Свет
Зеленски се појави уморен на самитот во Минхен, Макрон порача дека Европа мора да биде подготвена за продолжен конфликт
![](https://makfax.com.mk/wp-content/uploads/2022/02/makron-i-zelenski.jpg)
Пред точно 365 дена, на 19 февруари 2022 година, украинскиот претседател Володимир Зеленски излезе на сцената на безбедносната конференција во Минхен во костум и вратоврска, а во говорот што следуваше, го соочи Западот со можноста за неизбежно враќање на војната во Европа. Тој отворено зборуваше за отстапката на Западот кон Русија и како оваа рамнодушност ги направи западните земји соучесници во руските злосторства. Тој, исто така, побара безбедносни гаранции за да избегне неговата земја да стане постојана тампон зона меѓу Европа и Русија, велејќи дека се потребни јасни одговори на барањата на Украина за членство во НАТО и во Европската унија.
Една година подоцна, по десетици илјади убиени на бојното поле и дополнителни 1.000 говори, Зеленски се обрати на истата публика од светски лидери и дипломати, овој пат преку видео. Ликот го поажа уморот, а минатогодишното одело беше заменето со сега веќе познатата борбена униформа.
Во говорот оваа недела, Зеленски повика на побрзи одлуки за санкциите против Русија и оружје за Украина, велејќи дека Владимир Путин е единствениот добитник со одложувањето. Тој предупреди дека непостојаноста може да доведе до вовлекување на Молдавија во конфликтот и остварување на нуклеарните амбиции на Иран додека Русија го пренесува збогатениот ураниум во Техеран.
Конечно, тој инсистираше на тоа дека Украина мора да стане полноправна членка на ЕУ и НАТО, на што германскиот канцелар Олаф Шолц му даде надеж, велејќи дека „секој што може да испорача борбени тенкови треба навистина да го направи тоа сега“.
Сепак, Зеленски не беше главната ѕвезда во Минхен. Францускиот претседател Емануел Макрон порача дека Европа мора да биде подготвена за продолжен конфликт.
„Во овој момент времето за дијалог се уште не е дојдено бидејќи Русија избра војна и изврши воени злосторства. Русија не може и не смее да победи во оваа војна“, апелираше францускиот претседател.
Тој призна некои лични погрешни проценки, велејќи дека кога разговарал со Путин пред една година, бил уверендека Вагнер нема никаква врска со него.
„Денес гледаме дека групата на Вагнер е вклучена во војната. Стана нова мафијашка алатка која се користи за создавање криминал и неправда“, рече Макрон, предупредувајќи дека Западот ги губи земјите од т.н. трет свет и дека не направил доволно за да одговори на обвинувањата за двојни стандарди, вклучително и недоволно брзо помагање на посиромашните земји со вакцини против ковид.
Макрон потоа истакна дека Западот едноставно не може да го избегне предизвикот да најде начини да се справи со Русија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Огромна количина оружје пристигнува во Украина од Америка
![](https://makfax.com.mk/wp-content/uploads/2024/07/raketi-ukraina.jpg)
Соединетите Држави ќе испратат на Украина нов пакет воена помош во вредност од дури 2,3 милијарди долари, потврди денеска американскиот секретар за одбрана Лојд Остин. Пакетот ќе вклучува клучни системи за противвоздушна одбрана, како и противтенковско оружје. Тоа е еден од највредните пакети за воена помош од почетокот на војната.
Потврдата за новиот пакет воена помош доаѓа во време кога ослабените и побројни украински сили се обидуваат да ја задржат руската офанзива, при што Русите во последно време често освојуваат села во источна Украина.
„САД наскоро ќе објават пакет воена помош во вредност од над 2,3 милијарди долари“, рече Остин на почетокот на средбата со неговиот украински колега Рустем Умеров.
„Пакетот ќе вклучува противвоздушни одбранбени системи за пресретнување на ракети, противтенковско оружје и разновидна критично потребна муниција. Сето ова ќе дојде од американските резерви“, рече Остин.
„Новиот пакет помош ќе им овозможи на САД да испратат повеќе противвоздушни ракети Патриот и НАСАМС, кои ќе бидат испратени по итна постапка“, додаде тој.
Умеров му се заблагодари на Остин за помошта, велејќи дека „благодарение на помошта на сојузниците, ќе ја запреме Русија и нејзината агресија“.
Америка е клучен сојузник на Украина во одбраната од руската агресија која трае речиси 2,5 години. Од почетокот на војната, САД испратија оружје и друга воена опрема во вредност од 51 милијарда долари.
Регион
(Видео) Паднати дрвја, скршени клупи, водопади: невремето го опустоши Белград
![](https://makfax.com.mk/wp-content/uploads/2024/07/nevreme-dozd.jpg)
Белград денеска повторно го зафати силно невреме.
Според локалните медиуми, градските улици се поплавени, паднаа многу дрвја, а многу возила се оштетени.
Невремето собори огромни дрвја и во близина на Музејот на Југославија.
Поради пороите заглавија многу возила. Градоначалникот на Белград, Александар Шапиќ, изјави дека суперќелиските бури стануваат реалност.
„Мораме да ги прифатиме новите временски услови. Суперќелиските бури стануваат наша реалност. Имавме дури и среќа во споредба со регионот и светот. Загреб беше целосно уништен. Количеството на врнежи беше околу 55 литри на метар квадратен. Максималната е околу 60 литри. Ова е количината што вообичаено паѓа за еден месец“, изјави Шапиќ.
Градоначалникот на Белград истакна дека канализацијата не може да прими поголемо количество дожд и дека тоа е проблем и во многу побогатите области и градови.
„Имавме над 250 интервенции од нашите комунални претпријатија, 1.500 работници постојано се на терен, состојбата во градот се стабилизира“, додаде тој.
Дождот буквално предизвика колапс во Белград и делови од градот. Најлошо беше во општините Раковица и Чукарица. Во првиот буквално е создаден водопад, како што може да се види на видеата од социјалните мрежи, додека во Чукарица е снимен гејзер.
Градот беше целосно блокиран, а претходно невремето ги зафати и Рума, Нови Сад и Инџија.
Свет
Турција ја затвори границата со Сирија
![](https://makfax.com.mk/wp-content/uploads/2024/07/turcija-sirija-granica.jpg)
Турција го затвори својот главен граничен премин кон североисточна Сирија во вторникот, откако турските војници беа нападнати од Сиријци лути поради насилството врз нивните сонародници во Турција, изјавија локални жители и извор од сириската опозиција.
Турската полиција уапси 474 лица вклучени во нападите врз сириската заедница ширум земјата во текот на ноќта, изјави турскиот министер за внатрешни работи Али Јерликаја. Насилството започна доцна во неделата.
Во централниот град Кајсери, сириски имот, куќи и возила се уништени и запалени. Насилството беше поттикнато од објавите на социјалните мрежи дека Сириец малтретирал роднина. Јерликаја рече дека инцидентот се истражува.
Насилството се прошири во провинциите Хатај, Газиантеп, Коња, Бурса и областа Истанбул, објави турската разузнавачка агенција МИТ. На социјалните мрежи беше објавено дека меѓу Сиријците има и повредени.
После тоа, стотици гневни Сиријци излегоа на улиците во неколку градови во северозападна Сирија под контрола на бунтовниците, област каде Турција има илјадници војници и ја изгради својата сфера на влијание што го спречи сирискиот претседател Башар ал-Асад да ја преземе контролата.
Доцна во понеделникот, Турција одговори на немирите со затворање на граничниот премин Баб ал Хаву, главна трговска и патна рута за повеќе од три милиони жители, како и Баб ал Салам и други помали премини до понатамошно известување, изјави граничен претставник за Ројтерс. .
Сирискиот пограничен град Африн беше место на најжестоките судири. Најмалку четири лица загинаа. Цивилите фрлаа камења врз турските конвои во неколку градови и го тргнаа турското знаме од некои канцеларии. Неколку турски официјални лица ги опишаа немирите во Сирија како „провокации“.
Турскиот претседател Таип Ердоган ја обвини опозицијата за антисириските напади, обвинувајќи ја, без докази, за поттикнување расизам во земја која е дом на повеќе од три милиони сириски бегалци. „Ништо не може да се постигне со поттикнување ксенофобија или омраза кон бегалците во јавноста“, рече тој во понеделникот.
Ердоган во петокот рече дека е можна средба со Асад за обнова на билатералните односи. Турција ги прекина односите со Сирија по избувнувањето на сириската граѓанска војна во 2011 година и ги поддржа бунтовниците кои сакаат да го соборат Асад.