Реал Мадрид ги заврши подготовките со убедлива победа од 4:0 против австрискиот прволигаш ВСГ Тирол. „Дефенса Централ“, пишува дека овој натпревар јасно ја покажал визијата на новиот тренер Чаби Алонсо, кој знае кои играчи ќе бидат клучни за тимот.

„За време на бројните измени, Алонсо остави тројца играчи на теренот кои го започнаа натпреварот: стоперот Дин Хујсен (20), играчот од средниот ред Арда Гулер (20) и Килијан Мбапе (26). Со тоа, тој јасно стави до знаење дека тие се основата на неговата визија, по еден играч од одбраната, средниот ред и нападот, и дека смета на нив повеќе од другите“, пишува „Дифенса Централ“.

Дин Хујсен се покажа како клучен во изнесувањето на топката од задната линија, што беше главната причина за неговото доаѓање во Мадрид од Борнмут за 62 милиони евра. По целосното закрепнување на Едер Милитао, се очекува да формираат моќен стоперски пар со поддршка на Аурелиен Чуамени.

Арда Гулер се оформува како играч кој ќе направи разлика во тактичката шема на Алонсо. Тренерот, како што најави за време на Светското клупско првенство, го гледа како класичен играч од средниот ред. Поради ова, турскиот талент би можел да доминира во поседот на топката и да ја разбива одбраната на противникот со своите прецизни додавања.

Во 82 минути поминати на теренот, Гулер имаше над 90 проценти прецизни додавања, создаде четири шанси, испрати четири клучни додавања и двапати ја погоди пречката, докажувајќи дека може да биде опасен за голот на противникот.

Со десетката на грбот, Килијан Мбапе не можеше да посака подобар почеток. Французинот постигна два гола и ја покажа импресивната физичка трансформација на која неговиот тим работи напорно. Имено, шпанските медиуми пишуваат дека видливо ја подобриле агилноста, брзината и силата.

Со два гола, една асистенција, четири удари во голот и четири клучни додавања, Мбапе го покажа патот за да стане апсолутен лидер на тимот, што Алонсо го очекува од него.

Тренерот веќе изјави дека Мбапе е „компатибилен“ со Гонзало Гарсија, а сега останува да се види како ќе соработува со Винисиус Жуниор, кој доби критики од тренерот по слабата игра против Тирол.

Актуелниот победник на Лигата на шампионите, ПСЖ, и актуелниот победник на Лига Европа, Тотенхем, ќе се сретнат вечерва во 21 часот на стадионот „Блуенерџи“ во Удине во борбата за Суперкупот на УЕФА.

Победникот на Лигата на шампионите сака да додаде трофеј што не го освоил ниту еден француски клуб, додека Тотенхем се надева дека ќе подигне уште еден трофеј по освојувањето на Лига Европа.

Единствениот пат кога ПСЖ имаше шанса да го освои Суперкупот беше во 1996 година, кога, како победници на Европскиот куп, играа против Јувентус и претрпеа тежок пораз од вкупно 9:2 во двата натпревари. Тоа беше претпоследната година во која натпреварувањето се играше во два натпревари.

Марсеј, од друга страна, ја освои Лигата на шампионите во 1993 година, но поради скандал со наместени натпревари, не можеше да учествува во Суперкупот.

Луис Енрике сега има можност да испише нова страница во клупската историја. По триумфот во Лигата на шампионите, ПСЖ не успеа да слави на Светското клупско првенство, каде што Челзи неочекувано ги победи во финалето.

Енрике веројатно ќе игра со истиот состав на натпреварот како против Интер во финалето на Лигата на шампионите, освен што Лукас Шевалие ќе брани наместо Донарума. Исто така, тој не може да смета на Жоао Невеш, кој беше исклучен против Челзи.

Томас Франк, данскиот тренер на Тотенхем, ќе дебитира во новиот клуб. Тотенхем влегува во новата сезона без Хеунг-мин Сон, кој се пресели во ЛАФЦ по десет години во Лондон. Негов заменик е Мохамед Кудус, кој пристигна од Вест Хем. Франк ги нема на располагање Медисон, Соланке, Кулушевски и Драгушин.

Новото засилување на Евертон, Џек Грилиш, изјави дека сакал да оди само на едно место откако му се приклучи на клубот како позајмен играч од Манчестер сити.

Грилиш се пресели од Сити како позајмен играч во Евертон до крајот на сезоната и е шестото засилување на клубот од Ливерпул во летниот преоден рок.

Тој рече дека разговорите со менаџерот Дејвид Мојес биле одлучувачки да ја донесе одлуката за преселба на стадионот „Хил Дикинсон“.

„Пресреќен сум што потпишав за Евертон. Ова е голем клуб со одлични навивачи. Штом разговарав со менаџерот, знаев дека има само едно место каде што сакам да одам. Бев преплавен со пораки од навивачите на Евертон на социјалните мрежи, па затоа постои и таа страна од приказната и тоа е уште една причина зошто го избрав Евертон“, рече Грилиш, објави Би-Би-Си.

Грилиш го зеде дресот со број 18, кој го носеа легендата на клубот Пол Гаскоњ и Вејн Руни.

„Моите двајца омилени англиски играчи отсекогаш биле Руни и Гаскоњ. Штом знаев дека договорот е блиску, морав да проверам дали бројот 18 е достапен, што е совршено“, рече Грилиш.

Тој би можел да го има своето деби за Евертон во понеделник против Лидс во првото коло од Премиер лигата.

Во август 2021 година, Грилиш се пресели од Астон Вила во Манчестер сити за во тоа време британски фудбалски рекорд од 100 милиони фунти.

Тој играше за Сити во 157 натпревари, постигна 17 гола и освои три титули во Премиер лигата, Лигата на шампионите, ФА Купот, Европскиот Суперкуп и Светското клупско првенство.