Македонија
Герасимовски: Преку вклучување на децата Роми во градинките ги зголемуваме социјализацијата и интеграцијата во општеството
Општина Центар и оваа година запишува до 20 дечиња од ромска националност во градинката „Раде Јовчевски-Корчагин“ како дел од проектот „Инклузија на деца Роми во јавните општински установи – детски градинки“. Овој проект Општината го реализира во соработка со Министерството за труд и социјална политика од 2011 години и по овој повод градоначалникот на општина Центар, Горан Герасимовски, присуствуваше на презентација на постигнатите резултати од спроведувањето на проектот.
Станува збор за упис до 20 дечиња од 3 до 6 години, кои доаѓаат од згрижувачки семејства или приматели на социјална помош на кои Општината им ги покрива месечните трошоци за посетување на градинката ЈУДГ на ОЦ „Раде Јовчевски-Корчагин“.
„Општина Центар работи на инклузија во образованието вклучувајќи го и предучилишното образование со цел да се надминат стереотипите и предрасудите во градинките, социјализација на децата уште од рана возраст и учење на македонскиот јазик на децата што ќе ја посетуваат градинката. Преку учество во овој проект исто така работиме на отстранување на бариерите за пристапот на децата Роми до предучилишните установи со цел да се намали јазот помеѓу Ромите и другите етнички заедници во делот на образованието. Нам особено ни е важно да ја зголемиме свеста и кај родителите на децата Роми и да ја истакнеме важноста за раниот детски развој и подоцнежното образование како единствена алатка за успешна интеграција во општеството“, истакна Герасимовски.
Герасимовски исто така истакна дека особено е важно што децата Роми воспитно образовниот процес го следат интегрирани заедно со другите дечиња што ја посетуваат градинката.
Образованието во раното детство ја има клучната улога во развојот на децата и носи позитивни социо-економски ефекти врз целото општество.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Најдобрите ученици на државните натпревари од Илинден на прием кај градоначалникот Алекдандар Георгиевски
И оваа година Градоначалникот на општина Илинден Александар Георгиевски приреди прием на учениците од основните и средното училиште од општината кои освоија високи места на државните натпревари и им додели признанија за постигнатите резултати.
Градоначалникот им ги честиташе успесите на учениците и нивните ментори и истакна дека прекрасно е чувството што има голем број наградени ученици од Илинден. Тој додаде дека како локална самоуправа посветено се работи на дополнителна промоција на успеси и достигнувањата на учениците.
-На 30 тина ученици и нивните ментори и оваа година им доделивме признанија за постигнатиот успех на државните натпревари кои се одржаа во текот на годината. Овој настан ќе продолжи и понатаму затоа што претставува признание за нивниот труд но и мотив за сите останати. Им го честитам крајот на учебната година, им посакувам убав летен одмор и во следната година подолеми достигнувања, истакна градоначалникот Георгиевски.
Високи достигнувања имат учениците на државните натпревари по македонски јазик, англиски јазик, хемија, биологија, природни науки, физичко во ракомет, како и на натпреварот по Информатичко размислување.
Македонија
Продолжуваат заедничките хуманитарни активности на „Алкалоид“ и Црвениот крст: Заедно можеме повеќе!
Масовниот одговор од страна на вработените во „Алкалоид“, на повиците за хуманост во општествени рамки, е најдоследна потврда за хуманата мисија која компанијата ја негува речиси девет децении. Одлучноста и подготвеноста за колективна помош и за брз хуманитарен одговор во заедницата, беше стартна позиција на многу значајни проекти и активности во знакот на солидарноста, реализирани под закрила на „Алкалоид“ и „Црвениот крст“.
И годинава „Алкалоид“ АД Скопје, во соработка со „Црвен крст на РСМ – Црвен крст на Град Скопје“, социјалното претпријатие „Копче“ и со „Институтот за трансфузиона медицина“, реализираше неколку хуманитарни активности, меѓу кои акции за донација на облека и на храна, како и масовна крводарителска акција.
Во рамки на собирната акција на облека, беа донирани речиси 2 тона облека со одлична употребна вредност, додека пак, во акцијата за донација на храна беа собрани трајни намирници во количина од речиси 1 тон, наменети за помош на граѓаните кои живеат во социјален ризик. Во делот на крводарителството, продолжувајќи ја повеќедецениската традиција, во новата уште помасовна крводарителска акција „Дарувај крв, спаси живот“, повеќе од 240 алкалоидовци ја изразија својата волја и желба за доброволно дарување крв.
Изминативе години, „Алкалоид“ има спроведено низа активности во соработка со „Црвен Крст на РСМ“ и „Црвен крст на Град Скопје“, како во делот на социјално-хуманитарната дејност, така и на полето на здравствено-превентивната дејност и крводарителството. Покрај редовните донаторски и крводарителски акции, „Алкалоид“ во 2013 година го помогна реновирањето и ребрендирањето на Дневниот центар за дарување крв и континуирано дава придонес во тековното функционирање на истиот. Компанијата го поддржа и проектот „Водич во болница“, инициран во 2019 година, а сесрдно дава своја поддршка и придонес и на апелите на „Црвен крст“, кога станува збор за ублажување на последици од природни непогоди, како: поплави во земјата и регионот, земјотреси, рударски несреќи и слични трагедии. Бездомниците, бегалците и мигрантите се исто така многу горливи категории, каде компанијата помага во смисла на одржување и задржување на интегритетот на луѓе кои против своја волја биле принудени да живеат поинаку. Една таква поголема акција наменета за овие ранливи категории, во рамки на „Алкалоид“, беше спроведена во 2015 година, кога на организираниот хуманитарен пикник, отворен за сите вработени во компанијата, беа собрани над 750.000 денари кои се донираа на „Црвениот Крст“.
Афирмирајќи ја низ дела својата позиција на партнер на општеството, посветен на поттикнување значајни промени и остварување позитивно влијание, „Алкалоид“ континуирано ги исполнува своите заложби од корпоративната општествено-одговорна стратегија, низ која вработените на компанијата се издвојуваат како вистински амбасадори на доброто дело.
ПР
Македонија
Работна средба на претседателот на Уставниот суд, Костадиновски, и италијанскиот амбасадор Силвестри
Претседателот на Уставниот суд, Дарко Костадиновски, и судијата Ана Павловска-Данева денеска остварија работна средба со амбасадорот на Република Италија, Адреа Силвестри.
Централна тема на разговор беше испитување на можностите за остварување билатерална соработка помеѓу уставните судови на двете држави.
Претседателот Костадиновски го информира амбасадорот Силвестри за приоритетите во својот мандат.
Амбадсадорот Силвестри пројави интерес за прашањата поврзани со обезбедувањето на независноста и самостојноста на судот, како и за транспарентноста и отвореноста на Уставниот суд.
На средбата беа разменети мислења на теми поврзани со реформирање на правосудниот систем, при што судиите, проф. д-р Ана Павловска-Данева и д-р Костадиновски, изразија надеж дека реформскиот процес во сферата на правосудството ќе се одвива во согласност со Уставот и во рамките на уставните принципи.
Амбасадорот Силвестри изрази поддршка за најавените приоритети и најави дека лично ќе се заложи за унапредување на билатералните односи во полето на уставното судство и подобрување на севкупната соработка.