Македонија
Градоначалникот Ѓорѓиевски положи свежо цвеќе пред споменикот на Кузман Јосифовски-Питу

Градоначалникот Ѓорѓиевски и делегација од Општина Кисела Вода, денес положија свежо цвеќе на споменикот на Кузман Јосифовски-Питу во истоименото училиштето, кое денес го одбележува својот патронат. Ова училиште постои 61 година и со себе ја носи историската мисла за македонскиот херој Питу. Задачата на секој поединец, а особено на училиштето и на локалната самоуправа, е таа мисла да се пренесе на следните генерации и да се води грижа за достојно одржување на сите објекти, кои во негов спомен му го носат името, истакна градоначалникот Ѓорѓиевски. Наведе дека ОУ „Кузман Јосифовски-Питу“, по завршените реконструктивни зафати, доби нови покрив и фасада, како и лифт за децата со посебни потреби, сензорна соба, пристапни рампи, специјални тоалети, тактилни патеки, со што тоа е првото целосно инклузивно основно училиште во Скопје.
„Гордост е да се биде во училиште што го носи името Кузман Јосифовски-Питу бидејќи тој има големо значење во македонската историја. Запаметен е како еден од главните организатори на антифашистичкото движење и на НОБ во Македонија, како еден од првите македонски борци што го добиле одликувањето народен херој, како лик што честопати, поради своето храбро дело, е нарекуван и Гоце Делчев на Народноослободителната борба.
И токму затоа сме должни како Македонци да застанеме пред паметникот на овој голем херој и да му оддадеме чест. На нашите ученици да им раскажеме за неговата борба и да им укажеме на големината на името Кузман Јосифовски-Питу. И на оваа генерација, и сите пред неа и на сите што доаѓаат! А паралелно со пренесувањето на историската мисла, наша задача е да се погрижиме за достојното одржување на сите објекти, кои во негов спомен му го носат името.
Затоа, ми претставува уште поголема чест што веќе една година како градоначалник на општина Кисела Вода ја имам одговорната задача да бидам лидер на тимот што се грижи за инфраструктурните подобрувања, кои во ова училиште се повеќе од видливи. По завршувањето на реконструктивните зафати, „Кузман Јосифовски-Питу“ 61. година од постоењето ја почнува како првото целосно инклузивно основно училиште. Објектот има нов покрив, термоенергетска фасада, нова сензорна соба, лифт за децата со посебни потреби, пристапни рампи, специјални тоалети, тактилни патеки, што има дополнителна важност ако е знае дека во ова училиште функционира центар за поддршка на учење на ученици со попреченост.
Подобрувањето на ликот и унапредувањето на условите за учење и работа се наша обврска на која посветено ќе работиме и во годините што претстојат. Приказната за Кузман Јосифовски-Питу почната во минатото, ќе продолжат да ја испишуваат сегашните и идните ученици, истакна градоначалникот Орце Ѓорѓиевски.
Патронатот на училиштето беше одбележан со музичко-сценска програма во изведба на учениците, како и крводарителска акција организирана во соработка со Црвениот крст – Кисела Вода, на која учество зедоа повеќе хумани граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Мицкоски: Интензивно се работи на изградба на нова детска градинка во Кисела Вода со сместувачки капацитет за 70 дечиња

Премиерот Христијан Мицкоски денеска беше во увид на градежни активности на нова детска градинка во Драчево.
„За неколку недели од денеска овој објект ќе биде целосно функционален и во годините коишто следат би требало да биде дом на отприлика 70-тина дечиња. И во таа насока ќе продолжиме и во периодот којшто следи“, кажа Мицкоски.
„Наследивме, би рекол, една прилично хаотична и катастрофална состојба. За дел од проблемите коишто ги наследивме зборуваше и градоначалникот, зборуваше и заменик-министерот во Министерството за социјална политика, демографија и млади, но полека но, сигурно се надминуваат тие предизвици, посебно кога станува збор со листите на чекање за дечињата, но и за кадарот којшто треба да работи со децата во градинките.
Така што главен наш приоритет ќе продолжи да биде ова, односно изработка на инфраструктура, од проста причина што демографијата е еден од водечките предизвици коишто оваа Влада ќе треба во годините коишто следат да ги совлада. Затоа што демографијата подразбира каква иднина ќе имаме, дали ќе имаме иднина со многу дечиња или иднина во којашто за жал ќе биде и нацијата доведена под знак на прашање.
Еден од тие параметри во таа равенка е токму обезбедување доволно сместувачки капацитети за дечињата, бидејќи најголемиот дел од младите кога ги прашувате, како одговор кажуваат зошто не се одлучуваат на формирање семејство или многудетно семејство е токму листите на чекање во градинките“, рече Мицкоски.
„Така што, еве ние како Влада ќе работиме да нема листи на чекање, да има повеќе ваков тип на капацитети за повеќе дечиња. Тоа е она кое што е основна и суштинска политика на оваа Влада.
Јас на крај би сакал да му честитам на градоначалникот на Кисела Вода за посветената работа, овде изминативе речиси четири години. Слушнавте колку објекти од листа на чекање повеќе од 400 дечиња, сега ќе сведеме на нула, нема да има таква. Да се заблагодарам за посветеноста на пратеничката, на членовите на Советот, на администрацијата во рамките на Општина Кисела Вода, на сите оние коишто допринесоа Општина Кисела Вода да функционира навистина, би рекол одлично. Да му се заблагодарам на заменикот во Министерството за социјална политика, демографија и млади, на министерот на луѓето коишто неуморно работеа изминативе речиси 14 месеци да совладаат предизвици коишто беа наследени од минатото и очекувам така да продолжат во годините коишто следат. И да реализираме уште многу вакви проекти.
Ете тоа би било она коешто го би имал јас да го кажам и набргу од денеска оваа градинка, овој објект да биде ставен во функција. Тоа го посакувам на директорката и на сите тие коишто ќе го поминуваат денот тука во овој објект“, изјави Мицкоски.
Македонија
„СДС е последен што има основа да зборува за животниот стандард на граѓаните, а Филипче и Заев, освен луксузирања со народни пари, не знаат ништо друго“, реагира ВМРО-ДПМНЕ

„СДС се последни кои имаат основ да зборуваат за животниот стандард на граѓаните. СДС за почеток треба да погледнат назназад седум години и да видат што направија за стандардот на граѓаните“, реагира ВМРО-ДПМНЕ на прес-конференцијата на Богданка Кузеска.
„Владата предводена од ВМРО-ДПМНЕ за само една година ги зголеми платите во повеќе области. Се зголемија платите во здравство, образование, социјала, полиција. Пензионерите за година и половина добиваат 7.000 денари повисоки пензии.
Дополнително, постојано има мерки кои се во насока на подобар животен стандард. За граѓаните се спроведуваат следните мерки како училишна кошничка, велигденска, рамазанска, новогодишна и слично. Во меѓувреме се работи на решение со кое ќе се намали високиот профит на производителите, дистрибутерите, или решение кое ќе води до тоа граѓаните да плаќаат реални цени за производите.
Сето ова е проследено и со инвестиции, намалување на јавниот долг, исплаќање на редовни субвенции за земјоделците, со цена на струјата која не е покачена нити еден процент.
Што правеше СДС седум години? Инфлацијата беше високи 20 проценти, околу 600 илјади граѓани живееја со 150 денари на ден, , сметките за струја се зголемуваа, јавниот долг беше над 60 проценти, а инвестициите најавувани од Зоран Заев останаа само во неговата глава.
Како и да е Заев не ги реализираше инвестициите, ама затоа со другарот Венко Филипче кој го стави да ја води СДС во пропаст никако не пропуштаат луксузирања било викенд луксузирања или одмори. Освен луксузните викенди и одмори, си купуваат авиокомпании, градат низ светот и сето тоа со украдени пари од народот.
Оттука лицемерно е СДС да зборува за граѓаните кои никогаш не биле на дневен ред на Заев и Филипче, а камоли да бидат приоритет.
ВМРО-ДПМНЕ се грижи за секој еден поединец во државава!“, се додава во реакцијата на ВМРО-ДПМНЕ.
Македонија
Со закана изнудил 1,5 милион денари, поведена истрага за едно лице

Јавен обвинител од Основното јавно обвинителство Скопје, постапувајќи по кривичната пријава од Министерството за внатрешни работи против едно лице за кривично дело – Измама, денеска ги разгледа наводите и прибавените докази, по што против осомничениот одлучи да поведе истрага за продолжено кривично дело – Изнуда по член 258 став 1 во врска со член 45 од Кривичниот законик.
Пријавениот, во периодот од 15.07.2025 до 28.07.2025, со намера да се стекне со противправна имотна корист, уверувал едно лице дека против него ќе биде поведена судска постапка доколку не исплати околу 1.500.000 денари.
Познавајќи го оштетеното лице од минатото, во повеќе наврати од различни телефонски броеви, претставувајќи се во име на министерот за внатрешни работи и тројца јавни обвинители, преку пораки го контактирал осомничениот и ги барал од него паричните средства со цел да биде изземен од обвинение, односно да не биде спроведена постапка против него.
Оштетеното лице, во четири наврати на различни локации во Скопје, му ги дало на осомничениот побараните парични средства.
Јавниот обвинител донесе одлука да поведе истрага за изнуда, бидејќи од преземените дејствија на осомничениот произлегува дека тој користел сериозна закана да го присили оштетениот да стори нешто на штета на својот имот. За ова дело е предвидена построга затворска казна која изнесува најмалку една година, а може да биде изречен и законскиот максимум.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.