Шокирани сме од информациите, кои деновиве кружат помеѓу кривопаланчанци, а според кои градоначалникот Сашко Митовски нешто по полноќ на 14.1.2023 година физички нападнал граѓанин без каква било причина, велат од ВМРО-ДПМНЕ.

„Дополнително на тоа, информациите говорат дека настанот во билтенот на МВР бил заведен како напад од Н. Н. сторител (непознат сторител) како да сме паднати од Марс, а граѓанинот не знае кој го нападнал. Јавно прашуваме до ОВР ПС Крива Паланка дали ваквите срамни и понижувачки информации се вистинити имајќи предвид што нападнатото лице е полициски службеник, кој во периодот кога е нападнат од градоначалникот не бил на службена должност?

Ги охрабруваме сите присутни на настанот да посведочат за него, воедно го охрабруваме и оштетениот во настанот да ја води постапката до крај во согласност со законите во Р. Македонија.

Насилството и теророт врз граѓаните од страна на градоначалникот Сашко Митовски мора да запре за што јавно го повикуваме, доколку имал храброст да нападне граѓанин, да биде храбар и да се соочи со сите последици што произлегуваат од настанот, да не се заканува и да бара сведоците на настанот да молчат, да не им се заканува на оние што јавно пишуваат за настанот на социјалните мрежи и да не вовлекува други службени лица од Полициската станица во Крива Паланка да прават кривични дела за што со сигурност по промената на власта на претстојните предвремени парламентарни избори, ќе одговараат.

Доколку се потврдат ваквите наоди, ќе бараме од градоначалникот Сашко Митовски ВЕДНАШ да си поднесе НЕОТПОВИКЛИВА ОСТАВКА  бидејќи функцијата градоначалник не е за да се тепаат граѓаните, туку да се работи во нивен интерес. Ова е срам за функцијата градоначалник, Крива Паланка не заслужува силеџија каубој за градоначалник“, наведуваат од партијата преку социјалните мрежи.