Економија
Ангеловска-Бежоска-Зимер: Новиот Закон за финансиска стабилност – придонес за натамошно јакнење на финансиската стабилност
Новиот Закон за финансиска стабилност придонесува за натамошно јакнење на финансиската стабилност преку формално воспоставување на Комитет за финансиска стабилност, со кој претседава гувернерот на Народната банка, а има претставници од сите финансиски регулатори. Комитетот е надлежен за координирано следење на состојбите во финансискиот систем и преземање на активности за спречување или намалување на системските ризици. Народната банка тековно подготвува макропрудентна стратегија со која подетално ќе се утврдат макропрудентните цели, инструментите и показателите за следење на финансиската стабилност, а се очекува истата наскоро да биде донесена од страна на Комитетот. Ова беше истакнато на работна средба на гувернерката на Народната банка, Анита Ангеловска-Бежоска и вицегувернерот, Фадил Бајрами со вршителот на должност заменик-амбасадор на САД во земјава, Кристофер Зимер и Јордан Дамчевски, сениор – економист во амбасадата.
На средбата, гувернерката истакна дека Народната банка минатата година донела макропрудентна мерка насочена кон натамошно јакнење на капиталната позиција на банкарскиот систем, односно вовела противцикличен заштитен слој на капиталот од 0,5%. На почетокот на оваа година било воведено и дополнително барање за протицикличен заштитен слој на капиталот од 0,25%. Овие мерки ќе придонесат за натамошно одржување на високото ниво на капитализираноста на банкарскиот систем кое тековно изнесува 17,7% и е највисоко во последната декада. Капитализираноста е предуслов за солидна кредитна поддршка за економијата која минатата година оствари раст од 9,4%, при висок раст на кредитирањето на корпоративниот сектор од 11,5%.
На средбата беше разговарано и за изгледите за растот на македонската економија, пришто беше констатирано дека иако со последните проекции на ММФ се подобрени изгледите за раст на економијата на ЕУ, нашиот најголем трговски партнер, сепак ризиците околу проектираната патека на растот на домашната економија остануваат и ќе зависат главно од надворешното окружување.
На крајот беше изразена заложбата за понатамошно продолжување и продлабочување на соработката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Средба на Ангеловска-Бежоска со Ханиг: Заложбите на Народната банка се видливи преку подобрувањето на финансиската вклученост на населението
Со своите напори за унапредување на финансиската вклученост и финансиската едукација, Народната банка успешно придонесува за зголемување на вклученоста на населението во финансиските текови, што е од особено значење за економскиот развој и благосостојбата на граѓаните. Ова беше истакнато на состанокот помеѓу гувернерката Анита Ангеловска-Бежоска и генералниот директор на Алијансата за финансиска вклученост (АФИ), Алфред Ханиг и нивните тимови, којшто се одржа на маргините на Десеттата меѓународна конференција од високо ниво, во организација на Народната банка.
На средбата беше посочено дека Народната банка низ годините има преземено повеќе крупни чекори кон зголемување на финансиската вклученост и едукација, меѓу кои би можеле да се издвојат првата национална Стратегија за финансиска едукација и финансиска инклузија, поставувањето на финансиската писменост и вклученост помеѓу стратегиските цели на Народната банка, како и основањето посебна Дирекција за заштита на потрошувачите и финансиска едукација во рамките на Народната банка.
Од годинава Народната банка се придружи кон АФИ, којашто е мрежа на централни банки и финансиски регулатори чија цел е да се унапреди финансиската вклученост. Во изминатиот период се постигнати видливи подобрувања во финансиската вклученост кај нас, со раст од 11 процентни поени на населението постаро од 15 години со пристап до финансиска сметка до 85% во периодот од 2014 до 2021 година, според последните податоци на базата на податоци на Светската банка, „Финдекс“. Сепак, постои простор за понатамошно подобрување имајќи предвид дека во еврозоната учеството на возрасните кои користат платежна сметка е речиси 100%.
На средбата стана збор и за политиките за намалување на родовите јазови, заради намалување на структурните нееднаквости и со тоа забрзување на економскиот раст, како и на улогата на централните банки за зголемување на општествената и економската свест за родовата еднаквост.
„Родовата вклученост е прашање за сите. Ако се бориме за поголема застапеност на жените во бизнисот, финансиските услуги и во носењето политики, тоа е затоа што општеството како целина има корист од посилни жени. Пред пет години, оваа дискусија би била посветена на регулаторните препреки, но денес ја препознаваме важноста на решавањето на правните и општествените препреки, за да постигнеме вистинска родова вклученост“, истакна Ханиг.
За време на Десеттата меѓународна конференција, директорот Ханиг претседаваше со третата панел-дискусија, на која се зборуваше за финансиите поврзани со родовата вклученост во регионот на Југоисточна Европа.
Економија
Европски град е прогласен за најскап за живот во светот во 2024 година
Швајцарија е позната по високите трошоци за живот, а тоа го потврди и овогодинешниот Извештај за трошоците на животот според градот 2024 година, објавен од Numbeo, најголемата светска база на податоци за градови и земји ширум светот.
Швајцарија на самиот врв
Според нивните податоци, најскапи градови за живеење досега во 2024 година се Женева и Цирих, а потоа следи Њујорк. При креирањето на овој извештај биле земени предвид трошоците за намирници, кирија, оброци во ресторан и вкупните трошоци за живот.
Во Женева намирниците се за 11,4% поскапи отколку во Њујорк, а цените во рестораните се повисоки за 1,5%. Сепак, трошоците за домување се за 40,4% поевтини во Женева отколку во Њујорк.
Ова се 10-те најскапи градови за живеење:
Женева, Швајцарија
Цирих, Швајцарија
Њујорк, САД
Сан Франциско, САД
Бостон, САД
Рејкјавик, Исланд
Вашингтон, САД
Сиетл, САД
Лос Анџелес, САД
Чикаго, САД
Иако Швајцарија е најскапата земја во светот за живеење, Женева исто така е рангирана како еден од најдобрите градови за живеење. Во средината на годината, Виена по четврти пат во последните шест години беше прогласена за најдобар град за живеење, покажуваат податоците на Economist Intelligence Unit (EIU). Цирих се најде на третото, а Женева на шестото место на таа ранг-листа.
Минатата година Економист ги објави најскапите градови во 2023. Извештајот Index Worldwide Cost of Living ги споредува цените на повеќе од 200 производи и услуги во 173 градови низ светот, а според резултатите, Сингапур и Цирих се најскапите. Женева беше на третото место, изедначена со Њујорк.
Економија
Трајкоска за 100 дена Влада: Имавме многу високи очекувања, не добивме ништо, немаме информација како парите од кредитот ќе одат за бизнисот
Работодавците немаат никаква конкретна информација на кој начин половина од парите од најавениот унгарски кредит ќе одат за бизнисот. Претседателката на Организацијата на работодавците на Македонија, Владанка Трајкоска, вели дека новата Влада во првите 100 дена не му помогнала на бизнисот во земјата.
„Денеска, се одбележуваат 100 дена од Владата. Имавме многу високи очекувања, не добивме речиси ништо. Очекувавме дека оваа Влада ќе има сенс за бизнисот, за сите оние кризи со кои се соочуваме во работењето, меѓутоа она што се зборуваше во изминатиот период беше само зголемување на платите на јавната администрација, земање кредити за општините, заобиколување на проблемите со кои се соочува стопанството во делот на продуктивноста и на немањето работна сила. Со еден збор – ништо. Немаме никаква конкретна информација на кој начин ќе одат парите од кредитот за бизнисот. Се вели дека ќе биде за некакви инвестиции во работењето. Сè додека немаме конкретна информација и додека не ни биде понудено на кој начин ќе се стигнува до тие кредити, дали ќе бидат кредитите поволни за стопанството, ние не можеме ништо да говориме“, рече денес претседателката Трајкоска пред почетокот на конференцијата за социјален дијалог, состојби и перспективи организирана од Сојузот на синдикатите на Македонија и Фондацијата „Фририх Еберт“ – Скопје.
Работодавците сметаат дека клучните прашања, кои може да му помогнат на стопанството, се зголемување на продуктивноста на компаниите, на што заеднички треба да се работи, изнаоѓање пазари и подобра инфраструктура.