Македонија
Панова: Колку побргу заминете, толку побргу ќе има решение за проблемот што го создадовте и ја загрозивте вистинската европска иднина на Македонија

Првин тврдевте дека сме изолирани и дека никој со нас не се среќава од претставниците на меѓународната заедница, а сега велите дека ветуваме уставни измени. Лажевте дека сте блиску до 80 пратеници, па дури и вие лично изјавувавте дека знаете како до 80 пратеници, како што и сега лажете за наводни ветувања исклучиво за дневно политички поени и за дефокус на јавноста од криминалот и корупцијата во ДУИ и СДСМ, изјави пратеничката Ели Панова од ВМРО-ДПМНЕ.
„Ајде за вистината. ВМРО-ДПМНЕ нема да поддржи уставни измени! Ниту имате, ниту ќе имате ниту сте блиску до 80 пратеници. Точно е дека не капитулиравме пред Бугарија, како што тоа вие го направивте. Ве предупредивме да не ја прифаќате капитулацијата што не може да ја исполните.
Точно е дека два дена во парламентот ви укажувавме да не прифаќате преговарачка рамка, во која билатералниот договор со Бугарија е внатре. Вие прифативте мислејќи дека така ќе потрошите уште некој месец од иднината на сите граѓани на Македонија крадејќи и делејќи ги вашите тендери во 4 очи.
Но, исто така точно е дека создадовте проблем со вашето незнаење и лакомост, проблем што ја загрозува иднината на Македонија, македонскиот народ и граѓаните на Македонија. И, да, на состаноците со меѓународната заедница го констатираме проблемот и, да, потребно е решение за тој проблем, кој вие не можете да го решите.
Колку побргу замините, толку побргу ќе има решение за проблемот што го создадовте и ја загрозивте вистинската европска иднина на Македонија, македонскиот народ и граѓаните.
П.с. Ако не e толкава разликата помеѓу ВМРО-ДПМНЕ и СДС, еве кажете колкава е? Но, едно да знаете, на наредните парламентарни избори, кога и да бидат, ќе биде уште поголема!“, порача Панова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.