Спорт
Девет години од кобното скијање во Мерибел – јавноста не знае каква му е здравствената состојба на Шумахер
Пред точно девет години, Михаел Шумахер, доживеа тешка несреќа во Мерибел, зимски центар во француските Алпи. Од тој момент па се до денес светската јавност добива малку информации за здравствената состојба на легендарниот Формула 1 возач. Каква е здравствената состојба на легендарниот возач не откри ниту документарниот филм на „Нетфликс“.
Семејството љубоморно ја чува приватноста, а она што смета дека треба да го сподели со јавноста на првите две години го објавуваше портпаролката на семејството Забине Кен, а потоа таа задача на себе ја презеде сопругата Корина, која редовно порачува дека има разбирање за јавноста која бара информации, но во исто време бара да се почитува приватноста на семејството.
Неколку пати информации во јавноста сподели подели и поранешниот шеф на Шумахер во Ферари, Жан Тод.
„Секогаш ја ценеше приватноста, ние и понатаму живееме како семејство. Со него работиме терапии, правиме се за да че чувствува удобно. Важно ни е да не ни биде нарушена приватноста. Тој секогаш не штител, сега ние го штитиме него“, им објасни сопругата Корина, во една прилика на новинарите.

„Шумахер не може да зборува. Комуницира само со очите. Само тројца смеат да го видат“, тврди Елизабета Грегорачи. поранешната сопруга на Флавио Бријаторе. Синот на легендарниот Енцо Ферари, Пјетро, потврдил дека Шумахер не може да зборува.
Претходно, семејството на Шумахер, го доби судскиот процес против магазинот „Бунте“. Семејството во 2015 година го тужеше магазинот за пишување невистини поврзани со здравствената состојба на Шумахер.
„Бунте“ во 2015 година објави дека легендарниот возач, може да ја подигне раката и дека може да оди со мала помош од друго лице. На судот, адвокатот на семејството, Феликс Дам, со помош на физиотарапевт, потврдил дека Шумахер не може да стои.
Во јуни 2019 година, јавноста дозна дека Шумахер го лечат со матични клетки.
Не се знае каде се наоѓа 52-годишниот Шумахер. Едни тврдат дека е во Мајорка, други дека е во Швајцарија, а мал број луѓе тврдат дека се наоѓа во САД.
Шумахер несреќата ја доживеа во Мерибел, додека скијал тој паднал и со главата удрил во камен. По несреќата веднаш беше префрлен во клиниката во Гренобл, каде му беше извршена операција, а потоа шест месеци беше во кома.
Неговата рехабилитација продолжи во швајцарска Лозана, а во септември минатата година е префрлен на домашна нега во семејниот дом во Гланд, Швајцарија.
Од моментот кога се случи несреќата неговите колеги, пријатели, навивачи…, не престана да испраќаат пораки со поддршка, а со него останаа и речиси сите спонзори. Сите тие не ја загубија надежта дека Шуми ќе ја добие најважната трка во својот живот.

Михаел Шумахер без сомнение е еден од најдобрите возачи во историјата на Формула 1. Тој е седумкратен светски шампион (рекордот го израмни Луис Хамилтон во 2020 година). Во текот на кариерата возеше за Џордан, Бенетон, Ферари и Мерцедес, а најголемите успеси ги постигна како возач на Скудерија Ферари.
Првите две титули ги освоил со Бенетон (1994, 1995), а апсолутна доминација оствари со Ферари, освојуваќи пет титули (2000-2004).Од Формула 1 се повлече во 2006 година, но на патеките се врати во 2010 година во болидот на Мерцедес од каде замина во пензија по трката во Бразил во 2012 година.
Германецот во кариерата стартувал на 307 трки, забележал 91 победа, а вкупно 155 пати се искачувал на победничкиот пиедестал. Од пол позицијата стартувал 68 пати, а 77 пати го возел најбрзиот круг. Освоил вкупно 1.566 бодови.
Иако на патеките покажуваше возачка луцидност и знаење, сепак неговата кариера не мина без инциденти кои вечно ќе се паметат.

До својата прва титула во 1994 година стигна откако на последната трка во Австралија од патеката го истурка Дејмон Хил. Нешто слично се обиде да направи и во 1997 година, кога на трката во Херез се обиде да го исфрли Жак Вилнев, но на крајот тој заврши надвор од патеката, а Вилнев ја освои титулата.
Поради тој инцидент подоцна ФИА му го одзеде второто место во вкупниот пласман, но резултатите постигнати таа сезона не му беа избришани.
Михаел Шумахер од 1995 година е оженет со Корина, има две деца Џина-Марија и Мик.
Познат е по својата хуманитарна работа, на разни организации со својата работа им подарил десетици милиони долари.
Беше и амбасадор на УНЕСКО и се бореше за безбедноста на возачите на патиштата.
И неговиот помлад брат Ралф возеше во Формула 1, интересно тие се единствените браќа кои ги освоиле првите две места на некоја трка (2001 во Канада), а потоа истото го повторија на уште четири трки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Барселона ја потопи „жолтата подморница“
Фудбалерите на Барселона лесно го победија Виљареал во 17-то коло од Примера (2:0), со што ја забележаа својата осма последователна победа во шпанската елита.
Избраниците на Ханси Флик, во Виљареал, го отворија резултаот во 12-та минута, кога Рафиња погоди од пенал.
Потоа следуваше шоуто на Ламин Јамал. Прво, Ренато Веига доби директен црвен картон во 39-та минута за наивен старт врз суперталентираниот 18-годишник, а пота Јамал во 63-та минута го постави конечниот резултат.
Јамал го постигна својот седми гол во 14-от лигашки натпревар, има и седум асистенции.
Од неуспехот во Ел Класико, Каталонците имаат само победи, со импресивна гол-разлика од 26:8. Во следниот натпревар, тие ќе гостуваат кај нивниот голем ривал Еспањол.
Барселона е на чело на табелата со 46 бода, четири повеќе од Реал Мадрид, Венаш зад водечката двојка е Атлетико, додека „жолтата подморница“ го зазема четвртото место.
Foto/ depositphotos
Спорт
(Видео) Астон Вила не запира, Роџерс му пресуди на Манчестер Јунајтед
Фудбалерите на Астон Вила го победија Манчестер Јунајтед (2:1) на свој терен во дербито на 17-то коло од Премиер лигата. Астон Вила ја забележа скромната шеста победа во 61-от меѓусебен дуел со Јунајтед во Премиер лигата.
Головите, со кои Вила ја продолжи победничката серија ги постигна Морган Роџерс во 45-тата и 58-та минута. На другата страна, Матеус Куња погоди во третата минута од судиското продолжение во првото полувреме.
За да биде уште полошо за „црвените ѓаволи“, капитенот и најдобар играч Бруно Фернандес се повреди и ја напушти играта на полувремето.
Единствениот позитивен факт е дебито на Џек Флечер (18), син на познатиот Дарен, играч на првиот тим на Јунајтед од времето кога клубот предовен од сер Алекс Фергусон владееше во Премиер лигата.
Роџерс речиси постигна два идентични гола на овој натпревар, со прецизен удар во спротицниот агол, при што првиот беше особено импресивен.
Куња постигна гол по големата грешка на Мети Кеш и добрата реакција на Патрик Доргу.
Куња беше тој што ја имаше најдобрата шанса во 68-та минута за израмнување, но неговиот удар со глава заврши покрај стативата.
Вила ја забележа својата 10-та победа по ред во сите натпреварувања и моментално е трета во Премиер лигата со 36 бода, три помалку од лидерот Арсенал. Следен противник за тимот на Унаи Емери е Челзи.
Јунајтед е седми со 26 бода, а негов следен ривал е Њукасл.
Фото/ Depositphotos
Спорт
Тренерот на Милан се соочува со жестока казна
Тренерот на Милан, Масимилијано Алегри, е соочен со долга суспензија поради навреда на спортскиот координатор на Наполи, Габриел Оријали, за време на полуфиналето на италијанскиот Суперкуп помеѓу двата клуба во четврток вечерта.
Како што објавува „Газета Спорт“, тренерот на второпласираниот тим од Серија А би можел да добие казна од неколку натпревари во домашното првенство поради несоодветните зборови што му ги упатил на поранешниот италијански фудбалер.
Во случај да не добие суспензија, трофејниот италијански стручњак веројатно ќе биде „удрен во џебот“, а Дисциплинската комисија е таа што треба да одлучи каква казна ќе му одреди на Алегри.
Од Наполи веќе изјавија дека се надеваат, дека Алегри ќе добие соодветна казна за своето простачко однесување.
„Се надеваме дека овој целосно неконтролиран напад нема да помине незабележано, особено затоа што, со 33 камери вклучени во продукцијата на настанот, беше невозможно да не се види што се случи“, се вели во соопштението на клубот кој ќе се бори против Болоња за титулата победник на италијанскиот Суперкуп.
За потсетување, Милан ќе го игра својот следен натпревар во Серија А само во недела, 28 декември во Верона.
Foto/ freerangestock

