Македонија
Странци ќе го оправаат системот на Фондот за здравство по сајбер-нападот
Дванаесет дена по сајбер-нападот на Фондот за здравство, поради кој се недостапни податоците на здравствените осигуреници, министерот за внатрешни работи, Оливер Спасовски, рече дена има истрага за нападот. Според него, и нападот на Фондот е дел од хибридна војна со зачестени напади по руската агресија врз Украина, од кои ниедна земја самостојно не може да се заштити.
„Таму се работи за хибриден напад со кој е влезно во нивниот систем. Нашиот оддел работи интензивно, бараме поддршка од меѓународни партнери за да го заштитиме системот колку е можно за да продолжи понатаму. Ова треба да ни покаже дека сите треба да бидеме дел од заштитата на тој систем, да посветиме поголемо внимание на нападите, да се зголеми отпорноста на институциите оти не може една институција да ги штити сите други. Секоја мора да има заштита и експерти што тоа ги прават“, рече министерот Спасовски.
И премиерот Димитар Ковачевски денес рече дека на враќање во функција на системот на Фондот работат експерти од Германија и други држави.
Спасовски потврди дека има пријава за нападот во одделот за сајбер-криминал во МВР и се работи на истрагата, но нагласи дека заштитата на институциите треба да биде динамичен процес на ист начин како што е динамичен процесот на електронски развој. Она што денес е безбедно, министерот вели дека за шест месеци веќе може да не биде релевантно.
„Ако не работиме на превенција, на заштита на тие податоци, ќе биде многу тешко да работиме само со истрагите. Тоа е веќе кривично-правен настан и така го третираме сите ние“, вели министерот Спасовски.
Во моментот, напад, според податоците со кои располагаат, има само во Фондот за здравство, други институции не се загрозени, но министерот потсети дека изминатиот период напади имаше и во многу други институции.
„И во изминатиот период имаше некои информации и најави за обиди за напади. Повеќето од институциите имаа консолидиран систем на заштита. Имаше обиди за напади во Министерството за земјоделство, Министерството за образование, Министерството за информатичко општество, во Државниот завод за статистика за време на пописот, но тоа беа обиди за напад, успешно беа одбиени. Не се дозволи да се навлезе во системот и некои од нивните податоци да бидат уништени“, рече министерот Спасовски.
Токму за да се овозможи заштита на податоците на јавните институции, министерот Спасовски посочи дека се гради ИКТ-центарот во Прилеп да послужи како бекап за податоците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.