Обвинителството побара доживотна казна затвор за 33-годишниот Фадил Зејнелов, кој пред три години ја уби својата партнерка Емилија Пешева.

Обвинетиот ја призна вината, а по убиството на 1 ноември минатата година, тој самиот се пријави во полицијата. Сепак, Обвинителството верува дека тоа не треба да биде олеснителна околност бидејќи Зејнелов веќе 10 години поминал во затвор за други дела.

Доживотна казна бара и семејството на Емилија.

„Обвинителството кажа убаво, казната да биде доживотна за монструмот што ни ја утепа ќерката. Очекувам дека судот ќе пресуди доживотна, а тоа го сакаме и ние како родители“, рече таткото на Пешева во изјава за медиумите пред судот тврдејќи дека убиецот, по убиството, не заминал директно во полицијата, туку првин отишол во казино и играл комар.

Пресудата ќе биде објавена в среда на 12 февруари.

Според обвинението, тој се товари дека откога се договориле и се сретнале пред нејзиниот дом, заедно отишле во напуштен објект на ЈП „Исар“ за да разговараат за проблемите во нивната повеќегодишна врска. Разговорот преминал во расправија по што обвинетиот физички ја нападнал жртвата и почнал да ја удира со тупаници. Кога таа паднала на подот, тој почнал силно да ја стега во пределот на вратот додека не дошло до прекин на дишењето и нарушување на дотокот на крв во мозокот како резултат на што жената починала.

По десетдневно тестирање, министерот за здравство Арбен Таравари денес извести дека официјално е пуштена во употреба новата компресорска станица за хируршките сали во Клиничкиот центар. Хируршките сали беа затворени во мај минатата година кога се појави силна смрдеа во дистрибутивната мрежа за кислород и компримиран воздух.

„Денес, особена чест ми е да најавам дека компресорската станица веќе функционира. Имаме три нови компресори, комплетно нова инсталација За среќа, тука е и стариот компресор, кој ќе стои какао бекап за евентуално да не ни се повтори ваков проблем. Решаваме проблеми што ги наследивме. Со новата компресорска станица се покриени сите 18 хируршки сали на Хирургија, исто така салите во ОРЛ, Офталмологија и максилофацијална хирургија. Комплетниот систем е тестиран 10 дена, се функционира како што треба и од денес веќе и официјално се користи“, рече денес министерот Таравари.

Станицата е подготвена на неа да се приклучат и други клиники доколку за тоа има потреба. Таравари вели дека за тоа е потребна само нова инсталација за поврзување.

Хируршките сали на Клиничкиот центар беа затворени на 22 мај лани поради смрдеата што се рашири од дистрибутивната мрежа за кислород и компримиран воздух. Министерот за здравство во тогашната техничка влада, Илир Демири, извести дека примероци од гасот веднаш биле испратени на анализа во Германија, која треба да покаже зошто има лоша миризба. На анализата се чекаше речиси три месеци, а во меѓувреме беше избрана новата Влада. Сегашниот министер за здравство, Таравари, извести дека анализата покажала оти во системот за кислород и компримиран воздух во Клиничкиот центар имало мала концентрација на формалдехид. Пациентите и вработените се жалеа на силна смрдеа, печење во очите, носот и грлото, симптоми идентични на оние предизвикани по изложување на формалдехид.

Хируршките сали летово функционираа со намален капацитет, а работеа со надворешни компресори. Потешките операции се правеа во ГОБ „8 Септември“ и поранешната градска болница „Свети Наум Охридски“.

Грците, беспомошни и преплашени што Санторини непрекинато се тресе десет дена, бараат помош од Господ. Илјадници земјотреси со јачина над 3 степени според Рихтеровата скала го тресат овој прекрасен остров повеќе од една недела поради што луѓето сега се свртеа кон светците“ за помош.

Во атмосфера на длабока посветеност и вера десетици жители на селото Емпорио на Санторини излегоа на улиците и учествуваа во големата поворка за да го прослават празникот Свети Хараламбос и се молеа да престанат земјотресите.

Носејќи транспаренти, грчки знамиња, моштите на свети Хараламбос и икони, верниците ги носеа светите мошти низ улиците на селото барајќи божествена заштита и мир за нивното место.

Како што информираат жителите на областа, поворката била организирана во консултација со селскиот свештеник во обид да се обезбеди духовно ослободување од сеизмичката активност што го погодува Санторини.

„Свети Хараламбос помага при болести. Секогаш шетавме низ селото, сега свештеникот вели дека оваа литија ќе биде и за болести и за земјотреси“, изјави жител на селото за „Прототема“.

На мештаните им се придружија и жителите на другите села. Велат дека дошле да се молат да престанат земјотресите.

„Поради празникот Свети Хараламбос, мислевме дека треба да одржиме поворка за помош од земјотресот“, додава една жена, која дошла од друго село на Санторини.

„Господ да нè помилува и да стави крај на ова зло. Ако е суша или слично, правиме литија. Секогаш има голема литија за Свети Хараламбос. Најчесто одевме по уличките, но поради ситуацијата, не можеме да одиме таму. Верувам дека земјотресите ќе престанат, Господ знае“, додава друг жител на селото Емпорио.