Регион
Епидемиолози: Во Србија најверојатно пристигна новиот, најзаразен вид коронавирус
Српските епидемиолози и виролози денеска предупредија дека во наредните денови тестовите на крвта може да покажат дека кракен, најзаразната варијанта на коронавирусот, пристигнал во Србија.
Според нивната проценка, кракенот најверојатно веќе се појавил во Србија, а вирологот од Медицинскиот факултет на белградскиот универзитет Александра Кнежевиќ за порталот Нова.рс изјави дека се очекува анализата на новите примероци на крв да го потврди тоа во наредниот период.
Кнежевиќ оцени дека бивалентните вакцини достапни за граѓаните нудат одреден степен на заштита од кракен. Таа предложи пациентите со намален имунитет и постарите лица прво да ја примат бивалентната вакцина.
Епидемиологот Зоран Радовановиќ оцени дека кракенот ќе стане доминантен во Србија во наредните недели, особено во февруари.
Радовановиќ предупреди дека бројот на заразени со кракен се удвојува за осум дена, па оттука и проценките за врвот во февруари.
Тој нагласи дека „не се очекуваат драматични ситуации“ бидејќи речиси сите граѓани или се вакцинирани или се опоравиле од ковид.
Радовановиќ истакна дека кракенот не предизвикува потешка клиничка слика, дури и кај оние кои се најосетливи, но дека заразени се лицата кои не го прележале коронавирусот или кои не ја примиле вакцината.
Оние кои примиле бивалентна вакцина можат да бидат „релативно мирни“, рече Радовановиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ: Имаме речиси пет милијарди евра на сметка, БДП годинава достигнува 90 милијарди
Претседателот на Србија, Александар Вучиќ, денеска изјави дека Србија во моментов има речиси пет милијарди евра на сметката, што е цифра што на сметките ја немаат ни земји 10 пати поголеми од нив.
„Во изминатите 12 години го зачувавме мирот, имавме целосна стабилност. Имавме најголем раст во историјата на Србија, сакале или не – од 32 милијарди бруто домашен производ тогаш, оваа година ќе завршиме со 89-90 милијарди“, рече Вучиќ за време на разговорот со граѓаните.
Тој посочи дека Владата се обидела на сериозен начин да ја заштити јавната каса, наведувајќи дека „секогаш имаме пари за инвестирање и секогаш можеме да им помогнеме на оние на кои тоа им е најпотребно“.
Регион
Во Црна Гора два дена бојкот на трговските синџири. „Сложно, обединето, упорно“
Во Црна Гора денеска почна дводневен бојкот на малопродажните синџири поради високите цени, на кој повика невладиното здружение „Алтернатива“.
„Се повикуваат жителите на Црна Гора денеска и утре да не пазарат во големите продавници, туку доколку мораат, да пазарат во мали продавници со најмногу десет вработени.
Секојдневно сме сведоци на невидени поскапувања на основните производи, додека сопствениците на големи синџири акумулираат профит на сметка на народот“.
Истото невладино здружение минатиот петок организира бојкот на продавниците во Црна Гора кога, според Даночната управа на Црна Гора, петте најголеми трговски синџири забележаа пад на прометот од 56,14 отсто.
Минатата недела повеќето жители на северниот дел на Црна Гора се одѕваа на повикот за бојкот на големите продавници, а одѕивот беше нешто помал во централниот и јужниот дел на Црна Гора.
Регион
Мицотакис од Санторини: Властите ја следат сеизмичката активност, граѓаните да останат мирни
Грчките власти се на готовност и ја следат зголемената сеизмичка активност на островот Санторини, изјави денеска грчкиот премиер Киријакос Мицотакис повикувајќи ги граѓаните да останат смирени и да ги следат упатствата на службата за цивилна заштита.
„Уште еднаш сакам да ги уверам жителите на Санторини и на соседните острови, кои деновиве се пред тест, дека државниот механизам е на нивна страна“, рече Мицотакис за време на неговата посета на островот додавајќи дека подготвеноста и превенцијата се клучни, пренесе „Ројтерс“.
Тој изрази надеж дека оваа појава бргу ќе заврши и дека островот целосно ќе се врати во својот нормален ритам.