Челзи ја победи Барселона со 3:0 на домашен терен во петтото коло од Лигата на шампионите. Автоголот на Жил Кунде во 27-та минута, односно Естевао во 55-та и Лиам Делап во 73-та минута го решија победникот во натпреварот, во кој Барселона од 44-та минута играше без исклучениот капитен Роналд Араухо.

Покрај стрелците на головите (Естевао и Делап), брилијантните Каиседо и Енцо Фернандез во редот за врска, херој на победата на Челзи, беше левиот бек Марк Кукуреља.

Шпанецот совршено го бранеше колегата од репрезентацијата, Ламин Јамал, десното крило на Барселона.

„Каде е Јамал? Кукуреља го стави во џеб“, рече по мечот голманот на Челзи, Роберт Санчез и испрати уште една порака до младата ѕвезда на Барселона: „Сите се одлични додека не дојдат во Англија“.

Кога го прашаа дали Барселона била фаворит, тој одговори со насмевка: „Барселона фаворит? Ние сме фаворити“, заклучи Санчез, кој му аплаудираше на Кукуреља кога му беше врачена наградата за играч на натпреварот.

Кукуреља објасни како го запрел Јамал: „Се обидов да му ја направам играта што е можно потешка. Се обидов да го насочам кон средината, каде што е Каиседо. Не можев да го оставам сам на десната страна. Тоа е неговата послаба нога, но никогаш не можеш да бидеш сигурен со играчи како него“.

Foto/ EPA

Фудбалскиот клуб Сантос, без Нејмар, ќе мора да ги води клучните битки за опстанок во елитната бразилска конкуренција.

Нејмар, во понеделникот го пропушти натпреварот против Интернационал. Во клубот беа сигурни дека станува збор за лесна повреда, но деталните медицински прегледи откриле проблем со менискусот, што значи дека сезоната за него заврши.

Нејмар ќе ги пропушти преостанатите три натпревари, а последното се игра на 7 декември.

Славниот Бразилец одигра три натпревари по ред, но по средбата со Мирасол почувствува болка. Токму затоа тој направи превентивна пауза за да биде подготвен за домашниот натпревар оваа недела против Спорт.

„Она што изгледаше како безопасна ситуација се претвори во сериозен проблем, пишува „Ас“.

Ова е четвртата повреда на Нејмар во 2025 година. Претходните три се случија во март, април и септември, и токму овие проблеми го спречија да добие континуитет во играта и да се врати во бразилската репрезентација.

Сантос, моментално се во зоната за испаѓање, еден бод зад безбедната зона. Секој исход освен победа над Спорт Ресиве би бил рамен на катастрофа. Потоа, Сантос гостува кај Хувентуде, а сезоната ја завршува дома против Крузеиро.

Foto/ EPA

Баер Леверкузен победи кај Манчестер Сити со 2:0 во петтото коло од Лигата на шампионите. Стрелци беа Алекс Грималдо во 23-та и Патрик Шик во 54-та минута. „Фармацевтите“ со крпен состав, успеаја да го шокираа фаворитот.

И двата тима беа значително ослабени, но домаќините играа со резервен тим бидејќи така одлучи Пеп Гвардиола, а гостите бидејќи им недостасуваше повеќе од половина од тимот поради повреди и жолти картони.

Затоа Германците ја слават големата победа.

„Билд“, најчитаниот германски дневен весник, под наслов „Едвај составениот тим на Баер ја казни ароганцијата на Пеп“, пишува: „Гвардиола, во својот 100-ти натпревар во Лигата на шампионите, целосно потфрли. Тој ги остави на клупата, меѓу другите, октоподот Донарума, машината за голови на Халанд, Доку, Фоден, Рубен Дијаш и Бернардо Силва. Халанд влезе во игра дури по 0:2. Премногу доцна, Баер ја казни ароганцијата на Пеп“.

Билд истакнува: „На Баер му недостасуваат единаесет играчи од првиот тим (Андрих, Тапсоба, Хофман, Фернандез, Паласиос…). Неверојатно, на клупата, би се рекло во школската клупа, седеа шест играчи од тимот до 19 години. Младиот голман Јеспер Шлих попладнето загуби со јуниорскиот тим, до 19 години од Сити (0:6).“

По натпреварот, тренерот на Манчестер Сити, Пеп Гвардиола, ја прифати одговорноста за поразот.

„Јас ја преземам одговорноста, но ми се допаѓа што сите се вклучени. Кога си фудбалер и не играш пет, шест, седум натпревари, тешко е. Можеби имаше премногу замени. Кога си во голем тим, мора да се покажеш. Можеби играчите кои играа редовно во последно време би имале поголема самодоверба“, рече Гвардиола.

Поради послаба игра, Оскар Боб, Рико Луис и Рајан Аит-Нури беа заменети на полувремето, а подоцна Омар Мармуш го напушти натпреварот.

„Невозможно е да се помисли дека не се добри. Ако играте често, се чувствувате конфорно. Некои се плашат да не направат грешка затоа што не сакаат да направат нешто што би било лошо за тимот, но во тој момент мора да бидете слободни и да ја направите таа грешка. Халанд не може да игра 95 минути секој пат, ни требаат свежи нозе. Но, тоа беше премногу. Тоа беше прв пат во мојот живот да го направам тоа, и беше премногу.“