Регион
Притвор од месец дена за човекот кој застрела две српски момчиња на Косово
Основниот суд во Урошевац денеска му одреди едномесечен притвор на А.К., осомничениот кој на 6 јануари кај Штрпце пукаше и повреди две српски момчиња.
Осомничениот, како што јавуваат медиумите во регионот, се товари за тешко убиство во обид, употреба на опасно орудие или алат и предизвикување општа опасност.
Во судското соопштение се нагласува дека тој намерно се обидел да им го одземе животот на повредените М.С. и С.С.
Неговиот адвокат Наим Ферати изјави дека неговиот клиент патувал за Брезовица, кога неговиот автомобил бил опколен од толпа луѓе кои славеле. Тој вели дека неговиот автомобил бил нападнат со тешко оружје, а во обид да го избегне нападот „пукал со пиштолот на земја и во воздух“.
„На повредените во овој случај им посакуваме брзо закрепнување и изразуваме жалење за ненамерниот настан и моментот во кој се случил. Во петокот, додека мојот клиент и пријател патуваа за Брезовица на ручек, на пат беа запрени од толпа граѓани кои се забавуваа на улица и кои го блокираа автомобилот на мојот клиент и на тој начин неочекувано го нападнаа “, рече адвокатот на А.К., Наим Ферати, пренесува „Коха диторе“.
„Фатен во овие околности, чувствувајќи се загрозен од сериозен напад од толпа луѓе, со намера да побегне оттаму, го извадил револверот и држејќи го во ниска положба и не вперувајќи го кон никој, го испукал првиот истрел на земја, а потоа и во воздух“, додаде тој.
Ферати рече дека кога дознал дека има повредени, го известил семејството, но и косовската полиција.
„Од ова е јасно дека мојот клиент немал намера да пука или повреди некој граѓанин, туку целиот настан бил разработен во самоодбрана“, вели тој.
Во судското соопштение се наведува дека судијата на претходната постапка на Одделот за тешки кривични дела оценил дека постои сомнение дека во село Штрпце А.К. намерно се обидел да им ги одземе животите на жртвите М.С. и С.С.
„Додека се движел со својот автомобил и кога пристигнал на влезот во селото, забележал неколку граѓани на крајот од патот и за да ги оддалечи, свирел со колата, не можејќи да оди понатаму, го запрел автомобилот. По вербална расправија на лице место извадил револвер и пукал двапати, удирајќи ги повредените, а поради тоа повредениот се здобил со физички повреди и најпрвин бил препратен во Здравствениот дом во Штрпце, а потоа во болницата во Грачаница“, се вели во соопштението на Судот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Дунав поплави село во Србија: До него се стигнува само со брод
Рибарско викенд село кај Сомбор е поплавено поради покачувањето на нивото на реката Дунав и единствен начин да се стигне до селото е со брод.
Водата ги поплави викендичките до висина на прозорците.
View this post on Instagram
– Во ова викенд одморалиште нема струја и во моментов се стигнува само со брод – пишува во описот на видеото објавено на Инстаграм.
Се наведува и дека ваков вид поплави годинава се случуваат по трет пат и дека мештаните се навикнати секогаш да бидат први на удар.
Регион
Воз прегази малолетник во Загреб
Во понеделникот наутро воз налета на малолетник во околината на Загреб. Според полицијата, околу 8.50 часот тие добиле пријава за настанот, но поради тоа што се работи за малолетник, не соопштуваат повеќе информации.
Како што пренесуваат медиумите, малолетникот починал.
Најверојатно, се работи за несреќен случај, соопшти Јавното обвинителство на Загреб. Според тамошните медиуми, најверојатно се работи за малолетник што тргнал на тренинг.
Поради инцидентот, патничкиот сообраќај според хрватските железници бил во прекин и сообраќајот се одвивал преку помошни транспортни релации.
Регион
Голема полициска акција во Далмација: уапсени неколку лица
Апсења на територијата на Сплитско-далматинската жупанија, јавуваат хрвтаските медиуми.
Според објавеното, акцијата и спроведувањето се резултат на кривична истрага спроведена од Сплитско-далматинската полиција по налог на УСКОК.
„Споменатите дејства се вршат на територијата на Сплитско-далматинската жупанија во врска со повеќе лица за кои постои основано сомнение дека сториле кривични дела против правосудството. По распитот на осомничените, УСКОК ќе донесе одлука за понатамошно постапување во предметниот случај за што навремено ќе ја информираат јавноста“, додаваат од таму.
За апсењата објави и полицијата, пренесува „Индекс.хр“.
„Полициски службеници на Сплитско-далматинската полиција, Службата за организиран криминал, во координација со Канцеларијата за сузбивање корупција и организиран криминал (УСКОК), рано утринава почнаа со реализација на кривична истрага поради постоење основи на сомнение за сторено кривично дело против судството“.
„Истрагата опфаќа неколку лица. Во текот на денот ќе се спроведат итни доказни дејства, а по завршување на истрагата, полициската управа ќе поднесе кривична пријава до Управата за сузбивање корупција и организиран криминал“, соопштија од полицијата.