Во рамките на дводневната конференција организирана од страна на Владата, „Година на нови можности“ ,се одржа и панел-сесијата „Надворешна, безбедносна и одбранбена политика, предизвици и можности за обезбедување меѓународна соработка и сигурност“, на која учество зедоа министрите за надворешни работи, за одбрана и за внатрешни работи, Бујар Османи, Славјанка Петровска и Оливер Спасовски, како и деканот на Факултетот за безбедност, Никола Дујовски, и претседателот на Евро-атланскиот совет, Исмет Рамадани.

Министерот за внатрешни работи, Оливер Спасовски, одговарајќи на прашањето како МВР од аспект на внатрешната безбедност се справува со организираниот криминал, шверцот со дрога и корупцијата, како и проблемот со мигрантите, како безбедносни предизвици што не препознаваат држави и граници, посочи дека 2022 за МВР беше успешна година со 2,4 тони запленета дрога, со речиси 20 тони прекурсори.

Во делот за борбата против корупцијата, Спасовски истакна дека можеби тоа е делот за кој треба многу повеќе да се зборува и да се презентираат резултатите во овој дел на работењето на Министерството за внатрешни работи.

„Во борбата со корупцијата имаме зголемување на ефикасноста речиси 50 % ако ја споредиме со 2021 година. Речиси 250 милиони денари е штетата што е направена во делот на корупцијата и тоа е показател не само дека институциите се свртени кон борбата со корупцијата туку јакне и јавната свест на граѓаните, кои се охрабруваат и пријавуваат“, потенцира министерот Спасовски.

Тој истакна дека се менуваме сите ние заедно, сфаќаме дека корупцијата го јаде општеството, ги јаде новите работни места, го јаде развојот итн..

„И, најважно, во делот на миграцијата ќе го споменам само договорот со Фронтекс, кој е потпишан. Значаен прв договор што го склучи Северна Македонија со Европската комисија од почетокот на преговорите и создаде трајна основа за заедничко справување со мигрантската криза“, истакна Спасовски.