевска на Архитектонскиот факултет во Скопје ја продолжи линијата на своите претходници, професорите Јован Ранковиќ и Георги Константиновски, но даде и еден личен поглед на проектот на домувањето. Како професорка на предметот проектирање станбени згради, како и на низа предмети поврзани со областа на домувањето, ја постави и разви темата на живеење во третата доба како дел од педагошкиот проект и како одреден општествен ангажман.

Во развојот на својата кариера архитект Зорица Блажевска се формира во творец со особен авторски пристап.

„Со чинот на добивање на наградата ‘Андреја Дамјанов’ за 2022 година, архитект Блажевска станува член на Академијата на архитектите на Македонија, која функционира во рамките на ААМ. Свеченоста за доделување на наградата ќе се одржи на крајот на јануари 2023 година“, истакнуваат од Асоцијацијата на архитектите на Македонија.