Сегашниот вицепремиер и министер за животна средина, Изет Меџити, кој 12 години беше градоначалник на Општина Чаир, повика институциите да постапуваат по обвинувањата за дивоградби од градоначалничката на Скопје, Данела Арсовска. Градоначалничката Арсовска, по повеќе од три години молк, последниов месец, посетува градилишта на дивоградби во Чаир, обвинува за криминал и фалсификати и укажува дека има дивоградби изградени и во периодот додека градоначалник беше Меџити. Тој како кадар на ДУИ доби три мандати во Чаир и беше градоначалник од 2005 до 2017 година.

„Во однос на дивоградбите бројката е над 200.000 на ниво на државата. Ги има во сите 80 општини, а по бројката на дивоградби предничи Гостивар. Јас ги повикувам институциите да делуваат каде што има спроведени работи надвор од законот. Ќе ги оставиме да делуваат секаде, но не селективно, како што имаше интенција од градоначалничката“, рече Меџити попладнево на прес-конференција во Владата, одговарајќи на новинарски прашања.

Министерот за внатрешни работи, Панче Тошковски, денес кажа дека дивоградбите за кои ќе се утврди дека се закана за безбедноста ќе бидат урнати и извести дека нивниот Оддел за организиран криминал е влезен во Чаир, но и во Сарај и во Аеродром, а ќе се проверува документацијата на и на Општина Кисела Вода.

Првиот вицепремиер и министер за животна средина, Изет Меџити, не ја исклучува можноста да му биде противкандидат на Бујар Османи за градоначалник на Чаир на претстојните локални избори. Откога Османи јавно кажа дека размислува за кандидатура, Меџити одговарајќи на новинарски прашања попладнево во Владата, рече дека засега не е исклучена можноста тој да биде кандидат за градоначалник на Чаир.

„Сега-засега ништо не е исклучено. Засега е одлучено само да го поддржиме независниот кандидат за Струга Менди Ќура. Се друго е на маса. Ќе бидете известени истиот ден кога ќе ја донесеме одлуката“, рече Меџити.

Тој кажа дека Вреди ќе донесе конечни одлуки за кандидати за градоначалници откога ќе ги добие резултатите од повеќе анкети од професионални агенции за кои Меџити вели дека се во тек.

„Како Влен сме фокусирани да ги дадеме најдобрите, најлвалитетните кандидати во секоја општина која со што ќе ја потврдиме големата победа на Влен и на локалните избори како на претходните парламентарни избори“, рече Меџити.

Тој е довчерашен член на ДУИ, партија која трипати го предложи за градоначалник на Чаир и тој 12 години беше на чело на Општината. Првиот мандат го доби во 2005 година, а потоа уште двапати беше реизбран. Откога го заврши третио мандат, Меџити во 2017 година кажа дека нема да побара четврти мандат оти сака Општината да ја остави на помладите генерации во партијата.

Тогаш за градоначалник беше избран Висар Ганиу, како кадар на ДУИ. И Ганиу и Меџити, лани ја напуштија ДУИ и станаа дел од коалицијата Влен која годинава стана политичка партија.

Влен ќе одлучува за ново име кое ќе го предложи за градоначалник на Чаир оти веќе е извесно дека Ганиу ја изгуби поддршката кај јавноста по објавите за дивоградби и секојдневните обвинувања за криминал со нив од градоначалничката на Скопје, Данела Арсовска.

Активни се три пожари во државата, соопшти Надица Вчкова од Главниот штаб за управување со кризи.

Во моментот сѐ уште е активен пожарот во Велес кај селата Џидимирци – Крушје – Иванковци, каде што гори мешана шума.

Активен пожар има и во Македонски Брод, помеѓу с. Црешнево, с. Локвица, с. Крапа, таму гори деградирана дабова шума, грмушки и ниска вегетација.

И во општина Василево, кај селото Нивичино, има активен пожар, каде што гори нискостеблеста шума.

Пожарот кај селото Николиќ веќе е ставен под контрола, информираа надлежните, а пожарот кај Чучер-Сандево е целосно изгаснат.

„Во согласност со главниот штаб за ангажирање ресурси, денеска се вклучени две специјализирани возила со екипаж ‘Пинцгауер’ како и два ‘ер трактора’ на Дирекцијата за заштита и спасување на подрачјето кај селата Крушје и Иванковци. Во гаснењето на овој пожар ангажирани се и 30 припадници на АРМ. Хеликоптерот на МВР е во поддршка на копнените сили во гаснењето на пожарот над село Нивичино во општина Струмица“, извести Вчкова.

Додаде дека сите ангажирани ресурси остануваат максимално ангажирани на сите подрачја сѐ додека целосно не се изгаснат активните пожари.