Македонија
(Видео) Маричиќ се фали дека работи колку и Груевски, но не ги сервира неговите манџи
Вицепремиерот Бојан Маричиќ во интервју за „Макфакс“ тврди дека Македонија не зела повеќе обврски од другите земји за да пристапи во ЕУ. Тој посочи дека патувањата во Брисел не се шетања, туку работа, која трае и до десет часа. Маричиќ во стилот на Груевски посочи дека работат како експремиерот, но смета дека тој и Владата не се како него.
„Не дека никој не нѐ сака, меѓутоа, реалноста е дека ЕУ е комплексен систем. Ни требаше многу за да дојдеме до датумот кога ги почнавме преговорите“, рече Маричиќ.
Прашан за патувањата во Брисел, каде што постојано оди со делегации, тврди дека не земаат пари за прекувремена работа.
„Не земаме прекувремени часови, никогаш не сме го правеле тоа. А сме работеле секогаш повеќе од осум часа“, а на забелешката дека и експремиерот Никола Груевски велеше дека работи 24 часа, Маричиќ додаде: „И работиме. И да знаете дека работиме, но не сме како Груевски. Тоа е интересно, дека може да се работи, но да не бидете како Груевски и да ги сервирате манџите на Груевски за ручек“.
Тој ја коментира и фотографијата на Заев, Османи, Димитров и Анѓушев од 2018 година.
„Јас можам да ви потврдам дека 2022 година е историска година за нас бидејќи првпат ги почнавме преговорите“, потенцира Маричиќ, па прашан за фотографијата од авион на Бујар Османи, Никола Димитров, Кочо Анѓушев и Зоран Заев, со која го прославуваа датумот за преговори, Маричиќ додаде: „Оваа година не беше историска, но беше важна за прескокнување на ветото од Грција“.
Прашан дали лицата на фотографијата манипулирале со јавноста, Маричиќ рече: „Не верувам дека манипулирале затоа што заклучоците од 2018 година велеа дека е отворен патот за Македонија да ги почне преговорите. Тогаш не беа почнати преговори, сега – да“.
Според Маричиќ, преговорите се почнати оти во тек е скрининг-процес.
„Претходно, не беше тоа скрининг, туку подготвителна вежба, која, за среќа, ни ја признаа. Скрининг не може да се нарече скрининг ако нема формален почеток на преговорите“, додаде тој.
Маричиќ зборува и за трката Македонија – Албанија во преговорите со ЕУ.
„Албанија го распушти целиот судски систем и од ново ги постави сите судии во рок од 3-4 години. Нам не ни беше дозволено тоа да го направиме бидејќи Албанија го правеше тоа со поддршка од ЕУ и беше блокирана со години бидејќи не можеше да избере врховен и уставен суд. Поучени од тие лекции, советот или препораката од ЕУ беше да не го правиме тоа. Ни кажаа: ‘Ако го правите тоа без наше одобрение, нема да имате поддршка до ЕУ за ветинг’“, па прашан дали тоа значи дека ЕУ има двојни стандарди, Маричиќ одговори: „Па, еве, може така да се каже. Во овој дел, базирано од научените лекции од Албанија, сметаше дека не треба тоа да се прави кај нас“.
Повеќе на темата евроинтеграции, но и како Албанија ја претрка Македонија во преговорите со ЕУ, Маричиќ одговара во интервјуто на „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Љутков: Ќе дадеме голема поддршка за „живата култура“ и за санација на објектот на Националната опера и балет
Министерот за култура и туризам, Зоран Љутков, во рамките на редовните работни посети на установите, денеска ја посети Националната опера и балет каде што се запозна со проектите и активностите во оваа најстара институција од овој вид во нашата земја.
Министерот Љутков ги поздрави направените интервенции во Националната опера и балет кои се однесуваат на подобрување на условите во оваа установа, за што в.д.директорот Оливер Арсовски, го посочи како пример, како за краток период, нецели сто дена, можат да се направат суштински подобрувања во една голема и обемна институција, како што е Националната опера и балет.
„Во изминатиов период е извршена ургентна санација на клучните инфраструктурни проблеми“, потенцираше Љутков, додавајќи дека комплетно се реновирани службеното фоаје и тоалетите за посетителите, извршени се и молерофарбарски работи на ходниците.
На средбата со новинарите беше истакнато дека во текот на вчерашниот ден е распишана и јавна набавка за реновирање на главниот влез на институцијата, кој, како што беше нагласено е во очајна состојба и во последните седум години немало никаква интервенција во овој сегмент, како и санација на покривните површини во делот на главното фоаје каде што кога врне, водата навлегува насекаде. Министерот Љутков најави дека во наредниот период ќе следат уште интервенции во атаљето на установата, каде во моментов се работи на негово расчистување.
„Она, пак, што сакам да го потенцирам, а е од особено значење и се однесува на вработените, е фактот што со ребалансот на буџетот се обезбедени сигурни плати и придонеси“, рече министерот Љутков. Изразувајќи задоволство од работата на новото раководство и од вработените, министерот Љутков најави дека Владата и тој како ресорен министер ќе дадат голема поддршка на оваа институција, која, како што рече, во идниот период ќе понуди богата културна програма на задоволство на сите граѓани.
Министерот Љутков изрази и јавна благодарност до целиот ансамбл на НОБ за одличната изведба на операта „Набуко“ од Верди во Софија, за која има одлични критики на сите нивоа, а особено во делот на т.н. културна дипломатија.
Директорот на Националната опера и балет Оливер Арсовски информираше дека е направена и нова програма за до крајот на годината, која ќе стартува на 16 октомври со кантатата „Кармина Бурана“ од Карл Орф.
Арсовски најави дека ноември ќе биде месец на Пучини кога ќе бидат изведени четири претстави од овој композитор, со пејачи и од странство, како и дека Националната опера и балет и Камерниот оркестар на 8 октомври ќе гостуваат во Виена, каде што пред австриската публика ќе бидат изведени дела и од македонски автори.
Поздравувајќи ги заложбите на министерот Љутков и на Министерството за култура и туризам за поголема поддршка на „живата култура“, директорот на Националната опера и балет најави многу промени во репертоарната политика и на операта и на балетот. Во рамките на посетата, беше споделено и дека набавен е и нов балетски под кој, како што беше посочено, ќе го подобри квалитетот на балетската продукција.
Македонија
Ќе се забрани пристапот до 100 странски онлајн коцкарници кои се користат кај нас, Андоновски алармира дека се вклучени малолетници
Откако беа згаснати домашните онлајн коцкарници кои нелегално приредуваа игри на среќа, министерот за дигитална трансформација Стефан Андоновски најави дека ќе го забранат пристапот до веб- страниците регистрирани во странство кои кај нас нелегално организираат игри на среќа. Забраната за веб-страниците регистрирани во странство е втора фаза од справувањето со нелегалното онлајн обложување за што Министерството за дигитална трансформација, Агенцијата за електронски комуникации, МАРНЕТ и Лотарија на Македонија веќе имале состанок и ги утврдиле конкретните чекори.
„ Во Лотарија на Македонија веќе се прваат табели кои утврдуваат кои точно страници се најприсутни и каде најмногу се закачени нашите граѓани, на кои веб-страници најмногу се приредуваат тие нелегални игри на среќа. Страшниот дел е што многу малолетници се вклучени. Во моментов се стотина странски веб-страници, но најкористени се две до три кои претпоставувам сите ги знаете. Мислам дека во првата фаза ќе треба да се работи овие 100 да се забранат, а пoтоа ова ќе биде континуиран процес. Не може да се направи еднаш засекогаш туку постојано треба да се ажурира оваа листа и постојано да се информираат АЕК и телеком операторите дека нешто се случува за да може постојано да се движат кон забрана на овие нелегални приредувачи на среќа. Ако тие беа регистрирани во Македонија, ова е кривично дело што го прават, но затоа што се регистирирани во странство не може да се стигне до тоа кој точно е приредувачот, затоа мора да одиме со забрана на пристапот“, рече министерот Андоновски.
Законот за електронски комуникации дозволува на Агенцијата за електронски комуникации да ги задолжи телекомите да забранат пристап до одредени веб-страници ако тие се во спротивност со Законот за електронски комуникации или ако се спротивни на други закони. Министерот Андоновски вели дека ќе го операционализираат тој дел од законот, оти досега не се користел .
Во наредниот период рече дека ќе излезат со точни податоци за тоа какви активности ќе преземе Министерството за дигитална трансформација и кои се активностите на МАРНЕТ, Агенцијата за електронски комуникации и телеком операторите кај нас.
Онлајн коцкарниците со македонски домеини кои беа згаснати, вклучително и онаа на државната видео-лотарија, ги известија корисниците дека средствата од регистрираните онлајн сметки за коцкање ќе им бидат целосно исплатени.
Министерот Андоновски е задоволен што Владата е обединета и ревноста во справувањето со нелегалното онлајн обложување.
„Причината за ова што го правиме е поради тоа што прво нашите најмлади се зафатени од оваа болест, без никаква контрола. Ниту се знае дали користат туѓи лични карти па се пријавуваат за игра, ниту се знае колку средства користат, ниту се знае каде се излеваат тие средства, ниту се знае за што се користат тие средства понатаму, дали се за финансирање на некои други нелегални активности. Ова е болест на македонското општество која ни се случува. Справувањето со ова ќе биде примарна задача на Владата во наредниот период“, рече министерот Андоновски.
Првиот вицепремиер Изет Меџити од коалицијата Вреди, чие предизборно ветување беше справувањето со коцкањето, најави дека по онлајн коцкањето ќе се справат и со дивите казина низ градовите ширум земјава.
Македонија
(Видео) Пожар во зграда во Чаир, станарите евакуирани, неколкумина побарале лекарска помош оти вдишиле чад
Пожар избувна во подрумски простории во зграда во скопската населба Чаир, а неколкумина станари, пожарникар и полицаец побарале лекарска помош откога вдишиле од чадот.
Според информациите од МВР, пожарот избил синоќа, а противпожарната бригада добила пријава дека огнот се раширил од магацин на неутврдена површина на улицата Прохор Пчински во Скопје.
Пожарот зафатил и продавница, а интервенирале 20 пожарникари со седум противпожарни возила.
Екипите на противпожарната бригада веднаш излегле на терен, а според информациите биле евакуирани околу 100 лица.